Naume 2 - Tosi Tapu

Logo fakafiafia

¹ Ko leinei i aluga o mauga A vae o le tagata avelogo leia e fakasa ia le tokamalie ! Suta, fai ou aso lalasi, fakasoko au fakapapau ! Talie e leaise toe ano loa le tagata agaveli i loto malie o ou, Kua motusi oki a ia…

² Kua saele le tagata maumau kiate koe, Ninive. Taupau le kolo tau ! Leoleo le ala ! Teuteu le tau ! Tanaki lou makeke katoa !…

³ Talie e toe fakatuu e le Eteleno le kololia o Sakopo Ti mo le kololia o Iselaele, Talie na kaia latou e le kau kaia, Ti na lotou maumaui a tafito vite.

⁴ Kua kula a paletau o ana tagata toa, Kua kofu kula a tagata tau. Kua sa a saliote mo le ukamea leia kua gigila, I le aso leia na fakatuutuu e ia ki le tau, Ti kua siki a tao.

⁵ Kua oso a saliote i ala, Kua lotou makape ki lapalasi o kolo ; I le tio kia latou, kua lotou faipe ni ulai afi, E lotou makape ofaipe ni uila.

⁶ E manatu le sau o Ninive ki ana kau tagata toa, Kae e lotou sisiga i lalatou saele. Kua fakatavili ki kaua, Ti kua teuteu ki le tau.

⁷ Kae fokifa kua mavaa a matapa o vaitafe lalasi, Ti kua solo le fale sau !

⁸ Kua oki a ia : Kua telefua Ninive, kua ave a ia. Kua tagi laulau ana fafine fakasausau ofaipe ni lupe, Ti kua lotou pa olatou fatafata.

⁹ Na fai Ninive i le temi mua pe se fa tane na apele i le vai ; Kae ko leinei kua mafaa a ia, ti kua lotou sosola… Kotou tutuu ! Kotou tutuu !… Kae e leaise toe mafuli se tasi…

¹⁰ Kotou kaia le siliva ! Kotou kaia le aulo ! E ia ni koloa lee oki, Ni koloa mauiga kesekese.

¹¹ E kaia, e maumaui, e fetuku ! Ti kua gaegae a loto, Kua mapelu a tuli ki lalo, Kua mamae a ifiifi, Kua fakalaulautetea a mata.

¹² Kua feaki le nofoaga lena o laione, Le kaiaga lena o uviki laione, Le ganea leia e ano ki ai le laione tagata, mo le laione fafine, ti mo le uviki laione, Ti e leaise toe fakavisi se tasi kia latou ?

¹³ Na sae e le laione tagata ki ona uviki, Ti na tamate e ia ki ana laione fafine ; Na fakaapele e ia ona ana ki nea kai Ti mo ona nofoaga ki mate.

¹⁴ Ko leinei, e kau mamafa kiate koe, e pati le Eteleno o kau tau : E kau fakaliliu loa au saliote tau o mugalafu, E kai loa e le seleta ou uviki laione, E kau taaki loa lau nea kai i le fenua, Ti e leaise toe logo loa ki le leo o au tagata fakasausau.