Tobit 3 - Fulfulde DC Bible

Tornde Tobit

¹ Nde mi ɗonno nder suno caatuŋgo, mi fuɗɗi uumugo e woygo. Nder uumaali am, mi fuɗɗi torugo, mi wi'i:

² “A adiliijo, Jawmiraawo, kuuɗe ma fuu ɗe adiliije. A ɗon huuwana min tum mbooɗeeŋga e gooŋgaaku. An woni kiitoowo duniyaaru fuu.

³ Jonta, Jawmiraawo, taa yejjitam, laaram useni. Taa hiitam ngam hakkeeji am malla ngam aybeeji ɗi min mbaɗi, min e kaakiraaɓe am.

⁴ Ngam min ɗowtanaaki umrooje maaɗa, a acci konne'en amin ɓofti min kuuje, ndahi min, mbari min. Ummaatooje haa a saŋkiti min njali min, kuɗi min.

⁵ A gooŋgaajo nder kiitaaji maaɗa fuu nde a hiiti yam ngam hakkeeji am e ɗi kaakiraaɓe am. Ngam fakat min ɗowtanaaki umrooje maaɗa, min ngeeɗaay nder gooŋgaaku yeeso maaɗa.

⁶ Jonta, waɗam ko fottani ma. Hoocu yoŋki am haa mi majja diga dow lesdi, mi warta loope. Ndikkana yam maaygo dow yeeɗugo, ngam mi nani kuudi ɗi pottanaay yam, mi mettaaɗo masin. Jawmiraawo, ittanam mettamɓeram ɗa'am, nastinam nder siwtaare duumiinde. Taa wiirnam yeeso ma, Jawmiraawo! Ndikkana yam maaygo dow jooɗaago nder mettamɓeram e nango kuudi ɗi'i!”

Korɗo huɗi Saraatu

⁷ Nyalde man nden, nder berniwol Ekbatan nder lesdi Mediya, Saraatu ɓii Raguyel boo nani korɗo baaba mum huɗi ɗum.

⁸ Saraatu ɓaŋgaama nde joweeɗiɗi. Ammaa nde ɓe ɓaŋgi mo fuu ginnaawol kalluŋgol bi'eteeŋgol Asmodeewu mbari gorko man hiddeko ɓe mbaalda fodde ɗabiya. Ndaa ko korɗo wi'i Saraatu: “An mbarata worɓe ma! Njoweeɗiɗo ɓaŋgi ma, ammaa koo innde gooto caka maɓɓe, a heɓaay.

⁹ Ngam ɗume a ɗon torra min bee maayde maɓɓe? Yah, hawtoya bee maɓɓe, taa min ndaara ɓiŋngel gorgel malla deyel ngel ndanyɗa.”

¹⁰ Nyalde maajum, ɓernde Saraatu metti masin, o woyi jamum, o wa'i haa suudu wonndu dow ndu baaba maako bee anniya ɓiltaago. Ammaa o numi, o wi'i: “Taa ɓe kuɗa baaba am bee wi'go: A woodino ɓiɗɗo debbo gooto tan, ndaa o ɓiltake ngam suno maako caatuŋgo. Mettamɓeram baaba am mbaran ɗum. Hiddeko mi ɓilto, ndikka mi toro Jawmiraawo, o mbarammi ngam taa mi nana kuudi dow am balɗe fuu.”

Tornde Saraatu

¹¹ Saraatu tiiti feneetir, ɓaŋgti juuɗe, tori, wi'i: “Tedduŋgal laatano ma, Allah enɗoowo! Koo moy teddina innde ma haa foroy! Tagle ma fuu teddine haa foroy!

¹² Jonta, mi ɗon tiite, mi ɗon tijje.

¹³ Wurtinam e duniyaaru ndu'u ngam taa mi meeta nango kuudi dow am.

¹⁴ Jawmiraawo, a anndi mi paanyo debbo, mi meeɗaay anndugo gorko tawon.

¹⁵ Mi toskaay innde am koo innde baaba am nder lesdi ndi ɓe dahi min. Mi ɓiɗɗo debbo bajjo baaba am, o heɓaay donoowo feere. O walaa deerɗiraawo feere haa ɓaŋgammi e mi yeeɗa ngam maako. Mi maayraaɗo worɓe njoweeɗiɗo, ngam ɗume mi yeeɗata fahin? Ammaa, Jawmiraawo, to a yiɗaa mi maaya, useni nan kuudi ɗi ɓe ɗon kuɗammi.”

Allah neli malaa'ikaajo Rafayel hurgugo Tobit bee Saraatu

¹⁶ Nder wakkati man nden Allah tedduɗo yerdi tornde Tobit bee nde Saraatu fuu.

¹⁷ Allah neli malaa'ikaajo Rafayel ngam hurgugo ɓe ɗiɗo fuu. Sey Rafayel itta toɓɓere raneere wonnde nder gite Tobit ngam o laara annoora Allah fahin. O hisna Saraatu, ɓiɗɗo Raguyel diga ginnaawol kulniiŋgol bi'eteeŋgol Asmodeewu nden o ɓaŋgra mo bee Tobiyas ɓii Tobit. Sey Tobiyas mari laawol ɓaŋgugo mo dow muuyooɓe feere. Nde Tobit nasti saare, Saraatu ɗon jippo diga suudu mum dow ndu baaba mum.