Hósea 6 - BÍBLIA

Harrin krevur sannan kærleika heldur enn offur

¹ «Komið, vit skulu snúgva aftur til Harrans; tí at hann hevur sundurkvett og man grøða okkum aftur, hann hevur sært og bindur um sár okkara;

² eftir tveimum døgum lívgar hann okkum, á triðja degi hann reisir okkum upp, til tess at vit skulu liva fyri ásjón hans.

³ Og vit skulu kenna, ja, strevast eftir Harran at kenna, tí at so satt sum vit leita, skulu vit hann finna; sum regnið skal hann okkum vitja, sum várregn, ið jørðina vætir, og tá skal rættur okkara sum ljósið renna upp.»

⁴ Hvat skal eg gera við teg, Efraim; hvat skal eg gera við teg, Júda? Kærleiki tykkara er jú sum morgunskýggið, sum døggin, ið snimma hvørvur!

⁵ Tí høgdi eg til teirra við profetum mínum og drap teir við orðum av mínum munni.

⁶ Til kærleika er mín hugur, ikki til sláturofra, til kunnleika um Guð meira enn til brenniofra.

Dómsorð yvir prestarnar

⁷ Men teir hava í Ádam slitið sáttmálan; har hava teir verið mær ótrúgvir.

⁸ Gilead er borg illgerðarmanna, full av blóði.

⁹ Ránsmannaflokkur er prestanna flokkur, teir ræna á vegnum til Sikem, og níðingsverk teir inna.

¹⁰ Í Betel sá eg ræðuligar lutir; har hevur Efraim drivið hor, Ísrael gjørt seg óreinan.

¹¹ Júda, eisini tær er upptøka ætlað, tá ið eg vendi fólks míns lagnu og grøði Ísrael.