Jósvabók 12 - BÍBLIA

Kongarnir fyri eystan Jórdan

¹ Hesir eru teir kongarnir í landinum, ið Ísraelsmenn vunnu sigur á; teir ognaðu sær land teirra fyri eystan Jórdan frá Arnons á og alt at Hermons fjalli, alt slættlendið eystantil:

² Sihon, kongur Ámorita, sum búði í Hesjbon og valdaði øllum landi frá Ároer við Arnons áarbakka, frá miðjum dali yvir helmingin av Gilead alt at Jabboks á, sum er landamark móti Ammonitum,

³ Árábaslættanum alt at Kinnerots vatni eystantil og at Árábahavinum, Salthavinum, eystantil allan vegin alt at Bet-Jesjimot og longur suðureftir alt at Pisgalíðum,

⁴ og Og, kongur av Básjan, sum var ein av teimum Refaitum, ið eftir vóru; hann búði í Asjtarot og Edrei

⁵ og valdaði Hermons fjallabygdum, Salka og øllum Básjan alt at landamarki Gesjurita og Máakatita, helmingi av Gilead at landamarki Sihons kongs í Hesjbon.

⁶ Móses, tænari Harrans, og Ísraelsmenn høvdu vunnið sigur á teimum; og Móses, tænari Harrans, gav Rubenitum, Gáditum og helmingi av ætt Manasse land teirra til ognar.

Kongarnir fyri vestan Jórdan

⁷ Hesir eru teir kongar, ið Jósva og Ísraelsmenn vógu fyri vestan Jórdan frá Báal-Gád í Libanons dali alt at Reynafjalli, ið hevjar seg niðan móti Se'ir; land teirra gav Jósva Ísrael til ognar, hvørji ætt sín lut,

⁸ í fjallalandinum, í láglandinum, á Árábaslættanum, í fjallalíðunum, í oyðimørkini og á suðurlandinum, land Hetita, Ámorita, Kánáanita, Perezita, Hivita og Jebusita:

⁹ Kongurin av Jeriko ein; kongurin av Ai við Betel ein;

¹⁰ kongurin av Jerúsalem ein; kongurin av Hebron ein;

¹¹ kongurin av Jarmut ein; kongurin av Lákisj ein;

¹² kongurin av Eglon ein; kongurin av Gezer ein;

¹³ kongurin av Debir ein; kongurin av Geder ein;

¹⁴ kongurin av Horma ein; kongurin av Árad ein;

¹⁵ kongurin av Libna ein; kongurin av Ádullam ein;

¹⁶ kongurin av Makkeda ein; kongurin av Betel ein;

¹⁷ kongurin av Tappua ein; kongurin av Hefer ein;

¹⁸ kongurin av Áfek ein; kongurin av Sjáron ein;

¹⁹ kongurin av Mádon ein; kongurin av Házor ein;

²⁰ kongurin av Sjimron-Meron ein; kongurin av Aksjaf ein;

²¹ kongurin av Táanak ein; kongurin av Megiddo ein;

²² kongurin av Kedesj ein; kongurin av Jokneam við Karmel ein;

²³ kongurin av Dór á Dórs heiðum ein; kongurin yvir fólkunum í Galileu ein;

²⁴ kongurin av Tirza ein; allir kongarnir tilsamans vóru tríati og ein.