Aisea 21 - AI VOLA TABU

Ai colacola bibi me tauci ki Papiloni, 1-10; kei Itomi, 11, 12; kei Arapea, 13-17.

¹ AI colacola ni lekutu ni waitui. Me vaka sa lako sara mai na covulaca mai na ceva; sa lako vakakina na ca mai na lekutu, mai na vanua rerevaki.

² A raivotu rarawa sa vakavotuni mai vei au; sa butako na daubutako, a sa vakacaca na dauvakacaca. Mo lako cake, Elama; Mo laʼki kabata, Metia; a nona dauveivakararawataki kecega kaʼu sa muduka.

³ O koya sa yaluma kina na toloqu; sa tauvi au na rarawa, me vaka na yaluma vua na alewa sa taratara; niʼu sa rogoca, kaʼu sa sautaribariba kina; niʼu sa raica, kaʼu sa taqaya.

⁴ Sa sese na yaloqu, sa kidaci au na rere; a bogi ni noqu marau sa vukica ko koya meʼu rise kete kina.

⁵ Cokonaka nai kanakana, lesia nai vakatawa, kana, gunu: dou tu cake, na turaga, dou walia nai sasabai!

⁶ Ni sa vaka ko Jiova vei au, Mo laʼki lesia e dua nai vakatawa; na ka sa raica, me tukuna mai;

⁷ ni sa kunea ko koya e dua na mataivalu sa vodo tu e na ose, kei na asa, kei na kameli, ka yayarua lako; me qai vakadirorogo sara ko koya.

⁸ A sa kaci vakalaioni mai ko koya: Noqu turaga, kaʼu sa tu ga e na noqui tutu e na siga ka bogi, kaʼu sa vakatawa tu ga e na bogi ka siga:

⁹ ka, raica, sa lako mai o qo e dua na mataivalu sa vodo tu, ka yayarua lako. A sa vosa mai ko koya, ka kaya, Sa bale, sa bale, ko Papiloni; ia na matakau kece ni nona kalou sa basuraka sobu ki na qele ko koya.

¹⁰ Ule na noqu tamata ka dausamuti, kei na sila ni noqu rara ni sila! na ka kaʼu sa rogoca maivei Jiova ni lewe vuqa, na Kalou nei Isireli, kaʼu sa tukuna yani vei kemudou.

¹¹ AI colacola kei Tuma. Sa kaci mai vei au e dua mai Seira, ka kaya, Nai vakatawa, a cava nai rogo ni bogi? Nai vakatawa, a cava nai rogo ni bogi?

¹² Sa kaya mai nai vakatawa, Sa lako mai na mataka, kei na bogi talega: kevaka dou sa via taroga, dou taroga ga: dou lesu, mani lako tale mai.

¹³ AI colacola me tauci ki Arapea. Dou na vakabogi ga mai na veikau ni Arapea, oi kemudou nai vavakoso daulako ni Tetanimi.

¹⁴ O ira na lewe ni vanua ko Tema era sa kauta mai na wai me tavaki koya sa viagunu, era sa tarovi koya e na kena madrai o koya sa dro.

¹⁵ Ni ra sa dro mai na mata ni seleiwau, mai na mata ni seleiwau sa ucuni kei na dakai sa yavi tu, kei na mata ni valu kaukauwa.

¹⁶ Ni sa vosa vakaoqo vei au na Turaga, Me dua tale na yabaki, me vaka na yabaki ni tamata voli, ena qai oti sara nai ukuuku kecega ni Kitari:

¹⁷ ia na kedra vo ni dauvanavana, na qaqa ni Kitari, ena lewe lailai mai: ni sa cavuta ko Jiova na Kalou nei Isireli.