Sopo 21 - Tosi Tapu

Tali a Sopo kia Tesofale

¹ Na masau loa a Sopo, o pati :

² Kotou fakalogo, kotou fakalogo mai ki aku masau, Kotou tuku mai fua le ga fakafimalie lena kiate au.

³ E kau kole atu kia koutou, ke kotou tuku au ke kau masau ; Ti ka oki loa laku masau, e mafai loa ke kotou gologolo.

⁴ Pe kau fai laku lauga ki se tagata ? Ti kapau koia, kolea e leaise kataki mai ai loa kiate au ?

⁵ Kotou tio mai kiate au, kotou ofolele, Ti kotou tapono okoutou gutu ki okoutou lima.

⁶ Io, ka kau manatu ki nea fuli kua soko kiate au, Ti e kau i ai, ti e lulu loku tino katoa.

⁷ Kolea e mauli ai le kau agasala ? Kolea e tio ai kia latou e matutua malie, ti e asilisili lasi lolatou makeke ?

⁸ E lotou tio ki olotou vosa e nonofo i olatou tafa, Ti ko olatou makopuna e lalasi ake i olatou mata.

⁹ E pule le tokamalie i olatou fale, ti e leaise maua fua i ai se i ; E leaise au le laakau a le Atua o taai fua latou.

¹⁰ E makeke alatou pipi tagata, ti e lotou fakatupu ia ni uviki makeke. E fanaunau alatou pipi fafine, ti e leaise lotou faiuviki mamate.

¹¹ E lotou tuku alatou fanau ke makape ofaipe se kau ovi, Ti e manonogi faifaitalisa olotou makopuna.

¹² E lotou sua mo ta le nafa mo le alepe, Ti e lotou fakafiafia i le leo o le salumo.

¹³ E lotou fakaoki olotou aso fuli i le fimalie, Ti e lotou ifo i le tokamalie ki le fenua o le kau mate.

¹⁴ Kae na lotou pati ki le Atua : Ano kese ia matou, E leaise motou fia iloa ou ala.

¹⁵ Kolea e tonu ai ke motou tausi ki le Mafimafi ? Kolea e tonu ke motou faikole kiate ia ?

¹⁶ Kolea koia ! pe leaise lotou maua i olatou lima le manuia ? Ke mamao atu iate au a fakakaukau a le kau agaveli !

¹⁷ Pe kua tamate tua fia le malama o lolatou mauli ? Pe kua maua tua fia latou e le mativa ? Pe kua fakatuaa tua fia latou e le Atua i lona sausau ?

¹⁸ Ke lotou faipe le mutie leia kua agina i le matagi, Pe le penu leia kua ave e le asesio.

¹⁹ Pe taofi e le Atua ki vosa le tautea a le tamana ? Kae ko ia leia e tonu ke tautea e le Atua, o tupu ke iloa e ia le Atua.

²⁰ Ko ia totonu leia e tonu ke tio ki lona maumau, Ti ko ia totonu leia e tonu ke inu ia le sausau o le Mafimafi.

²¹ Talie, kolea le uiga kiate ia o lona fale i ona muli, Mo ka kua oki le lasi o ona masina.

²² Pe ko le Atua leia e ako loa ki ai le poto, A ia leia e fakamaau ia le kau aselo ?

²³ Ki iki, e ano malie a nea fuli o kaku ki le mate, E lotou mauli i le fimalie, mo le tokamalie, mo le fiafia ;

²⁴ E apele olatou vakavaka i le gako, Ti e apele le uso o ivi i le lolo mauli.

²⁵ Ti ko iki, e lotou mate i le oki o se mauli kinakinau, Ti na leaise lotou maua fua se fiafia i se nea fua e tasi.

²⁶ Kae ko latou fuli ana e momoe fakatasi i le kele, Ti e kai fuli latou e ilo.

²⁷ E kau iloa malie akoutou manatu, Mo akoutou fakamaau veli ala e kotou fai kiate au.

²⁸ E kotou pati : Kofea le fale o le tagata makeke ? Kofea le falela o le tagata agaveli ?

²⁹ Pe na leaise kotou fakavesili fua latou ala e feanoaki ? E kotou fakafiti ki nea ala na lotou tio totonu ki ai mo fakamaoki ki ai.

³⁰ I le aso o le malaia, e sao le tagata agaveli ; I le aso o le sausau, e fakamauli a ia.

³¹ Ko ai leia e toa loa o fakasa kiate ia ana sala ? Ko ai leia e fakatotogi ia loa kiate ia le nea leia na fai e ia ?

³² Kae ka mate a ia, e ave a ia ki le tano, Ti e leoleo lona tanuma.

³³ E ano fuli loa le malama i muli o lona pusa, Ti e fakaolo loa le kakai toka api i ona mua. E maamaa loa kiate ia le kele o le popoko.

³⁴ Kolea le aoga o akoutou masau fakafimalie kiate au ? Ko akoutou tali ko kaka fuli !