Aisea 46 - AI VOLA TABU

Sa vakabobulataki na kedrau matakau na kalou ni Papiloni, 1, 2. Sa vakabulai ira tiko na nona tamata na Kalou, 3, 4. Sa ka vakalialia sara na matakau, a sa kaukauwa ka vuku sara na Kalou, 5-13.

¹ SA cuva sobu ko Peli, sa vakaroko ko Nipo; a kedrau matakau sa no e na daku ni manumanu, kei na daku ni karavau; sa vakavodoki tu na nomudoui kaukau, nai colacola bibi ki na manumanu sa oca.

² Erau sa vakaroko, erau sa cuva sobu vata; erau sa sega ni Vakabula rawa nai colacola bibi, a rau sa vakabobulataki lako koi rau.

³ Dou vakarorogo mai vei au, na mataqali i Jekope, kei kemudou kece na vo ni mataqali nei Isireli; e kemudou sa keveti voli mai na kete, ka roqoti voli mai na sucu:

⁴ ia kaʼu sai koyakoya tikoga ka yacova na gauna dou na qase kina; kaʼu na keveti kemudou mo dou sa sika mada ga: kaʼu a cakava, ia kaʼu na ia tikoga na veikeveti, kei na veiroqoti, kei na veivakabulai.

⁵ Dou na vakatautauvatataki au, ka vakarauvatani au, ka vakatauvatani au kei cei, me keirau tautauvata?

⁶ Era sa sova loa na koula mai na taga, ka vakarauta na siliva e nai vakatovotovo; era sa volia e dua na matai ni koula, a sa cakava me kalou: era sa cuva sobu, io, era sa sorova:

⁷ efa sa laveta ki domodra, era sa colata voli; era sa viritura e na kenai tutu, a sa tu ga; ena sega ni lako tani mai na kenai tutu: io, e dua sa kacivi koya, ka sa sega ni rogo mai; se vakabulai koya mai na nona rarawa.

⁸ Dou vakananuma na ka o qo, kai valavala vakatagane; dou vakasara ki na lomamudou, oi kemudou na dauvuki tani.

⁹ Dou vakananuma na ka makawa eliu: ni sai au na Kalou, ka sa sega e dua tale: sai au na Kalou, ka sa sega e dua me keirau tautauvata kaya,

¹⁰ kaʼu sa dautukuna na kenai vakataotioti mai na kenai vakatekivu, ia mai na gauna eliu na ka sa sega ni caka; kaʼu a kaya, Na noqu lewa ena tu ga; ia na ka kece kaʼu sa vinakata kaʼu na cakava ga:

¹¹ kaʼu sa kaciva na ikeli mai na tu i cake, ia mai na vanua vakayawa na tamata kaʼu sa lesia: kaʼu sa cavuta, kaʼu na vakayacora talega: kaʼu sa bukia, kaʼu na cakava talega.

¹² Dou vakarorogo vei au, oi kemudou sa yalokaukauwa, ka veiyawaki kei na cakacaka dodonu:

¹³ au sa kauta voleka mai na noqu cakacaka dodonu, ena sega ni yawa; kei na veivakabulai kaʼu sa ia, ena sega ni berabera; ia kaʼu na tauca na bula mai Saioni vei ira na Isireli na noqui ukuuku.