Genesis 9 - BÍBLIA

Sáttmáli Guðs við Nóa

¹ Tá vælsignaði Guð Nóa og synir hans og segði við teir: «Nørist og fjølgist og uppfyllið jørðina!

² Ótti og ræðsla fyri tykkum skal vera yvir øllum djórum á jørð, yvir øllum fuglum himinsins og øllum, sum skríður á jørðini, og yvir øllum havsins fiskum; í valdi tykkara skulu tey vera.

³ Alt, sum rørist og livir, skal vera tykkum til føðslu; eins og hinar grønu urtirnar gevi eg tykkum nú alt hetta.

⁴ Men kjøt, sum sálin – tað er blóðið – er í, skulu tit ikki eta.

⁵ Eg krevji hevnd fyri tykkara egna blóð; av hvørjum djóri krevji eg hevnd fyri blóð mansins; og yvir hvønn mann krevji eg hevnd fyri mannalív.

⁶ Hann, ið úthellir mannablóð, av manni skal hansara blóð verða úthelt; tí at eftir mynd síni skapaði Guð mannin.

⁷ Men nørist tit og fjølgist og fyllið jørðina og leggið hana undir tykkum!»

⁸ Og Guð mælti við Nóa og synir hans, ið hjá honum vóru, og segði:

⁹ «Sí, mín sáttmála vil eg nú gera við tykkum og eftirkomarar tykkara eftir tykkum;

¹⁰ og við allar livandi skepnur, ið eru hjá tykkum, við fuglar og fenað og við øll villdjór á fold, við alt, sum gekk út úr ørkini, við øll djór jarðarinnar.

¹¹ Mín sáttmála geri eg við tykkum, at ongantíð skal alt hold aftur verða oytt av vatnflóð, og ongantíð skal flóð koma aftur til at oyða jørðina.»

¹² Og Guð segði: «Hetta skal vera merki sáttmálans, sum eg geri millum mín og tykkara og allar livandi skepnur, ið hjá tykkum eru, fyri øll komandi ættarlið:

¹³ Boga mín seti eg í skýggið; og hann skal vera sáttmálamerkið ímillum meg og jørðina.

¹⁴ Og hvørja ferð eg dragi skýggini saman yvir jørðina, og bogin sæst í skýggjunum,

¹⁵ tá man eg minnast á sáttmálan, ið er millum mín og tykkara og allar skepnur av øllum holdi; og ikki skulu vøtnini aftur verða til vatnflóð til at oyða alt hold.

¹⁶ Tá ið tá bogin stendur í skýggjunum, skal eg líta at honum til tess at minnast á hin æviga sáttmálan millum Guð og allar skepnur av øllum holdi, sum eru á jørðini.»

¹⁷ Síðan segði Guð við Nóa: «Hetta er merki sáttmálans, ið eg geri millum meg og alt hold, sum er á jørðini.»

Synir Nóa

¹⁸ Synir Nóa, sum gingu út úr ørkini, vóru Sem, Kam og Jáfet; men Kam var faðir Kánáans.

¹⁹ Hesir tríggir vóru synir Nóa; og frá teimum er ættað alt fólkið á jørðini.

Nóa dyrkar vín; orð til synirnar; Nóa doyr

²⁰ Jarðyrkismaðurin Nóa var fyrsti maður, ið legði inn víngarð.

²¹ Tá ið hann nú hevði drukkið av víninum, og hann varð drukkin, lá hann nakin inni í tjaldinum.

²² Tá sá Kam, faðir Kánáans, nakni faðirs síns og fór út og segði tað fyri brøðrum sínum.

²³ Men Sem og Jáfet tóku skikkjuna og løgdu sær á herðar; síðan gingu teir inn aftur eftir hæli og huldu nakni faðirs síns; men andlit teirra horvdu burtur, so at teir sóu ikki nakni faðirs síns.

²⁴ Tá ið Nóa vaknaði úr víndúrinum og fekk at vita, hvat yngsti sonur hansara hevði gjørt honum, mælti hann:

²⁵ «Bølbiðin verði Kánáan! Trælur trælanna verði hann brøðrum sínum!»

²⁶ Og framvegis mælti hann: «Lovaður veri Harrin, Guð Sems! Men verði Kánáan trælur teirra!

²⁷ Guð gevi Jáfeti landarúmd; og búgvi hann í Sems tjøldum; men verði Kánáan trælur teirra!»

²⁸ Nóa livdi trý hundrað og fimmti ár eftir vatnflóðina.

²⁹ Soleiðis vórðu allir ævidagar Nóa níggju hundrað og fimmti ár. Tá doyði hann.