2 Tui 2 - AI VOLA TABU

Sa kauti cake ko Ilija ki lomalagi, 1-11. Sa qai cakava na veika mana na parofita ko Ilisa, 12-25.

¹ A SA yaco ni sa voleka ni kauti Ilija cake ki lomalagi ko Jiova, e na covu-laca, sa rau lako ko Ilija kei Ilisa mai Kilikali.

² A sa kaya vei Ilisa ko Ilija, Mo tiko mada ga eke; ni sa talai au ki Peceli ko Jiova. A sa kaya ko Ilisa, Me vaka sa bula ko Jiova, ka sa bula na yalomu, kaʼu na sega ni laivi iko. A rau sa lako sobu ki Peceli.

³ Ia sa lako yani vei Ilisa ko ira na luvedra na parofita mai Peceli, a ra sa kaya vua, O sa kila beka, ni na kauta tani edaidai na nomu turaga ko Jiova, me kakua ni lewai iko tiko? A sa kaya ko koya, Au sa kila ga; dou tikolo.

⁴ A sa kaya vua ko Ilija, I Ilisa, mo tiko mada ga eke, ni sa talai au ko Jiova ki Jeriko. A sa kaya ko koya, Me vaka sa bula ko Jiova, ka sa bula na yalomu, kaʼu na sega ni laivi iko. A rau sa lako ki Jeriko.

⁵ Ia sa toro vei Ilisa ko ira na luvedra na parofita mai Jeriko, ka kaya vua, O sa kila beka, ni na kauta tani edaidai na nomu turaga ko Jiova, me kakua ni lewai iko tiko? A sa kaya ko koya, Au sa kila ga; dou tikolo.

⁶ A sa kaya vua ko Ilija, Mo tiko mada ga eke; ni sa talai au ko Jiova ki na Joritani. A sa kaya ko koya, Me vaka sa bula ko Jiova, ka sa bula na yalomu, kaʼu na sega ni laivi iko. A rau sa lako ruarua yani.

⁷ Ia ka ra lewe limasagavulu na tamata vei ira na luvedra na parofita, era sa laʼki tu vakayawa me ra vakararai: ia erau sa tu ruarua mai na Joritani.

⁸ A sa taura na nonai sulu ko Ilija, ka lobia, ka yavita na wai, a sa tawase vaka ka vaka, a rau sa lako kina ki tai kadua e na qele mamaca.

⁹ Ia ni rau sa yaco ki tai kadua, sa qai kaya vei Ilisa ko Ilija, Mo kerea na ka meʼu cakava eliu vei iko, niʼu sa sega ni kauti tani vei iko. A sa kaya ko Ilisa, Me tu mada vei au e rua nai votavota ni yalo sa nomu.

¹⁰ A sa kaya ko koya, Sa dredre na ka ko sa kerea: kevaka ko na raici au niʼu sa kauti tani vei iko, ena yaco vakakina vei iko; ia kevaka e segai, ena segai o qo.

¹¹ Ia ni rau sa lakolako tiko, ka veivosaki, raica, sa dua na vale-vodoki caucaudre, ka so na veiose caucaudre, sa tawasei rau e dua mai na dua; a sa lako cake ki lomalagi ko Ilija e na covulaca.

¹² A sa raica tiko ko Ilisa, a sa qolouvaka, Na tamaqu, na tamaqu! na vale-vodoki nei Isireli, kei ira na nodra tamata sa dauvodo e na ose! A sa sega ni raici koya tiko: a sa taura na nonai sulu, ka sea rua.

¹³ A sa laveta cake nai sulu i Ilija ka lutu mai vua, ka lesu tale, ka laʼki tu e na bati ni Joritani.

¹⁴ A sa taura ko koya nai sulu i Ilija ka lutu mai vua, ka yavita kina na wai, a sa kaya, Evei ko Jiova na nona Kalou ko Ilija? Ia ni sa yavita oti na wai ko koya talega, sa tawase vaka ka vaka; a sa lako ki tai kadua ko Ilisa.

¹⁵ Ia ni sa raica ko ira na luvedra na parofita era a tu me vakararai mai Jeriko, era sa kaya, Sa lutu vei Ilisa na yalo i Ilija. A ra sa laʼki tavaki koya, ka ra sa cuva vua ki na qele.

¹⁶ A ra sa kaya vua, Raica, sa tiko kei keitou na nomu tamata e lewe limasagavulu na tamata kaukauwa; me ra lako madani, ka vakasaqarai koya na nomu turaga: de kauti koya kicake beka na Yalo i Jiova, ka biuti koya ki na dua na ulu-ni-vanua, se ki na dua na qakila. A sa kaya ko koya, Dou kakua ni talaki.

¹⁷ Ia ni ra sa kitaki koya tiko ka madua, ko koya, sa qai kaya, Dou talaki ga. A ra sa tala na tamata e lewe limasagavulu; a ra sa vakasaqara ka bogi tolu ka sega ni kunea.

¹⁸ A ra sa lesu tale vua, (ni sa tikoga mai Jeriko ko koya,) a sa kaya ko koya vei ira, Au sa sega beka ni kaya vei kemudou, Dou kakua ni lako?

¹⁹ A sa kaya vei Ilisa ko ira na lewe ni koro ko ya, Raica mada, sa toka vinaka na koro o qo, me vaka sa raica tiko na noqu turaga; ia ka sa ca na wai, a sa tawa vua na qele.

²⁰ A sa kaya ko koya, Dou kauta mai vei au e dua na tavaya vou, ka viria kina na masima. A ra sa kauta vua.

²¹ A sa lako yani ko koya ki na vurevure ni wai, ka biuta kina na masima, a sa kaya, Sa vosa vakaoqo ko Jiova, Au sa vakavina-kataka na wai o qo; ena sega tale maikina emuri na mate se na tawa vua.

²² A sa vinaka mai na wai, ka yacova na gauna o qo, me vaka na vosa ka vosataka ko Ilisa.

²³ A sa lako cake maikea ko koya ki Peceli: ia ni sa lako cake tiko e na sala, sa curu yani mai na koro e so na cauravou lalai, ka vakalialiai koya, ka kaya vua. Mo lako cake, na ulu drika; mo lako cake, na ulu drika.

²⁴ A sa gole kimuri ko koya, ka raici ira, ka rukaki ira e na yaca i Jiova. A sa lako yani e rua na pera alewa mai na veikaukau, a rau sa dresulaka e lewe vasagavulu ka rua na gone vei ira.

²⁵ A sa lako tani maikea ko koya ki na ulu-ni-vanua ko Karimeli, a sa lesu yani maikea ki Samaria.