Mika 5 - BÍBLIA

Hin nýggi Dávid

¹ Men tú, Betlehem Efrata, eina minst av Júda túsundum, frá tær skal tó koma hann, sum høvdingi skal vera yvir Ísrael; frá forðum er upphav hans, frá ævinleikans døgum;

² tessvegna gevur hann tey yvir eina tíð, til hon, ið føða skal, hevur átt; tá skulu leivdir ættbrøðra hans koma heim aftur til Ísraelsmanna.

³ Og hann skal standa og goyma at teimum í kraft Harrans, í tignarnavni Guðs síns. Ekkaleys munnu tey tá búgva, tí at mikil skal hann vera alt at endamarkum jarðar.

⁴ Hann skal vera friður: Tá ið Assur herjar á land várt og treingir inn í hallir várar, tá senda vit ímóti honum sjey hirðar og átta mannahøvdingar,

⁵ teir skulu gæta Assurland við svørði og Nimrodland við bregðaðum brandi. Og soleiðis man hann frelsa okkum frá Assur, tá ið hann herjar á land várt og treingir inn á jørð okkara.

Ísrael skal verða mikil og mætastur millum tjóða

⁶ Tá verður millum mangar tjóðir Jákups leivd eins og døgg frá Harranum, eins og regndropar á grasi, sum ongum tráa eftir og ikki bíða eftir mannabørnum.

⁷ Jákups leivdir heidninganna millum, mitt í mongum tjóðum, verða sum ljón millum skógardjór, sum ljónshvølpar í seyðafylgi, sum traðka fyri sær rás og skræða sundur, so at eingin fær bjargað.

⁸ Hond tín skal vera móti óvinum tínum; allir fíggindar tínir skulu týnast.

Harrin vil reinsa Ísrael og hevna seg inn á fíggindar hans

⁹ Á tí degi, sigur Harrin, taki eg frá tær hestar tínar og beini fyri hervagnum tínum.

¹⁰ Eg skal oyða borgirnar í landi tínum og bróta niður øll hervirki tíni,

¹¹ gandasnildið taki eg frá tær, og manarar skalt tú ongar hava;

¹² eg beini fyri gudamyndum tínum og steinsúlum tínum, ið hjá tær eru; ikki skalt tú longur tilbiðja handaverk tíni.

¹³ Eg smildri tínar Ásjerustólpar og sorli skurðgudar tínar.

¹⁴ Síðan man eg við vreiði og ilsku hevna meg inn á tjóðirnar, ið ikki vildu lýða.