Aisea 34 - AI VOLA TABU

A ka ca sa lewai me yacova na veimatanitu sa veimecaki kei nai vavakoso lewe ni soro, era na vakarusai sara, 1-15. Ena yaco dina na ka sa tukuni, 16, 17.

¹ DOU toro mai, na lewe ni veimatanitu, me rogoca; ia dou vakarorogo, na veimataqali: me rogoca ko vuravura, kei na ka sa sinai kina; na veivanua, kei na ka kece sa tubu maikina.

² Ni sa cudru ko Jiova vei ira kecega na veimatanitu, a sa lesavi ira na nodra mataivalu kecega: sa lesi ira me ra rusa sara, sa soli ira me ra vakamatei.

³ Ena biuti kitautuba na nodra moku, ena kuvu cake na kena bona ni yagodra; ia na veiulu-ni-vanua ena waicala e na kedra dra.

⁴ Ena waicala yani na kalokalo kecega ni lomalagi, ka vivigi vata na lomalagi me vaka nai vola balavu: ena lutu mai na kalokalo kecega, me vaka sa mira mai na drau ni vaini, ka vaka sa qeqera mai na vua ni lolo.

⁵ Ni sa mateni mai lomalagi na noqui seleiwau; raica, ena tauci Itomi, kei ira na mataqali kaʼu sa lesia me rusa.

⁶ Sa mamau nai seleiwau i Jiova e na dra; sa boro e na uro, e na dra ni lami kei ni koti, e na uro ni ivi ni sipi atagane: ni sa dua nai madrali nei Jiova mai Posira, kei na veivakamatei levu mai na vanua ko Itomi.

⁷ Ia na yunikoni ena bale vata kei ira, kei na karavau sa sele kei na karavau atagane; ena to na nodra vanua e na dra, ka uro mai na nodra kuvu-ni-soso e na uro.

⁸ Ni sa kena siga sa saumi koya kina ko Jiova, na yabaki ni veisaumi e na vuku i Saioni.

⁹ Ia na kena uciwai ko Itomi ena vuki me makadre, kei na kena kuvu-ni-soso me sulifure, ia ena yaco me makadre waqa na kena qele.

¹⁰ Ena sega ni bokoci e na siga se na bogi; ena kuvu cake ka tawa mudu na kena kubou: ena lekutu tu e na veitabamata kecega; ena sega ni lako voli kina e dua e na dua na gauna.

¹¹ Ena qai kenai taukei na pelikani kei na belo; ena tiko kina na lulu kei na reveni: ena dreta e delana ko koya na dali i vakarau ni veivakarusai, kei na vatu i vakarau ni veivakalalataki.

¹² A kena turaga era na kacivi mai ki na matanitu, ka sa sega kina; a ra sa yali kecega na nona gone vakaturaga.

¹³ Ena tubu e na nona vale vakaturaga na wa vakavotona; na salato kei na soni e na nona koro kaukauwa: ena nodrai tikotiko na wolifa, kei na nodra rara na ositereji.

¹⁴ Ena sota kina na manumanu ni lekutu kei na koli kila; ena kaciva na kenai sa na koti kila; ena tiko talega maikea na lulu, ka kunea na nonai vakavakacegu.

¹⁵ Ena cakava maikea na nonai sova na lulu levu, ka vakasucu, ka saulaka, ka ovica; ena soqoni talega maikea na vulituri, yadua kei na kenai sa.

¹⁶ Dou qara e nai vola i Jiova, ka wilika: ena sega ni yali e dua vei ira o qo; ena sega e dua me yali na kenai sa: ni sa gusuqu sa vakarota, ia na Yalona sa vakasoqoni ira mai.

¹⁷ A sa ia na veidigidigi vei ira ko koya, a sa vota vei ira e na ligana e na dali i vakarau: era na taukena ka tawa mudu, era na tiko kina mai nai tabatamata ka yacova nai tabatamata.