Aisea 18 - AI VOLA TABU

Ni sa lomani ira na nona tamata na Kalou ena vakarusai ira na nodra meca, 1-6. E na vuku ni ka o qo ena tubu kina na lotu, 7.

¹ ULE na vanua sa vakatabana rorogo, sa koto yani e na tai kadua ni veiuciwai ni Kusi!

² a sa dauvakatadu mata e wai, io e na waqa kuta e na dela ni wai, Dou lako, na mata totolo, ki na matanitu sa tadede ka vuti, ki na lewe ni vanua sa rerevaki mailiu ka yacova na gauna o qo; ki na matanitu sa dauia na veivakarauti kei na veibuturaki, ka sa wasewasea na nodra vanua na veiuciwai.

³ Oi kemudou kecega na lewe i vuravura, dou raica, ni sa vakaduria ko koya na drotini e na veiulu-ni-vanua; ia ni sa uvuca na davui ko koya, dou rogoca.

⁴ Ni sa vosa vakaoqo vei au ko Jiova, Au na tiko ga, ka vakaraica e na noqui tikotiko me vaka na katakata ni sa draki vinaka e na dela ni co, ka vaka na kabukabu e na vula i katakata.

⁵ Ia ni sa sega ni cava mai na yabaki, ni sa kubu oti mai na vaini, a sa vua vinaka mai na sena; ena qai tamusuka ko koya na tabana e nai sele, ka biuta tani na tabana lalai ka seleva laivi.

⁶ Era na vakalaivi vata ki na manumanu vuka ni ulu-ni-vanua, kei na manumanu kila ni vanua: ia na manumanu vuka ena kania e na vula i katakata, kei na manumanu kila kecega ni vanua e na vula i liliwa.

⁷ E na gauna ko ya, ena kauti mai nai cabocabo kivei Jiova mai na matanitu sa tadede ka vuti, ia maivei ira na lewe ni vanua sa rerevaki mailiu ka yacova na gauna o qo; mai na matanitu sa dauia na veivakarauti kei na veibuturaki, ka sa wase wasea na nodra vanua na veiuciwai, ki na yasana ni yaca i Jiova ni lewe vuqa, ki na ulu-ni-vanua ko Saioni.