Sálmarnir 8 - BÍBLIA

¹ Til songmeistarans; til gittit; ein sálmur av Dávidi.

² Harri, vár drottin, hvør vegligt er navn títt um allan heimin, tú, hvørs dýrd røkkur til himna!

³ Av smábarna og bróstabarna munni tú verju hevur tær gjørt, fyri tína fígginda skuld, fyri øvundarmonnum og hevndsjúkum at steðga.

⁴ Líti eg at tínum himni, fingraverki tínum, mána og stjørnum, sum tú hevur fest –

⁵ hvat er tá maður, at tú minnist á hann, og mannabarn, at tær kemur tað í hug!

⁶ Tú gjørdi hann nærum til Guð, hevur krýnt hann við dýrd og við æru,

⁷ hevur sett hann at ráða yvir handaverki tínum og alt undir føtur hans lagt,

⁸ seyð og oksar, alt tilsaman, markarinnar villdjór tillíka,

⁹ himmalsins fuglar og havsins fiskar, alt, ið á sævargøtum ferðast.

¹⁰ Harri, vár drottin, hvør vegligt er navn títt um allan heimin!