Levitiko 19 - Tosi Tapu

Lao fakalotu

¹ Na masau loa le Eteleno kia Moisese, o pati :

² Masau ki le kakai katoa o Iselaele, o pati kia latou : Ke kotou maokioki, talie e kau maokioki, a au, ko le Eteleno, ko lokoutou Atua.

³ Kotou tasi fakaapaapa loa ki lona tamana mo lona tinana, ti mo tausi loa oku sapato. Ko au ko le Eteleno, ko lou Atua.

⁴ Aua na kotou tafoki loa ki ni taulaatua loi, ti aua na kotou fai loa ni atua ki se ukamea saka. Ko au ko le Eteleno, ko lokoutou Atua.

⁵ Ka kotou momoli loa ki le Eteleno se sakilifisio fakafetai, e kotou momoli loa a ia o mulimuli ki le lekula, ti e kau tali loa a ia.

⁶ E kai loa le manu i le aso leia e kotou tamate ai a ia, pe i le aso leia e olo mai ki ai ; e kotou tutu loa i le afi le nea leia e toe loa o kaku ki le tolu o aso.

⁷ Ti kapau e kai loa se nea i le tolu o aso, e veli loa a ia : e leaise tali loa le sakilifisio lena.

⁸ Ti ko leia e kai loa ki ai e agasala loa, talie kua maumaui e ia le nea tapu a le Eteleno. E tuuti loa a ia mei lona kakai.

⁹ Ka kotou tuuti loa a fua i lokoutou fenua, e ke tuku loa se ga potu o lau faisaga, o leaise ke tuuti loa lona fua, ti e leaise ke tanaki loa le nea leia e toe i lau faisaga.

¹⁰ Aua na ke tau loa le nea leia e toe i lau vite, ti aua na ke tanaki loa a fuai vite ala kua vivilo ki lalo. E ke tuku loa a nea ana ki le mativa mo le matapule. Ko au ko le Eteleno, ko lokoutou Atua.

¹¹ Aua na kotou kaia loa, ti aua na kotou fai fakakaka loa, pe feloiaki loa leia ki leia.

¹² Aua na kotou fai loa se fakamaoki loi i loku suafa, talie e ke fakakelekele loa i ai le suafa o lou Atua. Ko au ko le Eteleno.

¹³ Aua na ke pulei fakaveli loa lou oloi, ti aua na ke too fakamakeke loa se nea iate ia. Aua na ke taofi loa o kaku ki le apogipogi le totogi o le tagata gaoi.

¹⁴ Aua na ke lauvelii loa se tuli, ti aua na ke tuku loa ki mua o se kivi se nea leia ke siga ai. Talie e ke maua loa le i ki lou Atua. Ko au ko le Eteleno.

¹⁵ Aua na ke fai loa se tonu sala i au fakamaau : aua na ke tio loa ki le mativa o se tagata, ti aua na ke tio loa ki le mauiga o se tagata, kae e ke fakamaaui loa lou oloi o mulimuli ki le lao totonu.

¹⁶ Aua na ke fakamafola loa ni fatufatu loi ki se tasi o lou kakai. Aua na ke fai loa ni fakamaoki loi ke tamate ai lou oloi. Ko au ko le Eteleno.

¹⁷ Aua na ke vesia loa ki lou taina i lou loto ; e ke tokaga loa o valoki lou taina, o tupu ke aua na ke amo ia loa se agasala o tupu ko ia.

¹⁸ Aua na ke taui veli loa, ti aua na ke taofi loa se kona i lou loto ki fanau o lou kakai. E ke alofa loa ki lou oloi ofaipe koe totonu. Ko au ko le Eteleno.

¹⁹ Kotou tausi loa aku lao : Aua na ke fakaavaga loa ni manu o ni faasiga kesekese e lua. Aua na kotou to loa akoutou faisaga ki ni faasiga pulapula e lua. Aua na kotou tui loa ni kofu ki ni faasiga filo e lua.

²⁰ Kapau e momoe loa se tagata mo se fafine fakasausau leia kua fakapapau ki se tasi ake tagata, kae e leikiaise totogi a ia, pe leikiaise lauatea a ia, e tonu ke totogi loa e le tagata lena le fafine fakasausau. Kae e leaise tamate loa laua, talie koi nofo fakasausau le fafine lena.

²¹ E ave loa e le tagata lena ki le uluaga o le falela tapu se ovi tagata, o fai loa e ia se sakilifisio fakamalie ki lana sala.

²² E fai loa e le tagata faisakilifisio kiate ia le sakilifisio o le fakamalie, i mua o le Eteleno, ti e fakamolemole loa lana agasala kiate ia.

²³ Ka kotou ulu loa ki le fenua, ti ka kotou to loa i ai ni laakau fua, e kotou tuku loa a fua ke kelekele i ni fetuu e tolu ; aua na kotou kai loa latou ; e lotou kelekele loa kia koutou.

²⁴ I le fa o fetuu, e momoli mai loa kiate au a fuai laakau fuli i ni fakafiafia.

²⁵ I le lima o fetuu, e kotou kai loa olatou fua, ti e kotou tanaki loa latou. Ko au ko le Eteleno, ko lokoutou Atua.

²⁶ Aua na kotou kai loa se nea mo se toto. Aua na kotou vavakai loa a gata, pe ko ao ke kotou maua mei ai ni kikite.

²⁷ Aua na kotou koti fakamoumou loa okoutou fa ulu, ti aua na kotou tele loa a ma o okoutou kaukava.

²⁸ Aua na kotou fai loa ni masikasika i okoutou tino o tupu ko se mate ; aua na kotou fai loa ni tatau i lokoutou kili. Ko au ko le Eteleno.

²⁹ Aua na ke fakamatagafua loa lou taine o soli a ia ke faiaga fakalotu, talie e feala loa ke vilo le fenua ki le faiaga, ti ke apele a ia i aga fakalialia.

³⁰ Kotou tausi loa aku sapato, ti kotou fakaapaapa loa ki loku sagatualio. Ko au ko le Eteleno.

³¹ Aua na kotou maliu loa kia latou ala e masau ki laumalie o le kau mate, pe ko le kau kikite ; aua na kotou afa loa latou, talie na kotou kelekele loa mo latou. Ko au ko le Eteleno, ko lokoutou Atua.

³² E ke tuu loa ki aluga i mua o le ulu sina, ti ke fakaapaapa loa ki le matua. E ke i loa ki lou Atua. Ko au ko le Eteleno.

³³ Kapau e au loa se matapule o nofo mo koutou i lokoutou fenua, aua na kotou fakamamae loa a ia ;

³⁴ E kotou fai loa kiate ia ofaipe se tasi o koutou ; e kotou alofa loa kiate ia ofaipe koutou totonu, talie na kotou matapule foki i le fenua o Esipito. Ko au ko le Eteleno, ko lokoutou Atua.

³⁵ Aua na kotou fai loa ni kaka i akoutou fakamaau, mo akoutou meta, mo akoutou kilo, ti mo akoutou liti.

³⁶ E kotou maua loa ni fua totonu, mo ni kilo totonu, mo ni liti totonu, mo ni meta totonu. Ko au ko le Eteleno, ko lokoutou Atua, leia na fakamavae ia koutou mei Esipito.

³⁷ Kotou tausi loa aku lao fuli mo aku fakatotonu fuli, ti kotou fai loa latou. Ko au ko le Eteleno.