Aisea 35 - AI VOLA TABU

Ena ka bulabula tara na matanitu ni Mesaia, 1, 2. Era sa vakaukauwataki na yalolailai e na vuku ni ka vinaka sa yalataki vei ira era vakabauti koya nai Vakabula, 3-10.

¹ ENA reki e na vuku ni ka o qo na lekutu kei na vanua dravuisiga; ia na veikau ena marau, ka se me vaka na rose.

² Ena se ka beta, ena reki talega, io, e na marau kei na meke: ena soli kina nai ukuuku vaka-Lipanoni, na matavinaka vaka-Karimeli ka vaka-Saroni: era na raica nai ukuuku i Jiova, na kena vinaka ni noda Kalou.

³ Dou vakaukauwataka na liga e malumalumu, ka vakataudeitaka na duru sa yavala.

⁴ Dou kaya vei ira era yalolailai, Dou kaukauwa, dou kakua ni rere: raica na nomudou Kalou; ena yaco mai na veisaumi, na veisaumi e sa ia na Kalou; ena lako mai ko koya ka vakabulai kemudou.

⁵ Ena qai rai na matadra na mataboko, ka rogo na daligadra na didivara.

⁶ Ena qai ladelade na lokiloki me vaka na koti kila, ka mekemeke na yamedra na galu: ni na vure mai na wai mai na lekutu, kei na uciwai e na vanua dravuisiga.

⁷ Ia na nuku kata ena yaco me drano, kei na qele viagunu mei vurevure ni wai: na tikina ni wolifa, era daukoto kina, ena vanua veigasau ka veikuta.

⁸ Ia ena dua kina na sala cecere, kei na salatu: ena vakatokai Na sala tabu; ena sega ni lakova e dua na ka tawa savasava; ena lako vata ko Koya kei ira era sa muria na sala, ia ko ira na sesewa era na tawa lako sese kina.

⁹ Ena sega maikea e dua na laioni, se dua na manumanu kata me cabeta, se me kune kina: o ira ga era sa vakabulai era na lako tu kina.

¹⁰ Ia ko ira sa vakabula ko Jiova era na lesu mai, ka tadu mai ki Saioni ka meke tu, ia na reki tawa mudu ena tauca na uludra: ena vauci ira mai na reki kei na marau, ia na rarawa kei na tagi ena dro tani yani.