Hósea 10 - BÍBLIA

Vælferðin veksur um syndina

¹ Ísrael var gróðurmikil vínviður, sum bar sín ávøkst; men sum ávøkstur hansara nørdist, fjølgaðust eisini altar hans; sum vælferð landsins vaks, tess fleiri steinsúlur fekk tað.

² Hál eru hjørtu teirra, men nú skulu tey fáa tað aftur; tí at hann skal sorla teirra altar og smildra steinsúlur teirra.

³ Tey siga jú bart út: «Vit hava ongan kong, tí at Harran óttast vit ikki; og hvat kann kongurin gera fyri okkum?»

⁴ Tey eru stórorðað, svørja rangar eiðir og gera sáttmálar, so at rætturin verður til eitururt, ið veksur fram við hvørjari akurfoyru.

Hovini hjálpa einki, tá ið Assursmenn koma

⁵ Órógvast munnu Sámáriubúgvar um kálvin í Bet-Áven; ja, fólk hans og hovprestar skulu hann syrgja og vena seg um dýrd hansara, tí at hon er frá teimum tikin.

⁶ Eisini hon verður flutt til Assurs, til kongin mikla sum gáva; til skammar skal Efraim verða og Ísrael fáa skemd av gudamynd síni.

⁷ Eins og hjóm á vatni skal kongur Sámáriu hvørva;

⁸ oyddir skulu offurheyggjarnir liggja, har sum Ísrael syndaði, og tornir og tistlar vaksa upp um altar teirra; tá munnu tey siga við fjøllini: «Fjalið okkum!» og við heyggjarnar: «Fallið oman yvir okkum!»

Fólkið revsað við oyðandi ófriði

⁹ Alt síðan á Gibeu døgum hevur tú syndað, Ísrael; har søgdu teir: «Ikki man ófriður ganga á okkum!»

¹⁰ Men eg ráddist á illmennini, agaði teir eftir vild míni og savnaði tjóðirnar móti teimum til tess at revsa teir fyri tvífaldu misgerð teirra.

Efraim hevur havnað góðsku Harrans

¹¹ Efraim var eins og vand kvíga, sum væl dámdi at treskja. Eg legði sjálvur okið á fagra háls hennara, setti Efraim fyri plógvið og Júda fyri harvuna

¹² og segði: «Sáið rættferðar sáð, og skerið upp góðskunnar ávøkst! Brótið upp úr nýggjum lendi kunnleika um Guð og søkið hann, til hann kemur og letur rættlæti regna yvir tykkum.

¹³ Men tit pløgdu gudloysi, bóru inn órætt og ótu lygnarinnar ávøkst. Av tí at tú lítur á vagnar tínar og tínar nógvu kappar,

Fólkið revsað við oyðandi ófriði

¹⁴ tí skal hergný ganga á borgir tínar og hervirki tíni verða oydd, eins og tá Sjalman oyddi Bet-Arbel á orrustudegnum, tá ið møðurnar dripnar fullu oman yvir børn síni.

¹⁵ Svá skal eg gera móti tykkum, Ísraels húsi, vegna hina miklu vándsku tykkara. Um sólarris skal Ísraels kongur farast.