Sálmarnir 9 - BÍBLIA

¹ Til songmeistarans; til mut-labben; ein sálmur av Dávidi.

² Eg vil Harranum lova av øllum hjarta mínum, um øll undurverk tíni vil eg boða;

³ eg vil fegnast í tær og frøast, eg vil lovsyngja navn títt, tú hægsti,

⁴ tí mínir fíggindar undan stukku, snávaðu og fullu fyri andliti tínum;

⁵ tí tú hevur rætt mín framt og mína sak, hevur sett teg í hásæti sum ein rættvísur dómari.

⁶ Heidningarnar hevur tú agað, teir gudleysu oytt og strokið út teirra navn ævinliga og altíð;

⁷ fíggindin hvarv, oyddur med alla, staðir tú legði í oyði, teirra minni er útdeytt.

⁸ Men Harrin hevur sæti um allar ævir, setir teknarstól sín til dóms;

⁹ og hann dømir jarðarríkið við rættvísi, við rættlæti fellir hann yvir fólkum dóm.

¹⁰ Harrin er teimum neyðstøddu skjól, skjól í neyðartíðum;

¹¹ teir líta á teg, ið kenna títt navn, tí ikki tú sveikst teir, ið á teg heita, Harri!

¹² Syngið Harranum lov, ið á Zion býr! Gerið kunn millum manna hans stórverk!

¹³ Tí sum blóðhevnari hevur hann tey í huga hjá sær, ikki gloymir hann arminga róp.

¹⁴ Náða meg, Harri, hygg neyð mín av fíggindum mínum, tú, ið lyftir meg upp úr deyðans durum,

¹⁵ at eg kann boða allan tín prís, og í Zions portrum gleðast av frelsu tíni!

¹⁶ Soknir eru heidnir menn í ta grøv, teir gróvu; í tí garni, teir loyndu, teirra fótur varð dreivaður.

¹⁷ Harrin gav seg í ljós, dóm hevur hann hildið, í verki av egnum hondum varð hin gudleysi fangaður. Higgajon, Sela.

¹⁸ Gudleysir skulu venda aftur í helheim, allir heidningar, ið gloyma Guð;

¹⁹ tí ikki allan aldur verður armur gloymdur, vón teirra neyðstøddu týnd allar ævir.

²⁰ Reis teg, Harri, lat ei mann fáa valdið, lat heidningar fáa dóm fyri andliti tínum!

²¹ Loyp á teir ræðslu, Harri, lat heidningar kenna, at teir eru menn! Sela.