Aisea 32 - AI VOLA TABU

A ka vinaka ni matanitu ni Mesaia, 1-8. Sa vakatakilai na ka ca me liu, me qai yaco emuri na sautu, 9-20.

¹ RAICA, ena buli e dua na tui me ia na lewa dodonu, o ira talega na turaga era na lewa vakadodonu.

² Ia ena dua na tamata ena vaka nai vunivuni mai na cagi, kei nai vakaruru mai na cava; ena vaka na uciwai e na vanua dravuisiga, ka vaka na yaloyalo ni vatu levu e na vanua dauveiva-kaocataki.

³ A matadra era rai rawa ena sega ni buawa, kei na daligadra era rogo rawa ena vakarorogo:

⁴ a lomadra talega na yaloriri ena kila mai na vuku, ka vosa rawarawa ka macala na yamedra na daukaka.

⁵ O koya sa lialia ena sega ni vakatokai tiko me yalovakaturaga, se tukuni me lomasoli ko koya sa kocokoco.

⁶ Ia ko koya sa lialia ena vosataka ga na ka sesewa, ka caka ca tiko e lomana, me ia na veivakaisini, ka vosa cala vei Jiova, me vakalalataka na yalo i koya sa viakana, ka vakayalia na wai mei koya e sa viagunu.

⁷ Ia na nonai yaya ua daukocokoco na ka ca; sa vakananuma na vere ca me vereti ira kina era sa rarawa.

⁸ Ia ko koya sa lomasoli sa vakananuma na cakacaka loloma, ia e na cakacaka loloma ena dei ga kina ko koya.

⁹ Oi kemudou na alewa sa dautiko wale, dou tu cake, rogoca na domoqu; oi kemudou na gonealewa tawa rere, dou vakatu daliga ki na noqu vosa.

¹⁰ Ena bogi vuqa sa a dou na sautaninini kina, oi kemudou na alewa tawa rere: ni na yali na vua ni vaini, ena tawa yaco na vula i matua.

¹¹ Dou taqaya, na alewa dautiko wale; dou kidroa, oi kemudou na tawa rere: dou luvata tani sara na nomudoui sulu, ka vauca nai sulu ca ki na tolomudou,

¹² ka yavita na lomaseremudou e na vuku ni sa ca mai na veiwere vinaka, kei na vaini bulabula.

¹³ E na nodra vanua na noqu tamata ena tubu ga na kau vakavotona kei na soni; io, e na dela ni veivale daumamarau kecega ni koro daureki:

¹⁴ ni sa biu laivi na vale vakaturaga; ka lala mai na koro ka tawa; na koro vatu kei na veivale-cecere sa qai yaco me qara wale tu e tawa oti, me yasana era rekitaka na asa kila, ka kedra vanua na sipi;

¹⁵ me sa sovaraki mada vei keda na Yalo mai cake, ka yaco na veikau me were bulabula, ka okati na were bulabula me veikau.

¹⁶ Ena qai tiko mai na veikau na lewa dodonu, ka tikora na were bulabula nai valavala dodonu.

¹⁷ Ia mai na cakacaka dodonu ena tubu na sautu, ena vuana talega na cakacaka dodonu na vakacegu kei na tiko dei me tawa mudu.

¹⁸ Ia ko ira na noqu tamata era na tiko ga e nai tikotiko sautu, kei na veivale dei, kei nai vakavakacegu vinaka.

¹⁹ Ia ena tau mai na uca-cevata ki na veikau, me bale ga; na koro talega ena lolovira koto e na yasana lolovira.

²⁰ Sa kalougata koi kemudou sa ia na kabukaburaka e na bati ni wai kecega, e kemudou sa vakatala yani kina na yavadrau na karavau kei na asa.