Aisea 31 - AI VOLA TABU

Sa tukuna na nodra lialia ni ra vakararavi ki Ijipita, ka biuti koya na Kalou, 1-5. Sa rotaka na veivutuni, a sa vakatakila na kena ca ko Asiria, 6-9.

¹ ENA ca ko ira era sa lako sobu ki Ijipita me qara nai vukevuke; ka vakabauta na ose, ka vakararavi ki na vale-vodoki, ni sa vuqa; kei nai valu e dauvodo e na ose, ni ra sa kaukauwa sara; a ra sa sega ni golevi Koya na Yalosavasava nei Isireli, a ra sa sega ni qaravi Jiova!

² Ia ka sa vuku ko Koya talega, ena vakayacora na ca ko koya, ena sega ni biuta na nona vosa; ia ena tu cake vakaivalu ko koya ki na mataqali valavala ca, kei na nodrai vukevuke na daucaka cala.

³ Ia na kai Ijipita era sa tamata ga, ka sega ni Kalou; a nodra ose talega sa vakayago, ka sega ni vakayalo. Ni sa qai dodoka yani na ligana ko Jiova, ena qai toqi nai vukevuke, ka bale ko koya sa vukei, a ra na rusa vata kecega.

⁴ Ni sa vosa vakaoqo vei au ko Jiova, me vaka na laioni, io na laioni cauravou sa kudruva na kena e taura, ni sa kailataki mai nai vakatawa e vuqa me mai vala kaya, sa sega ni rerevaka na domodra, se vakamalumalumu e na vuku ni nodra kaila: ena lako sobu vakakina ko Jiova ni lewe vuqa me mai valu e na vuku ni ulu-ni-vanua ko Saioni, kei na kena ulu-ni-koro.

⁵ Me vaka era ovica na luvedra na manumanu, ena vakarurugi Jerusalemi vakakina ko Jiova ni lewe vuqa; ni sa vakaruruga, ena vakabula; ni sa lako voli mai, ena maroroya.

⁶ Dou lesu mai vei koya era sa vuki tani vakalevu kina na luve i Isireli.

⁷ Ni ra na dui biuta na tamata yadua e na siga ko ya na nona matakau siliva, kei na nona matakau koula, na ka ca ka caka e na ligamudou me nomudou.

⁸ Ena qai bale ko Asiria ka sega e na nonai seleiwau e dua na qaqa; ena kani koya nai seleiwau ka sega ni nona e dua na tamata; ena dro tani ga ko koya mai na mata ni seleiwau, ia ko ira na nona cauravou era na waicala.

⁹ A nona koro kaukauwa talega ena biuta kimuri ko koya ni sa rere; a kena turaga era na rerevaka na drotini, sa kaya ko Jiova, o koya sa waqa tu mai Saioni na nona buka, kei na nona lovo mai Jerusalemi.