Aisea 48 - AI VOLA TABU

A Kalou, ni sa kilai ira na kai Jutia ni ra dauvakararavi ki na kalou lasu, sa tukuna eliu vei ira na ka ena yaco emuri, 1-8. Sa dauvakabulai ira e na vukuna ga, 9-11. Sa vakaroti ira me talairawarawa rua e na vuku ni sa kaukauwa ka vuku na nona lewa, 12-15. Sa vakavulici ira, 16-19; a sa yalata tale ni ra na vakabulai mai na tiko se mai Papiloni, 20-22.

¹ DOU rogoca na ka o qo, na mataqali i Jekope, na tamata sa vakatokai e na yaca i Isireli, ka sa lako mai na mata-ni-wai nei Juta, ka sa vosavavakini e na yaca i Jiova, ka sa daucavuta na Kalou nei Isireli, ka sega e na yalodina, se na yalododonu.

² Ni ra sa vakatokai ira e na yaca ni koro tabu, ka vakararavi vua na Kalou nei Isireli; o Jiova ni lewe vuqa na yacana.

³ Na ka makawa kaʼu a tukuna mailiu sara; ia mai na gusuqu ga ka sa lako yani na ka o qori, kaʼu a vakatakila talega; kaʼu a cakava vakasauri, a sa yaco ga.

⁴ Niʼu a kila ni ko sa yalokaukauwa, ni sa dali aironi na domomu, ka parasa na yadremu;

⁵ o koya kaʼu a tukuna makawa kina vei iko; ni sa sega ni yaco, kaʼu a vakatakila vei iko; do ko kaya, A noqu matakau ga sa vakayacora, ia na noqu matakau ceuceu, kei na noqu matakau sa vakawaicalataki, o koya ga sa vakarota.

⁶ O sa rogoca eliu, ia mo raica na ka kece o qo sa yaco ga; dou na sega beka ni via tukutuku talega, na matakau? kaʼu sa qai vakatakila na ka vou vei iko, ia na ka vuni, ko sa tawa kila.

⁷ Sa qai cakavi edaidai, ka sega eliu; e na gauna eliu ko a sega ni rogoca; do ko kaya, Raica, kaʼu a kila ga.

⁸ Io, ko a sega ga ni rogoca; ko a sega ga ni kila; sa sega talega ni basuki mailiu na daligamu: niʼu a kila ko na cakacaka vakailasu sara, ka sa vakatokai na dautalaidredre mai na kete i tinamu.

⁹ E na vuku ni yacaqu kaʼu na vakaberaberataka na noqu cudru, kei na vuku ni qaui rogo kaʼu na tarovi au maivei iko, meʼu kakua ni muduki iko laivi.

¹⁰ Raica, kaʼu a vakatovolei iko e na buka, ka sa sega na siliva dina; kaʼu a digitaki iko e na kuro qele ni veivakararawataki.

¹¹ E na vukuqu, io, e na vukuqu ga, kaʼu na cakava; ni sa vinaka li me vakadukadukalitaki na yacaqu? ia na vakarokoroko sa dodonu me ia vei au, kaʼu na sega ni solia vua e dua tani.

¹² Rogoci au, Jekope, o iko, Isireli, kaʼu a kaciva; sai au o qo: sai au na kenai liuliu; sai au na kenai murimuri talega:

¹³ sa ligaqu ga ka tauyavutaki vuravura, ia sa ligaqu i matau ka cagava na mata-ni-lagi: kaʼu sa kaciva, ka sa tu vata mai:

¹⁴ oi kemudou kece dou vakasoqoni vata ga, ka vakarorogo; o cei vei ira era sa vakatakila mai na ka o qori? Sa lomani koya ko Jiova: ena cakava ga na nona veitalia ki Papiloni, ia na ligana ena tauci ira na kai Kalitea.

¹⁵ Oi au, kaʼu sa cavuta; kaʼu sa kacivi koya; kaʼu sa kauti koya mai; ena vakayacora na nona cakacaka ko koya.

¹⁶ Dou toro voleka mai vei au, dou rogoca na ka o qo; sa sega ni kaʼu vosa vuni mai nai vakatekivu, ni sa qai tubu na ka o qori kaʼu a tiko maikina; ia o qo sa qai talai au mai na Turaga ko Jiova, kei na Yalona.

¹⁷ Sa vosa vakaoqo ko Jiova, na nomui Vakabula, o Koya na Yalosavasava nei Isireli; Oi au ko Jiova na nomu Kalou, kaʼu sa vakavulici iko mo yaga, kaʼu sa tuberi iko e na sala mo lakova.

¹⁸ Do ko a vakarorogo ki na noqu vunau! ena sa qai vaka na uciwai na nomu vakacegu, kei na nomu cakacaka dodonu ena sa vaka na ua ni wasawasa:

¹⁹ ena sa vaka na nuku na nomu kawa, kei na luve ni ketemu me vaka na lewe ni wai; ena sa sega ni muduki se bokoci na yacana mai na mataqu.

²⁰ Dou lako tani e Papiloni, dro tani vei ira na kai Kalitea, e na domo ni marau dou tukuna yani na ka o qo; dou vakarogotaka, vakauta nai rogo ki nai yalayala kei vuravura; dou kaya, Sa vakabula ko Jiova na nona tamata ko Jekope:

²¹ a ra sa sega ni viagunu mai na lekutu sa kauti ira voli kina ko koya; na medra wai sa vakadavea mai na vatu ko koya; a sa tasea na vatu, ka sa tovure maikina na wai,

²² Sa sega na vakacegu, sa kaya ko Jiova, vei ira na tamatai valavala ca.