Aisea 56 - AI VOLA TABU

Ena vakavotuni sara na lewa dodonu i Jiova, o koya me ra yalodina kina na nona tamata, 1, 2. Ena tawa vinakati se cati loa e dua na tamata, era na vinakati kece era lotu dina, 3-8. O ira liatamata lotu vakailasu era na cudruvi ga, 9-12.

¹ SA vosa vakaoqo ko Jiova, Dou vakabauta na lewa, ka cakava nai valavala dodonu: ni sa voleka ni yaco na veivakabulai kaʼu sa ia; kei na noqu lewa dodonu sa voleka ni vakatakilai.

² Sa kalougata na tamata ena cakava o qo; kei na luve ni tamata ena taura matua, ni sa vakatabuya na siga tabu, me kakua ni vakacacana; ni sa tarova na ligana talega, me kakua ni cakava e dua na ka ca.

³ Ia na kai tani sa torovi Jiova, me kakua ni vosa ko koya, ka kaya, Ena tawasei au tani sara ko Jiova maivei ira na nona tamata: me kakua talega ni kaya ko na mata, Raica, oi au kaʼu sa kau mamaca.

⁴ Ni sa vosa vakaoqo ko Jiova vei ira na mata era na vakatabuya na noqu siga tabu, ka digitaka na ka kaʼu sa rekitaka, ka taura matua na noqu veiyalayalati;

⁵ kaʼu na solia me nodra e na noqu vale kei na noqu lomanibai na tikina kei na yaca e vinaka ka ca me vakaluveni ka tagane ka yalewa; kaʼu na solia vei ira na yaca rogo ka tawa mudu, ena sega ni takali.

⁶ Ia ko ira na kai tani era sa torovi Jiova, me qaravi koya, ka lomana na yaca i Jiova, me ra nona tamata, ka ra dui vakatabuya na siga tabu, me kakua ni vakacacana, ka ra taura matua na noqu veiyalayalati:

⁷ kaʼu na kauti ira mai ki na noqu ulu-ni-vanua tabu, ka vakamarautaki ira e na noqu vale ni masu; a nodrai soro kama kei na nodrai madrali ena vakadonui e na noqui cabocabo-ni-soro; ni na vakatokai na noqu vale me nodra vale ni masu na tamata kecega.

⁸ Sa kaya na Turaga ko Jiova, o koya sa vakasoqoni ira vata mai na Isireli era vakasevi, Kaʼu na ia tale meʼu vakasoqoni ira vei ira, me kedrai kuri era sa vakasoqoni rawa mai.

⁹ Oi kemudou kece na manumanu ni vanua, dou mai kana, ia koi kemudou kece na manumanu ni veikau.

¹⁰ O ira na nodrai vakatawa era sa mataboko kecega, era sa sega ni vuku; o ira kecega era sa koli galu, era sa sega ni kodro rawa; era tadra, era koto, era vinakata na moce.

¹¹ Ia na koli o qo era sa daukana, era sa sega ni mamau rawa; ia ko ira nai vakatawa era tawa vuku rawa; o ira kece era sa dui gole ga ki na nona sala, na tamata yadua ki na nonai yau, sa sega e vo.

¹² Era sa kaya, Tou ia, kaʼu na laʼki kauta mai na waini; ia me tou gunuva vakalevu sara na yaqona; ena vaka na siga edaidai na siga e na sabogibogi, ia ena vinaka vakalevu cake sara ga.