Aisea 43 - AI VOLA TABU

A Turaga, sa vakacegui ira na nona tamata e na nona rosa ni yalayala, 1-7. Ni ra sa kunea na nona kaukamea kei na nona loloma eliu, sa dodonu me ra tukuni koya, 8-13. Sa qai vakatakila rei ira ni na vakarusai Papiloni, ka vakabulai ira, 14-21. Sa vunauci ira e na vuku ni nodra vakatitiqa, 22-28.

¹ IA o qo sa qai vaka ko Jiova, o koya ka cakavi iko, Jekope, ka buli iko, Isireli: Kakua ni ko rere; niʼu a voli iko, au a kacivi iko e na yacamu; o sa noqu.

² Ni ko sa lako e loma ni wai, kaʼu na tiko kei iko; kei na loma ni veiuciwai, ena sega ni dromuci iko: ni ko sa lako e loma ni buka, ena sega ni kati iko; ena sega talega ni vakamai iko na yameyame ni buka.

³ Ni sai au ko Jiova, na nomu Kalou, na Yalosavasava nei Isireli, na nomui Vakabula, kaʼu a soli Ijipita me kemui voli, o Kusi kei Sipa e na vukumu.

⁴ E na vuku ni ko sa talei e mataqu, ko sa vakarokorokotaki kina, kaʼu a lomani iko: ia kaʼu na soli ira na tamata me kemui sere, kei na veimatanitu mei voli ni nomu bula.

⁵ Kakua ni ko rere, niʼu sa tiko kei iko: au na kauti ira mai cake na nomu kawa, mai ra talega kaʼu na vakasoqoni ira mai na kai nomu:

⁶ kaʼu na kaya ki na mata ni tokalau, Mo vakatalai ira mai; ki na mata ni ceva talega, Kakua ni ko bureitaki ira; me ra lako mai na vanua vakayawa ko ira na luvequ atagane, kei ira na luvequ alewa mai nai yalayala kei vuravura;

⁷ ko ira yadua era sa vakatokai e na yacaqu; ia kaʼu a cakavi ira meʼu vakarokorokotaki kina; kaʼu a buli ira; io, kaʼu a cakavi ira.

⁸ Dou kauti ira mai na tamata mataboko, era sa vakamatana; kei ira na didivara, era sa vakadaligana:

⁹ me ra soqoni vata na veimatanitu kecega, ia me ra vakasoqoni mai na veimataqali: o cei vei ira me na tukuna rawa na ka o qo, ka vakarogotaka mai vei keda na ka eliu? me ra kauti ira mai na nodra tamata dautukutuku, me ra vakadonui kina: se me ra rogoca, ka vakadinadina kina.

¹⁰ Sa kaya ko Jiova, Sai kemudou na noqu tamata dautukutuku, ia na noqu tamata kaʼu sa digitaka: mo dou sa kunea ka vakadinati au, ka kila ni sai au ko Koya: sa sega na kalou sa caka eliu ka muri koi au, ena sega talega me na taravi au.

¹¹ Oi au, oi au ga ko Jiova; ka sa sega tale nai Vakabula, sai au ga.

¹² Oi au kaʼu a tukutuku, ka veivakabulai, ka rogorogo, ni sa sega vei kemudou na kalou tani: ia sai kemudou ga ena tukuni au niʼu sa Kalou, sa kaya ko Jiova.

¹³ Io, mai nai matai ni siga, sai au o qo; a sa sega sa Vakabula rawa e dua mai na ligaqu; au na cakacaka tiko, ia ko cei me na vakadaroya?

¹⁴ Sa vosa vakaoqo ko Jiova, na nomudoui Vakabula, na Yalosavasava nei Isireli; E na vukumudou kaʼu a talaki ki Papiloni, ka vakacuvai ira kece sara ga era sa dro; kei ira na kai Kalitea, era daukaila e na waqa.

¹⁵ Oi au ko Jiova, na nomudou Kalou Yalosavasava, o koya ka Buli ira na Isireli, kaʼu sa nomudou Tui.

¹⁶ Sa vosa vakaoqo ko Jiova, o koya sa cakava na sala e na Wasawasa, kei na salatu e na wai kaukauwa;

¹⁷ o koya sa kauta mai na vale-vodoki kei na ose, nai valu kei na qaqa; era na koto sobu vata, era na sega ni tu cake tale; era sa suibokoci, era sa bokoci me vaka na wa ni cina.

¹⁸ Dou kakua ni vakananuma na ka makawa, se vakasama na ka eliu:

¹⁹ raica, kaʼu na cakava na ka vou; ena tubu malua mai; dou na kila, se segai? io, kaʼu na cakava na sala mai na lekutu, kei na wai drodro e na talasiga:

²⁰ ena vakarokoroko vei au na manumanu kila, kei na gata lelevu kei na ositereji: e na vuku niʼu sa solia na wai mai na lekutu, kei na uciwai mai na talasiga, meʼu vagunuvi ira na noqu tamata, kaʼu a digitaka.

²¹ O ira na tamata o qo kaʼu sa cakava me noqu; era na tukuna na noqu vinaka sara.

²² Ia ko a tawa masuti au, Jekope; ko sa oca ni qaravi au, Isireli.

²³ O sa tawa kauta mai vei au na sipi me nomui soro kama; o sa sega talega ni vakarokorokotaki au e na nomui madrali. Au a sega ni lavaka vei iko me ia nai cabacobo, seʼu vakaocataki iko e na cakai madrali boi vinaka.

²⁴ O sa sega ni volia na noqu kalamo e nai lavo, o sa sega talega ni vakamamautaki au e na uro ni nomui soro: ia ko sa bitaki au ga e na nomui valavala ca, ka vakaocataki au e na nomu caka cala.

²⁵ Oi au, io koi au o qo, kaʼu sa bokoca e na vukuqu na nomu talaidredre, kaʼu na sega ni nanuma ki na nomui valavala ca.

²⁶ Mo vakananumi au: me daru ia na veilewai; mo tukuni iko mai, mo vakadonui kina.

²⁷ Sai valavala ca na tamamu ka liu, o ira talega na nomui vakavuvuli era sa talaidredre vei au:

²⁸ o koya o qo kaʼu sa vakacacani ira kina na turaga tabu, ka soli ira na Jekope me cudruvi, kei ira na Isireli me vakarogocataki.