Esitele 8 - Tosi Tapu

Siki fakaalialiki o Maletoseo

¹ I le aso fai lena, na soli loa e le sau ko Asuelusi ki le fafine sau ko Esitele le fale o Amane, le fili o le kau Sutea ; ti na au loa Maletoseo ki mua o le sau, talie na fakasa loa e Esitele lola kaiga mo Maletoseo.

² Na too loa e le sau lona mama, leia na too e ia ia Amane, o soli a ia kia Maletoseo ; ti na fakanofo loa e Esitele a Maletoseo ke pule ki le fale o Amane.

³ Ti na toe masau loa Esitele i mua o le sau. Na fakamapee loa a ia ki vae o le sau, o tagi ti mo kole kiate ia ke taofi e ia le veli leia na lagai e Amane, le tagata Akake, ti mo le fai o ana fakatuutuu ki le kau Sutea.

⁴ Na velo loa e le sau lona tokotoko aulo kia Esitele, leia na malaga ake loa ki aluga, o tuu i mua o le sau.

⁵ Ti na pati loa Esitele : Kapau e malie mo totonu ki le sau, ti kapau kua kau maua se kalasia i ona mua ti kua ke alofa kiate au, ke fai se tosi o soloi ai a tosi ala na fakatupu e Amane, vosa o Ametata, le tagata Akake, ala na tosi e ia, o tupu ke tamate le kau Sutea leia e nofo i kolo fuli o le sau.

⁶ Talie e feaki loa laku tio ki le malaia leia ka soko loa ki loku kakai, ti e feaki loa laku tio ki le maumaui o loku lanu ?

⁷ Ti na pati loa le sau ko Asuelusi ki le fafine sau ko Esitele mo le Sutea ko Maletoseo : Ko leinei, kua kau soli kia Esitele le fale o Amane, ti kua tautau a ia ki le laakau o tupu ko lana falo lona lima ki le kau Sutea.

⁸ Kolua faitosi ki le kau Sutea, o mulimuli ki le nea leia e malie kia koutou, i le igoa o le sau, ti kolua fakamaoki ki le mama o le sau ; talie e leaise feala ke toe soloi se tosi leia kua fai i le igoa o le sau ti kua fakamaoki ki le mama o le sau.

⁹ Ti na fakatotonu loa ke au le kau sekalaipe a le sau i le temi lena, i le aso kau lua tupu tolu o le masina tolu, leia ko le masina o Sivane, ti na fai loa ni tosi, o mulimuli ki nea fuli ala na fakatotonu e Maletoseo, ki le kau Sutea, mo le kau pule lalasi, mo le kau kovana ti mo le kau pule o fenua e kau lelau kau lua tupu fitu, ala na tutuu mei Initia o kaku ki Etiopia, ki le fenua taki tasi o mulimuli ki lana faitosi, ki le kakai taki tasi o mulimuli ki lana masau, ki le kau Sutea o mulimuli ki lalatou faitosi mo lalatou masau.

¹⁰ Na fai loa ni tosi i le igoa o le sau ko Asuelusi, ti na fakamaoki loa ki le mama o le sau. Na ave loa a tosi e ni tagata avetosi ala na eke loa i ni osi, mo ni mule, ti mo ni kamelo.

¹¹ I tosi ana, na fakataga e le sau ki le kau Sutea, i kolo fuli ala e lotou nonofo ai, ke lotou fakatasi ti ke lotou puipui olatou mauli, ke lotou maumaui, ke lotou tamate, ti ke lotou fakapuli, mo olatou fanau liliki ti mo alatou avaga, latou fuli o kakai taki tasi mo fenua taki tasi, ala e too ia loa ni masafu tau kia latou, ti ke lotou too olatou koloa.

¹² Ti na tonu loa ke saele le fakataga lena i se aso fai e tasi, le aso kau agafulu tupu tolu o le masina kau agafulu tupu lua, leia ko le masina o Atale, i fenua fuli o le sau ko Asuelusi.

¹³ Na tuku i loto o tosi ana se siki o le lao leia e tonu ke fakasa i le fenua taki tasi, ti na fakasa loa e tosi ana ke iloa e kakai fuli e teuteu loa le kau Sutea ki le aso lena, ke lotou totogi ki olatou fili.

¹⁴ Na ano aifai a kau tagata avetosi, i ni osi, mo ni mule, ti mo ni kamelo, o lotou fakatavili, o fai ki le fakatotonu a le sau. Na fakasa foki le lao i Suse, le kolo mua.

¹⁵ Na mavae loa Maletoseo i le fale o le sau, mo se kofu fakasau usi mo tea, mo se pala aulo lasi, ti mo se taupulupulu mauiga lanu kula. Na kalaga fakafiafia loa le kolo ko Suse ti mo nekenekea.

¹⁶ Ti na apele loa le kau Sutea i le manuia mo le fiafia, i le nekenekea mo le kololia.

¹⁷ I le fenua taki tasi, mo le kolo taki tasi, ti mo ganea fuli ala na kaku ki ai le fakatotonu a le sau, na maua loa e le kau Sutea se fiafia lasi mo se nekenekea, ni kaitasi mo ni fakafiafia. Ti na liliu loa o Sutea se toka api i la ake kakai, talie na vilo loa kia latou le i ki le kau Sutea.