Aisea 14 - AI VOLA TABU

O koya na Kalou ena vakabulai ira tale na Isireli, 1-4. Era meketaki Papiloni ni sa ca mai, 4-23. A lewa ni Kalou e na vuku i Asiria, 24-27, e na vuku i Filisitia talega, 28-32.

¹ NI na lomani ira na Jekope ko Jiova, ka digitaki ira tale na Isireli, ka vakatikori ira e na nodra vanua: ia ko ira na kai tani era na laʼki to vata kei ira, ka kabiti ira na mataqali i Jekope.

² 0 ira na lewe ni vanua era na tauri ira, ka kauti ira ki na nodra yasana: ia na mataqali i Isireli ena taukeni ira e na vanua i Jiova me nodra tagane kei na nodra vada: a ra na bobulataki ira era a bobula kina; ka lewai ira era a vakasaurarataki kina.

³ Ia ena yaco e na siga sa vakacegui iko kina ko Jiova mai na nomu rarawa, kei na nomu rere, kei na oca dredre ka lavaki vei iko,

⁴ o na qai ia na meketaki koya vakaoqo na tui Papiloni, ka kaya, A nona cegu tiko na dauveivakasaurarataki! na kena cegu tu na koro koula!

⁵ Sa musuka ko Jiova na nodra matanakilagi na tamata ca, na nodrai titoko na mataveilewai!

⁶ O koya ka dauyaviti ira na veimataqali e na yaloca ni sa ia tiko na veiyaviyaviti, o koya ka daulewa na veimatanitu e na cudru, ka sega e dua e tarova.

⁷ Sa qai cegu, ka vinaka mai ko vuravura kecega: era sa lagata mai na meke.

⁸ Io, na veipaini sa rekireki e na vukumu, kei na veisitari ni Lipanoni, ka sa kaya, Ni ko sa qai koto no, sa sega e cabe mai na dautakau kivei keimami.

⁹ O bulubulu e ra sa yavala e na vukumu me mani tavaki iko ni ko sa lako yani kina: sa vakayadrati ira na yalo ni qaqa e na vukumu, o ira kecega ka turaga kei vuravura; sa vakaduri ira kecega na tui ni veimatanitu mai na nodrai tikotiko.

¹⁰ Era na vosa kecega ka kaya vei iko, O iko talega ko sa malumalumu mai me vakataki keimami, mo sa tautauvata kei keimami!

¹¹ Sa biuti sobu ki nai bulubulu na nomui ukuuku, kei na domo ni nomu api: sa tevuraki e rukumu na baca, a sa nomui tutuvi na baca.

¹² Ule na nomu lutu mai lomalagi, o iko na Kalokalo i vola siga! na nomu tavakabalei sobu ki na qele, o iko ka dauvakasaurara-taka na veimatanitu!

¹³ Io ko a kaya e lomamu, Kaʼu na cabe ki lomalagi, kaʼu na vueta na noqui tikotiko me cecere ka lolovira na kalokalo ni Kalou: kaʼu na tiko talega mai dela ni ulu-ni-vanua ni so tabu, e na tikina ki na tokalau:

¹⁴ kaʼu na cabe ki na yasana kicake me no ki ra na o; kaʼu na tautauvata kaya sa Cecere sara.

¹⁵ Ia ko na biuti sobu ga ki etesi, ki na tikina ki loma ni bulubulu.

¹⁶ O ira era raici iko era na dikevi iko, era na vakananumi iko, ka kaya, O qo li na tamata ka cakavi vuravura me sautaninini, ka vakayavalata na veimatanitu;

¹⁷ ka cakavi vuravura me lekutu tu, ka dau vakarusa na kena Veikoro, ka sega ni vakatalai ira na nona bobula ki nodratou?

¹⁸ O ira kece na tui ni veimatanitu, o ira kecekecega, era dui koto vakaiukuuku yadua e na nona vale:

¹⁹ ia ko iko ko sa biuti tani mai na nomui bulubulu me vaka na taba ni kau sa vakasisilataki, me vaka na nodrai sulu na moku, era sa laubasikataki e nai seleiwau, ka lako sobu ki na veivatu ni bulubulu; me vaka na yago ni mate sa buturaki:

²⁰ ko na sega ni buluti vata kei ira, e na vuku ni ko sa vakacacana na nomu vanua, ka vakamatei ira na nomu tamata: ena sega sara ni rogo na nodra kawa nai valavala ca.

²¹ Dou vakarautaka na kedra veivakamatei na luvena e na vuku ni valavala ca ni nodra qase; me ra kakua ni tu cake, me taukena na vanua, ka vaka-osoosotaka na dela i vuravura e na koro.

²² Niʼu na tu cake vei ira, sa kaya ko Jiova ni lewe vuqa, ka muduka tani mai Papiloni na yacadra, kei na kedra vo, kei na luvedra, kei na nodra kawa, sa kaya ko Jiova.

²³ Kaʼu na cakava na vanua me kedra na belo, me vanua vakadrano-drano: ia kaʼu na taviraka laivi e nai taviraki e dauveivakarusai, sa kaya ko Jiova ni lewe vuqa.

²⁴ Sa vosavavakini ko Jiova ni lewe vuqa, ka kaya, Me vaka dina na ka kaʼu sa nakita, ena yaco vakakina; ka vaka na ka kaʼu sa lesia, ena tu ga vakakina:

²⁵ meʼu musuki koya na kai Asiria e na noqu vanua, ka buturaki koya e na noqu ulu-ni-vanua: ia na nonai vua ena qai lako tani vei ira, kei na nonai kaukau ena kauti tani mai na domodra.

²⁶ O qo na ka sa lesi e na vuku i vuravura kecega: ia o qo na liga sa dodoki yani ki na veimatanitu kecega.

²⁷ Ni sa lesia ga ko Jiova ni lewe vuqa, ia ko cei me vakadaroya? sa ligana ga sa dodoki yani, ia ko cei me vakasuka tani?

²⁸ E NA yabaki ka mate kina ko Aasi na tui, sa qai raici nai colacola o qo.

²⁹ Mo kakua ni rereki, Filisitia taucoko, e na vuku ni sa ramusu nai titoko i koya ka yaviti iko: ni na tubu mai na vu ni gata na gata katakata, ia na vuana ena gata katakata sa vuka.

³⁰ Ena qai vakani ko ira sa dravudravua sara, a ra na koto sobu vakavinaka na kaisi: ia kaʼu na vakamatea na wakamu e na dausiga, ia na kemu vo ena vakarusai.

³¹ Mo tagi, na matamata-ni-koro! mo qoqolou, na koro! o iko, Filisitia taucoko, ko sa waicala sara: ni na lako mai na tokalau na kubou, ena sega e laivi tu yani e na kena gauna.

³² Ia na vosa cava me qai tauci vei ira na mata ni veivanua? Ni sa tauyavutaki Saioni ko Jiova, a ra na dro kina na nona tamata era vakararawataki.