Aisea 28 - AI VOLA TABU

Ena ca ko ira na Ifireimi e na vuku ni nodra viavialevu kei na nodra daumateni, 1-4. O ira na nona tamata sa vo era na tiko vinaka e na matanitu ni Mesaia, 5, 6. Era sa vunauci e na vuku ni nodrai valavala vakatani, 7-13. Kevaka era sa vakabauti Karisito, na yavu dina, era na bula, kevaka e segai, era na cudruvi ga, 14-22. Sa vuku sara na lewa ni Kalou, 23-29.

¹ ENA ca na nodrai sala lagilagi na daumateni nei Ifireimi, kei na se-ni-kau malai, na nona ka ni ukuuku, e sa vakaisala kina na ulu ni nodra buca bulabula era sa yaviti e na waini!

² Raica, sa lewe dua vei Jiova ka qaqa ka kaukauwa, ka vaka na uca-cevata e tau bi, kei na cava e veivakarusai, ka vaka na waluvu kaukauwa e vuabale, sai koya ena biuta ki na qele e na ligana.

³ Ena buturaki e na yavana na nodrai sala lagilagi na daurua-teni nei Ifireimi.

⁴ Ia na se-ni-kau malai, na nona ka ni ukuuku, o qori e sa vakaisala kina na ulu ni buca bulabula, ena vaka e dua na lolo taumada ni sa bera na vula i lolo, a ya kevaka e dua sa kunea dina, ni sa taura tu e ligana sa tiloma sara.

⁵ E na siga ko ya ena yaco ko Jiova ni lewe vuqa mei sala vakaiukuuku, kei nai sala talei vei ira na nona tamata sa vo,

⁶ kei na Yalo ni lewa vua sa tiko me lewa, kei na nodra kaukauwa era sa vakasava tani nai valu ki na matamata-ni-koro.

⁷ Io ko ira talega o qo era sa vakacalai e na waini, ka vakasesei e na yaqona: oi rau na bete kei na parofita, erau sa vakacalai e na yaqona; sa rawai rau na waini; erau sa vakasesei e na yaqona; erau sa cala e na raivotu, erau sa yatayata e na lewa.

⁸ Ni sa sinai e na lua kei na duka nai kanakana kecega, sa sega na tikina e vo.

⁹ Me vakavulici cei ko koya me vuku? se me vakavukui cei me kila nai rogo? o ira sa qai kali mai na wai-ni-sucu, ka kauti tani mai na sucu i tinadra.

¹⁰ Ni sa daukuri na vunau e na vunau, na vunau e na vunau; na vosa e na vosa, na vosa e na vosa; vakalailai eke, vakalailai maikea.

¹¹ Ia e na tebenigusu kaka kei na vosa ni tani ena vosa kina ko koya vei ira na tamata o qo.

¹² O ira o qo ka kaya kina ko koya, O qo nai vakavakacegu; dou vakacegui ira sa oca; ia o qo na ka veivakacegui: a ra sa bese ni rogoca.

¹³ Ia na vosa i Jiova ena vaka dina vei ira na vunau sa kuri e na vunau, na vunau e na vunau; na vosa e na vosa, na vosa e na vosa; vakalailai eke, vakalailai maikea; me ra laʼki bale kimuri, ka mavoa, ka coriti, ka tauri.

¹⁴ O koya o qo dou rogoca kina na vosa i Jiova, oi kemudou na dauveivakalialiai, sa lewai ira na tamata o qo mai Jerusalemi.

¹⁵ E na vuku ni dou a kaya, Keitou a veiyalayalati kei mate, ka veisorovi kei etesi; ni sa lako voli mai na ca sa vuabale, ena tawa yacovi keitou; ni keitou sa cakava na lasu me neitoui vakaruru, ka vuni keitou e nai lawaki.

¹⁶ 0 koya o qo sa vaka kina na Turaga ko Jiova, Raica, au sa viritaka mai Saioni na vatu ni yavu, na vatu sa vakatovolei, na vatu ni tutu-ni-vale sa talei, na yavu sa dei sara; o koya sa vakabauta ena sega ni taqaya.

¹⁷ Ia kaʼu na tauca na lewa dodonu me dali i vakarau, kei na cakacaka dodonu me vatu i vakarau; ia na uca-cevata ena taviraka tani nai vakaruru lasu; kei nai vunivuni, ena luvuci e na wai.

¹⁸ Ia na nomudou veiyalayalati kei mate ena vakatawayagataki, kei na nomudou veisorovi kei etesi ena sega ni dei; ni sa qai lako voli mai na ca sa vuabale, dou na qai butuki kina.

¹⁹ Ni sa qai lako voli mai, ena kauti kemudou tani; ni na lako voli ga mai e na veimataka, e na siga kei na bogi; ia ena ka rarawa me kila na kenai rogo walega.

²⁰ Ni sa leqa nai mocemoce vua sa via dodo tu kina, ka rabailailai nai tutuvi vua sa via solei koya kina.

²¹ Ni na tu cake ko Jiova me vaka mai na ulu-ni-vanua ko Perasimi, ena cudru ko koya me vaka e na buca i Kipioni, me kitaka na nona cakacaka, na nona cakacaka vakatani; ka vakayacora na nonai valavala, na nonai valavala vakatani.

²² Ia dou kakua mada ni veivakalialiai, de kaukauwa mai kina na kemudoui vesu; ni sa dua na veivakarusai e lesi kaʼu a rogoca mai vua na Turaga ko Jiova ni lewe vuqa, me tauci vuravura kecega.

²³ Dou vakatu daliga, ka rogoca na domoqu; vakadirorogo, ka rogoca na noqu vosa.

²⁴ Sa cuki were tiko beka ko koya sa daucuki me kaburaki kina? sa cukita ka logana tiko beka na nona were?

²⁵ Ni sa logana vakavinaka na delana, sa sega beka ni duibiubiuta kina na kumini loa, ka biuta voli na kumini dina, ka kaburaka vakayatuni na witi kei na pale e na tikina e vakarauni kina, kei na sila vuti e na bati ni were?

²⁶ Ia sa vakavulici koya vakadodonu kina na nona Kalou, ka sa vakavukui koya.

²⁷ Ni sa sega ni samuti na kumini loa e nai samu-yara, ka sega ni toqici na yava ni tolili e na kumini dina; ia sa samuti na kumini loa e nai ike, kei na kumini dina e nai titoko.

²⁸ Sa dau-butuqaqi na witi, ni na sega ni via samu-samuta tikoga, a sa toqica na nona tolili ki delana, ia e na yava ni nona ose sa sega ni via vurumemea kina.

²⁹ A ka talega o qo sa taka maivei Jiova ni lewe vuqa; o koya sa vakurabui na nona lewa, ka ka levu na nona vuku.