Aisea 20 - AI VOLA TABU

Sa vakatakarakarataki na nodra veivakabobulataki na kai Ijipita kei na kai Kusi.

¹ E NA yabaki sa lako mai kina ko Taritani ki Esitoti, (ni sa talai koya ko Sari-koni na tui Asiria,) ka sa vala ki Esitoti, ka rawa;

² io e na gauna ko ya sa vosa ko Jiova vei Isaia na luve i Amosi, ka kaya, Mo laʼki sereka tani nai sulu taqarotu mai na tolomu, ka luvata tani nai vava mai na yavamu. A sa kitaka ko koya, ka sa luvawale lako ka tawa vakaivava.

³ A sa kaya ko Jiova, Me vaka ni sa lako voli ko Isaia na noqui talatala ka luvawale ka tawa vakaivava e na yabaki e tolu, mei vakatakilakila kai vakatakarakara e na vuku i Ijipita kei Kusi;

⁴ ena vakakina ko tui Asiria, ena kauti ira na kai Ijipita era sa bobula, kei na kai Kusi era vulagi, na gone kei na qase, me luvawale ka tawa vakaivava, ka tawa vakaisulu na rubudra, na ka veivakamaduataki ki Ijipita.

⁵ A ra na rere, ka maduataki Kusi, o qori era a vakararavi kina, kei Ijipita, era a dokai ira kina.

⁶ Ia ko ira sa tiko e na tai o qo era na kaya e na siga ko ya, Raica, sa vakaoqo na ka eda a vakararavi kina, na ka eda a dro me vukei kina, me da vakabulai mai vua na tui Asiria: ia eda na bula vakaevei ko keda?