Sálmarnir 4 - BÍBLIA

¹ Til songmeistarans; við streingjaleiki; ein sálmur av Dávidi.

² Svara mær, tá eg kalli, rættvísis Guð mín! Í trongd vanst tú mær rúmd, so náða meg og hoyr mína bøn!

³ Tit menn, hvussu leingi skal heiður mín vera til háð, tit elska fáfongd, fara eftir lygnum? Sela.

⁴ Tit munnu spyrja, at Harrin undurfult fer við tænara sínum; Harrin hoyrir, tá ið eg á hann kalli.

⁵ Harmist, men syndið ikki! Talið í hjørtum tykkara á tykkara legum og verið tigandi! Sela.

⁶ Ofrið rættvísis offur og setið tykkara álit til Harrans!

⁷ Mangir eru teir, ið siga: Hvør vil lata okkum skoða lukku? Lyft yvir okkum, Harri, andlits ljós títt!

⁸ Mær í hjarta tú gleði hevur givið, størri enn teirra, tá tey í yvirflóð hava korn og vín.

⁹ Í friði eg vil bæði leggjast og sovna, tí tú, Harri, meg letur búgva í trygdum, í einingi.