Aisea 24 - AI VOLA TABU

Sa cudruva na vanua ko Jiova e na vuku ni nodrai valavala ca, 1-12. O ira sa vo, era vakasevi ki na veivanua, era na vakavinavinaka vua, 13-16. Ni sa cudruva na vanua ko Jiova ena vakalevulevuya na nona matanitu, 17-23.

¹ RAICA, sa sovadiva na vanua ko Jiova, sa vakatobocutaka, a sa dui vakasevi ira era tiko kina.

² Ia ena yaco vua na bete, me vaka vei ira na tamata; vua na turaga, me vaka vua na nona tamata; vua na marama, me vaka vua na nona vada; vua sa volitaka, me vaka vua sa volia; vua sa sarava, me vaka vua sa kerea; vua sa tawa vakaivolitaki, me vaka vua sa tawa vakaivolitaka.

³ Ena sovadivi sara na vanua, ka vakacacani sara: ni sa cavuta na vosa o qo ko Jiova.

⁴ Sa tagi na vanua, sa malai yani; sa ceguoca ko vuravura, sa malai yani; o ira na kai vuravura era turaga, era sa ceguoca mai.

⁵ Sa vakadukadukalitaki talega ko vuravura e ruku ni lewena; ni ra sa talaidredre ki na vunau, era sa vakatanitaka nai lesilesi, era sa vakacataka na veiyalayalati tawa mudu.

⁶ O koya o qo sa kani vuravura kina na cudru, a ra sa vakacalai ko ira sa tiko kina; o koya o qo sa vakamai kina na lewe i vuravura, ka ra lewe lailai na tamata sa vo.

⁷ Sa tagi na waini vou, sa malumalumu na vaini, o ira na yalodaureki era sa vutugu.

⁸ Sa cegu ni marautaki na lali, sa oti na kedra rorogo na daumamarau, sa cegu ni rekitaki na api.

⁹ Ni ra meke era na sega ni ia vata kei na gunu waini; ena gaga na yaqona vei ira sa gunuva.

¹⁰ Sa basuki sobu na koro sa lala: sa sogo tu na vale kecega, me sega e curu kina.

¹¹ Sa tagici na waini e nai saqata ni koro; sa dromu na rereki kecega, sa yali na marau ni vanua.

¹² Sa vo ga na rusa e loma ni koro, a sa basubasuki sara na matamata-ni-koro.

¹³ Ia ena vakaoqo e loma i vuravura e na kedra maliwa na veimatanitu, ena vaka ni sa kurei na olive, ka vaka ni sa tomitomiki na vua ni vaini ni sa oti na vula i vaini.

¹⁴ Era na tabalaka na domodra, era na ia na meke e na vuku ni ka vakaturaga i Jiova, era na kaikaila mai waitui.

¹⁵ O koya o qo dou vakavinavinakataki Jiova kina mai cake, io na yaca i Jiova na Kalou nei Isireli, e na veiyanuyanu ni Wasawasa.

¹⁶ Mai nai yalayala kei vuravura eda sa rogoca na meke, io na vakavinavinaka vua na yalododonu. Ia kaʼu a kaya, Ule koi au, ule koi au, au sa ca! era butako na daubutako; io, era butako vakalevu ko ira na daubutako.

¹⁷ A rere, kei nai keli, kei nai cori, sa qai yacovi iko, na lewe ni vanua.

¹⁸ Ia ena yaco, o koya sa na dro mai na domo ni rere ena lutu ki nai keli; o koya talega sa cabe cake mai nai keli ena coriti e nai cori; ni sa tadola nai sogo kei lomalagi, a sa yavala na yavu kei vuravura.

¹⁹ Sa basubasuki ko vuravura; sa katela sara ko vuravura; sa vakayavalataki vakalevu ko vuravura.

²⁰ Sa yatayata ko vuravura me vaka na daumateni, a sa tautauwalili me vaka nai mocemoce lilili: ia sa bitaki koya na kena talaidredre; ena bale, ka sega ni tu cake tale.

²¹ Ia ena yaco e na siga ko ya, ena qai cudruva ko Jiova nai vavakoso cecere sa tiko e na tikina cecere, kei ira na tui kei vuravura e dela i vuravura.

²² A ra na vakasoqoni vata me vaka na bobula e nai keli, a ra na sogoti e na vale ni veivesu, ia ni sa oti na bogi e vuqa era na qai talevi.

²³ Ena qai taqaya na vula, ka madua na siga, ni na lewa ko Jiova ni lewe vuqa mai na ulu-ni-vanua ko Saioni, kei Jerusalemi, me vakarokorokotaki e na matadra na kena qase.