Aisea 44 - AI VOLA TABU

A Kalou, sa vakacegui ira nai vavakoso lewe ni soro e na nona vosa ni yalayala, 1-5. Sa ka tawa yaga sara na matakau, a ra sa tamata lialia era sa taya ka sorova, 6-20. Sa vakaroti ira me ia na vakavinavinaka vua na Kalou, ni sa vakabulai ira vakaukauwa, 21-28.

¹ IA o qo mo vakarorogo, Jekope na noqu tamata; ia ko iko, Isireli, kaʼu sa digitaka:

² sa vosa vakaoqo ko Jiova ka cakavi iko, ka buli iko mai na kete, ena vukei iko ko koya; Mo kakua ni rere, Jekope na noqu tamata; o iko Yisuruni, kaʼu sa digitaka.

³ Niu na sovaraka na wai vua sa viagunu, kei na wai drodro ki na qele mamaca: au na sovaraka na Yaloqu ki na nomu kawa, kei na noqu ka e veivakalougatataki kivei ira sa tubu maivei iko:

⁴ a ra na tubu me vaka e na loma ni veico, me vaka na vei wilou e na bati ni wai drodro.

⁵ Ena kaya e dua, Oi au na nei Jiova: e dua tale ena vakatokai koya e na yaca i Jekope; e dua tani tale ena vola e na ligana, A nei Jiova, ka vakatokai koya e na yaca i Isireli.

⁶ Sa vosa vakaoqo ko Jiova na nodra tui na Isireli, kei na nodrai Vakabula ko Jiova ni lewe vuqa: Oi au na kenai liuliu, oi au na kenai murimuri talega; ka sa sega tale na Kalou, sai au ga.

⁷ Ia ko cei me na kaciva, ka tukuna, ka tusanaka mai na ka ena yaco me vakataki au mai na gauna kaʼu a vakatikori ira kina na tamata eliu? ia na ka sa bera ni yaco, kei na ka ena yaco maimuri, me ra tukuna mai.

⁸ Dou kakua ni domobula, se taqaya: au a sega beka ni daurogorogo mai vei iko mai na gauna ko ya, ka dautukutuku? sai kemudou beka ga ena tukuni au? Se sa dua tale na Kalou, se koi au ga? io, sa sega tale na Uluvatu; sa sega kaʼu kila.

⁹ O ira era cakava na matakau ceuceu era sa ka wale kecega; sa sega ni yaga na nodra ka daudomoni; era sa tukuni ira vakai ira; era sa sega ni rai, se kila rawa, me ra madua kina.

¹⁰ O cei sa cakava na kalou, ka bulia na matakau sa tawa yaga e na dua na ka?

¹¹ Raica, na kenai tokani era na madua kecega; o ira na matai, era sa tamata ga: mc ra soqoni vata kecega, me ra tu cake; era na rere, era na madua vata ga.

¹² A matai ni aironi sa cakava e dua na matau, a sa cakacaka e na qilaiso, a sa tulia e nai tukituki, a sa qai kitaka e na ligana kaukauwa; io, sa viakana mai, a sa yali vua na kaukauwa; sa sega ni gunuva na mena wai, a sa malumalumu mai.

¹³ A matai ni kau sa dreta na nona wa; sa vola e nai ceu; sa qai kitaka e nai veleko, a sa vola o nai vakarau me momokiti, a sa cakava me ucuya na tamata, me matavinaka vakatamata; me tu ga e na vale.

¹⁴ Sa ta-vakabalea na sitari me nona, a sa kauta na nokonoko kei na oki, e sa vakaukauwataka me nona mai na kau ni veikau: sa tea e dua na paini, ia na uca sa vakatubura:

¹⁵ ena qai yaga ki na tamata me buka; a sa kauta mai e so, a sa tatalai kina: io, sa visa, a sa vavia na madrai; io, sa cakava na kalou, a sa rokova; sa cakava me matakau ceuceu, a sa cuva kina.

¹⁶ E dua na tikina sa vakama e na buka; e na dua na tikina sa kania na lewe ni manumanu; sa tavuna na kena, a sa mamau; sa tatalai talega, a sa kaya, Io, kaʼu sa katakata, kaʼu sa kunea na buka:

¹⁷ ia na tikina sa vo sa cakava ko koya me kalou, me nona matakau ceuceu: sa cuva sobu kina, a sa sorova, ka masuta, a sa kaya, Mo vakabulai au, ni sai iko na noqu kalou.

¹⁸ Era sa sega ni kunea, era sa sega talega ni kila: ni sa boroi na matadra, me ra sega ni kunea; kei na lomadra, me ra sega ni kila.

¹⁹ A sa sega e dua sa vakasara ki lomana, a sa sega ni vuku se yalomatua me kaya; E dua na tikina kaʼu sa vakama e na buka; kaʼu sa vavia talega na madrai e na kena qilaiso; kaʼu a tavuna na lewe ni manumanu, ka kania: meʼu sa qai cakava li na kena vo me ka vakasisila? meʼu cuva sobu li ki na dulumi ni kau?

²⁰ Sa kana dravu ko koya; sa vakaisini na lomana, ka sa saumaki koya tani, a sa sega ni vakabulai koya rawa, se kaya, Sa sega li e dua na ka lasu e na ligaqu i matau?

²¹ Mo nanuma na ka o qo, Jekope kei Isireli, ni ko sa noqu tamata; kaʼu a buli iko, sai iko na noqu tamata; i Isireli, kaʼu na sega ni guilecavi iko.

²² Au sa vakaseavutaka na nomu talaidredre me vaka na o, kei na nomui valavala ca me vaka na o loaloa; mo lesu mai vei au, niʼu a voli iko.

²³ Mo ia na meke, na lomalagi; ni sa vakayacora ga ko Jiova; dou kaikaila, na yasana vakavuravura era; dou lagata mai na meke, na veiulu-ni-vanua, na veikau, kei na kau yadua sa tu kina: ni sa voli Jekope ko Jiova, a sa vakarokorokotaki koya e na vuku i Isireli.

²⁴ Sa vosa vakaoqo ko Jiova, na nomui Vakabula, kei koya ka buli iko mai na kete; Oi au ko Jiova kaʼu a cakava na ka kecega, ka tevuka duaduaga na lomalagi, ka dedeka vakai au ga na vuravura:

²⁵ kaʼu sa vakatawayagataka na nodra ka mana na daulasu wale, kaʼu sa vakalialiai ira na rairai, ka vakalesui ira kimuri na vuku, ka vukica na nodra vuku me lialia:

²⁶ kaʼu sa vakadinadinataka na nona vosa na noqu tamata; ka vakayacora na nodrai vakavuvuli na noqui talatala; kaʼu sa kaya vei Jerusalemi, O na tawa; ki na veikoro talega ni Juta, Dou na tara; ia na kena tikina sa ca kaʼu na vakaduria:

²⁷ kaʼu sa kaya ki na wasawasa, Mo di mai, ia kaʼu na vakadiva na nomu veiuciwai:

²⁸ kaʼu sa kaya vei Koresi, Sai koya na noqui vakatawa, ia na ka kece kaʼu sa vinakata ena vakayacora ga ko koya, io ena kaya vei Jerusalemi, O na tara; ki na vale tabu talega, O na tauyavutaki.