Hósea 14 - BÍBLIA

Fyrijáttan um frelsu

² Snúgv tær, Ísrael, aftur til Harrans, Guðs tíns; tí at fyri misgerð tína fórst tú.

³ Snúgvið tykkum aftur til Harrans við iðrunarfullum orðum og sigið við hann: «Fyrigev okkum allar misgerðir og ver mildur, og vit skulu greiða tær ávøkst varra vára.

⁴ Vit skulu ikki leita hjálp hjá Assur og ikki ríða á stríðshestum; og ikki skulu vit kalla handaverk okkara gud váran; tí at hjá tær finnur faðirloysingin várkunn.»

⁵ Eg vil grøða fráfall teirra og elska tey av fríum vilja, tí at vreiði mín er vikin frá teimum.

⁶ Eg skal vera Ísrael sum døggin; eins og liljur skal hann blóma og festa røtur sum Libanons skógur,

⁷ breiða út rótangar sínar, standa skrýddur sum oljutræið og anga sum Libanon.

⁸ Aftur skulu tey búgva í mínum skugga, dyrka korn og blóma sum vínviður, víðagitin eins og vínið frá Libanon.

⁹ Hvat skal Efraim gera við hjágudar? Eg bønhoyri hann og líti til hansara. Eg eri sypristræið við grønum leyvi; frá mær fært tú aldin tíni.

¹⁰ Hvør er vísur, at hann skilir hetta, og vitur, at hann fatar tað? Ja, rættir eru vegir Harrans; hini rættlátu skulu ganga teir; men hini gudleysu snáva á teimum.