Zakarja 3 - BÍBLIA

Fjórða sjón: Sátan ákærir Jósva; fyrijáttan um fullgering tempulsins og dýrdliga framtíð

¹ Síðan læt hann meg síggja høvuðsprestin Jósva, har hann stóð frammi fyri eingli Harrans, og Sátan honum við høgru lið til tess at ákæra hann.

² Og eingil Harrans mælti við Sátan: «Harrin havi at tær, Sátan, Harrin, ið útvaldi Jerúsalem, havi at tær! Er ikki hesin eins og brandur riptur út úr eldi?»

³ Men Jósva var í skitnum klæðum, har hann stóð frammi fyri einglinum.

⁴ Tá tók eingilin til máls og mælti við teir, sum stóðu frammi fyri honum: «Latið hann úr hesum skitnu klæðunum!» Og hann segði við hann: «Sí, eg havi tikið misgerð tína av tær; lat teg nú klæðast í hátíðarklæði.»

⁵ Framvegis segði hann: «Setið á høvur hansara reint høvuðsskrúð;» og teir settu reint høvuðsskrúð á høvur hansara og lótu hann í rein klæði, meðan eingil Harrans stóð hjá.

⁶ Og eingil Harrans legði Jósva eina við og mælti:

⁷ So sigur Harri herliðanna: Um tú gongur leiðir mínar og varðveitir boðorð míni, tá skalt tú stjórna húsi mínum og gæta forgarðar mínar, og eg skal loyva tær at ganga millum hesar tænarar mínar.

⁸ Hoyr, Jósva høvuðsprestur, tú og felagar tínir, ið sita frammi fyri tær, tit eru fyriboðarar tess, at eg lati «Gróðurtein», tænara mín, koma.

⁹ Tí sí, steinurin, sum eg leggi fram fyri Jósva – sjey eygu á einum steini – sí, eg risti sjálvur árit hansara, sigur Harri herliðanna, og taki burtur eftir einum degi misgerð landsins.

¹⁰ Á tí degi, sigur Harri herliðanna, skulu tit bjóða hvør øðrum til at sessast undir víntræi og undir fikutræi.