Aisea 45 - AI VOLA TABU

A Kalou, ni sa lomani ira na nona tamata, sa kacivi Koresi, a sa vakayacora na cakacaka sa lesi koya kina, 1-19. Era na vakamalumalumutaki na lewe ni veivanua, me ra kila na Kaloa, me ra vakabulai, 20-25.

¹ SA vosa vakaoqo ko Jiova vua sa lumuta ko koya, vei Koresi, sa ligana i matau kaʼu sa taura, meʼu buturaka na veimatanitu e matana; nai vau ni tolodra na tui kaʼu na sereka; meʼu dolava e matana nai sogo sa drua, ia na matamata-ni-koro ena sega ni sogo;

² Au na liutaki iko, ka vakalogaloga-vinakataka na yasana sukusukura; na katuba parasa kaʼu na basuka, ka tamusuka na kenai vakadei aironi:

³ kaʼu na solia vei iko na ka sa kumuni tu e na butobuto, kei nai yau vuni sa no e na yasana tabogo; mo kila kina ni sai au, ko Jiova, e sa kacivi iko e na yacamu, kaʼu sa Kalou nei Isireli.

⁴ E na vuku i Jekope na noqu tamata, kei Isireli kaʼu sa digitaka, kaʼu sa kacivi iko kina e na yacamu; o sa sega ni kilai au, ia kaʼu sa cavuta na yacamu.

⁵ Oi au ko Jiova, ka sa sega e dua tani, sa sega tale na Kalou, sai au ga: o a sega ni kilai au, ia kaʼu sa vauci iko:

⁶ me ra kila kina mai nai cadracadra ni siga kei na kenai dromudromu, ni sa sega e dua tani, sai au ga. Oi au ko Jiova, ka sa sega e dua tale:

⁷ au sa cakava na rarama, ka vakatubura na butobuto; au sa vakayacora na sautu, ka vakatubura na ca. Oi au ko Jiova kaʼu sa cakava na ka kecega o qo.

⁸ Dou vakatauca mai cake, na lomalagi; ia na o, me sovaraka na cakacaka dodonu: me dalaga ko vuravura, me tubura mai na bula kei na cakacaka dodonu, me sa tubu vata ga. Oi au ko Jiova, kaʼu sa cakava.

⁹ Ena ca ko koya sa veileti kei Koya ka Buli koya! nai caca ni bilo sa tiko kei nai caca ni bilo ni qele! Me kaya li na tete vua sa tulia, A cava ko sa cakava? se na nomu cakacaka, Sa yali na ligana?

¹⁰ Ena ca ko koya sa kaya vei tamana, A cava ko sa vakasikava? se vua na alewa, A cava ko sa vakasucuma?

¹¹ Sa vosa vakaoqo ko Jiova, na Yalosavasava nei Isireli, o koya ka Buli koya, Dou na taroga li vei au na ka ena yaco? e na vukudra na luvequ, kei na vuku ni cakacaka ni ligaqu, dou na vakarota li vei au?

¹² Au a cakavi vuravura, kei na tamata e delana kaʼu a bulia; oi au, io na ligaqu ga, sa tevuka na lomalagi, na kenai vavakoso kecega kaʼu sa vakarota.

¹³ Oi au kaʼu a vakauqeti koya e na yalododonu, na nona sala kecega kaʼu na vakadodonutaka; sai koya ga ena tara na noqu koro, ia ko ira na noqu era sa bobula ena vakatala ki nodra ko koya, ka sega me dua kina na kedrai sere sei voli, sa kaya ko Jiova ni lewe vuqa.

¹⁴ Sa vosa vakaoqo ko Jiova, Nai yau kei Ijipita, kei na veivoli kei Kusi kei ira na kai Sipa, era tamata lelevu, ena yaco mai vei iko, ia ena nomu ga: era na muri iko; era na lako voli mai ni ra vesuki tu; era na cuva vei iko, era na masu vei iko, ka kaya, Sa tiko ga vei iko na Kalou; a sa sega e dua tani, sa sega tale na Kalou.

¹⁵ E dina ko sa Kalou sa tabonaki iko, Kalou i Isireli, nai Vakabula.

¹⁶ Era na madua, era na taqaya vata kece talega: era na lako tani, ka taqaya vata era sa matai ni matakau.

¹⁷ Ia ko ira na Isireli ni ra tiko kei Jiova ora na vakabulai e na bula tawa mudu: dou na sega ni madua se taqaya ka yacova na gauna tawa mudu.

¹⁸ Ni sa vosa vakaoqo ko Jiova, o koya ka bulia na lomalagi; na Kalou, o koya ka bulia na vuravura ka cakava; sa vakataudeitaka ko koya, a sa sega ni cakava me lala, sa bulia ga me tawa: Oi au ko Jiova; a sa sega e dua tale:

¹⁹ sa sega ni kaʼu vosa vuni, e na dua na tikina butobuto e vuravura: kaʼu a sega ni kaya ki na kawa i Jekope, Sa tawa yaga na nomudou qaravi au: oi au ko Jiova kaʼu sa vosa dina, kaʼu sa tukuna na ka dodonu.

²⁰ Dou soqoni vata ka lako mai; dou toro voleka vata mai, oi kemudou na lewe ni veivanua sa dro bula: sa sega na nodra vuku era sa cola kau, na nodra matakau ceuceu, ka ra sa masu ki na kalou sa sega ni vakabulai ira rawa.

²¹ Dou tukuni kemudou, ka vakayacora mai; io, me ra bose vata ga: o cei ka vakarogotaka makawa na ka o qo? o cei ka tukuna e na gauna eliu? Sai au ko Jiova, se segai? a sa sega e dua tale na Kalou, sai au ga; na Kalou yalododonu kei nai Vakabula; sa sega e dua tani tale, koi au ga,

²² Dou golevi au mai, mo dou vakabulai, nai yalayala kecega kei vuravura: ni sai au na Kalou, a sa sega e dua tani tale.

²³ Au a cavuti au niʼu sa vavakini; sa lako yani mai na gusuqu daudina na vosa, ia ena sega ni lesu mai, Ena tekiduru vei au na duru vakaaduaga, ena vakatusai au na yame kecega.

²⁴ Ena kaya na tamata, Sai Jiova ga kaʼu sa donu ka kaukauwa kina; vei Koya ga era na lako mai kina na tamata; ia ko ira kecega era sa cudru vua era na madua.

²⁵ E na vuku i Jiova era na vakadonui, ka lagilagi kina, ko ira kecega na kawa i Isireli.