Zakarja 4 - BÍBLIA

Fimta sjón: Ljósastaki og tvey oljutrø; Harrin ræður, og Jósva og Zerubbábel eru stjórnarmenn hans. Templið fullgjørt

¹ Eingilin, sum talað hevði við meg, vakti meg nú aftur, eins og tá ið maður verður vaktur úr svøvni,

² og spurdi meg: «Hvat sært tú?» Eg svaraði: «Eg síggi ljósastaka, sum allur er av gulli, ovast á honum oljuskál og á henni sjey lampur og sjey pípur til hvørja lampu,

³ somuleiðis tvey oljutrø, annað høgrumegin og annað vinstrumegin skálina.»

⁴ Tá tók eg til máls og spurdi eingilin, sum talað hevði við meg: «Hvat merkir hetta, Harri mín?»

⁵ Eingilin, sum við meg talaði, svaraði og segði við meg: «Veitst tú ikki, hvat hetta merkir?» Eg svaraði: «Nei, Harri mín.»

^6a Tá tók hann til máls og segði:

^10b «Hesar sjey lampurnar eru Harrans eygu, sum líta út yvir alla jørðina.»

¹¹ Eg mælti og spurdi hann: «Hvat merkja hesi bæði oljutrøini, sum standa hvørt sínumegin ljósastakan?»

¹² Og eg tók aftur til máls og spurdi hann: «Hvat merkja hesar báðar oljuviðargreinarnar, sum ígjøgnum báðar gullpípurnar lata ta gyltu oljuna streyma frá sær í oljuskálina?»

¹³ Hann svaraði og segði: «Veitst tú ikki, hvat hatta merkir?» Eg svaraði: «Nei, Harri mín.»

¹⁴ Tá segði hann: «Hesir eru teir báðir oljusalvaðu, ið standa frammi fyri Harra alrar jarðar.»

^6b Hetta eru orð Harrans til Zerubbábel: Ikki við valdi og ikki við kraft, men við mínum anda, sigur Harri herliðanna.

⁷ Hvør ert tú, mikla fjall? Slætti skalt tú verða fyri Zerubbábeli. Hann skal leggja upp mønusteinin, meðan rópini gella: Náði, náði verði honum fyri!

⁸ Orð Harrans kom til mín soljóðandi:

⁹ Zerubbábels hendur hava grundað fyri hesum húsi, hendur hans skulu eisini fullgera tað; og tú skalt sanna, at Harri herliðanna hevur sent meg til tykkara.

^10a Tí at øll tey, sum vanmettu hesa lítilsvirdu byrjan, skulu gleðast, tá ið tey síggja hin útvalda steinin í hond Zerubbábels.