Aisea 15 - AI VOLA TABU

Ai colacola bibi me tauci ki Moapi.

¹ O QO nai colacola kei Moapi, Ni sa kabai e na bogi ko Ari-moapi, a sa vakarusai; ni sa kabai e na bogi ko Kiri-moapi, a sa vakarusai.

² Era sa cabe cake ki na bure levu, ia ko Tiponi talega ki na veiyasana cecere, me tagi: e dela i Nipo kei Metipa sa tagi ka yaso ko Moapi: sa tasi na uludra kecega, sa tasi laivi na kumidra kecega.

³ E na kedraui saqata ni koro kecega era sa vauci ira e nai sulu taqarotu: e dela ni nodra veivale, e na nodra rara talega, sa tagi kecega, sa lako sobu mai ka tagi tu.

⁴ Ia ena qoqolou ko Esiponi, kei Elale: ena rogo yani ki Yeasi na domodrau: o koya o qo sa qoqolou kina nai valu i Moapi; sa rarawa na yalona e lomana.

⁵ Sa tagi na lomaqu e na vuku i Moapi; a domodra era sa dro sa rogo ki Soeri, sa vaka na luve ni karavau e tolu na kena yabaki: ni sa tagi lako ko koya sa cabeta nai cabecabe ki Luici; io e na sala ki Oroneimi era tabalaka na tagi ni veivakarusai.

⁶ Ni sa di mai na wai ni Nimirimi; a sa malai na co, a sa yali na buroro, sa sega na ka e bula.

⁷ Ia na vo ni ka era rawata, kei na nodrai yaya, era sa kauta yani ki tai kadua, ni soniwai ni veiwilou.

⁸ Ni sa volivolita nai yalayala ni Moapi na kena tagi; sa rogo ki Ekileimi na kena tagi yaso, kei na kena qoqolou ki Pieri-elimi.

⁹ Ni sa sinai e na dra na wai ni Timona: niʼu na vakayacora ki Timona na kenai kuri, kei na laioni vua na Moapi sa dro bula, vua talega sa vo tiko e vanua.