Aisea 16 - AI VOLA TABU

Ai vakaro vei ira na luve i Moapi me vakamalumalumutaki ira vua na tui Juta, 1-5. Era sa viavialevu ga, 6; a sa lewa na Kalou me ra cudruvi ga, 7-14.

¹ DOU vakauta na lami vua na tui ni vanua, ia mai Sela e lekutu ki na ulu-ni-vanua ni gonealewa ni Saioni.

² Me vaka na manumanu sese sa vakasevi mai na kena sova, era na vakakina na gonealewa ni Moapi mai na wai matia ni Erimoni.

³ Dou ia na bose, lewa vakadodonu; cakava na nomudoui vakaruru e na siga levu me tautauvata kei na bogi; vunitaki ira sa se mai; kakua ni tukuni ira na tiko sese.

⁴ Me tiko kei iko, Moapi, ko ira na noqu era sa se mai, mo nodrai vakaruru mai na matana na dauvakacaca; ni sa takali na daukovekove, sa mudu na dauvakacaca, sa vakarusai tani e vanua ko ira ka daubuturaka.

⁵ Ena qai vakataudeitaki e na loloma nai tikotiko ni tui: ena tiko dei kina ko koya e na vale i Tevita, me ia na lewa, ka qarava na lewa dodonu, ka vakusarawataka na caka dodonu.

⁶ Eda sa rogoca na viavialevu i Moapi; o koya sa viavialevu sara: io na nona yalolevu, kei na nona viaqaqa, kei na nona daucudru: a nona lasulasu ena tawa yaco.

⁷ O koya o qo ena tagicaki Moapi kina ko Moapi, era na tagi kecega: dou na tagi e na vuku ni sa rusa ko Kiri-ereseci; ni sa yaviti sara:

⁸ ni sa qai malai na veiwere ni Esiponi, kei na vaini ni Sipima: o ira na turaga ni veimatanitu era sa basuka sobu na tabana talei, e sa laʼki cavaraki ki Yaseri, ka lako sese ki lekutu; a tabana sa tete yani, ka laʼki kosova na Wasawasa.

⁹ O koya o qo kaʼu na tagi kina e na vuku ni vaini ni Sipima, me vaka niʼu sa tagi e na vuku i Yaseri: au na vakasuasuataki kemudrau, Esiponi, kei Elale, e na wai ni mataqu: ni sa lutuka na nomu vuata kei na nomu yabaki na kaila ni valu.

¹⁰ A sa kauti tani mai na veiwere vakalewe na rereki kei na marau; ena sega na meke se na kaila e na veivainivaini; ia na waini e nai keli-ni-waini ena sega ni sikaraki; kaʼu sa muduka laivi na kena kailavaki.

¹¹ O koya o qo ena rorogo kina na ketequ me vaka na api e na vuku i Moapi, kei na lomaqu e na vuku i Kiri-ereseci.

¹² Ia ena yaco, ni sa rairai mai ko Moapi, io, ni sa qai oca e na yasana cecere, ena qai curuma na nona bure-kalou me soro; ena sega ga ni rawa.

¹³ O qo na vosa sa cavuta eliu ko Jiova e na vuku i Moapi.

¹⁴ Ia ka sa qai vosa ko Jiova, ka kaya, E na yabaki e tolu, me vaka na yabaki ni tamata voli, ena qai beci nai ukuuku i Moapi, kei ira kecega na lewe vuqa ko ya; ia na kedra vo era na lewe lailai sara ka malumalumu ga.