Genesis 5 - BÍBLIA

Ættartal Sets

¹ Hetta er ættartal Ádams. Tá ið Guð skapaði Ádam, skapaði Guð hann sær líkan.

² Sum kall og konu skapaði hann tey; og hann vælsignaði tey og nevndi tey «menniskjur», tá ið tey vórðu skapað.

³ Ádam livdi í eitt hundrað og tríati ár, og hann gat son í líki sínum og eftir mynd síni og nevndi hann Set.

⁴ Og Ádam livdi átta hundrað ár, eftir at hann hevði gitið Set; og hann gat synir og døtur.

⁵ Soleiðis vórðu allir ævidagar Ádams níggju hundrað og tríati ár; tá doyði hann.

⁶ Tá ið Set var eitt hundrað og fimm ára gamal, gat hann Enosj.

⁷ Og eftir at Set hevði gitið Enosj, livdi hann átta hundrað og sjey ár; og hann gat synir og døtur.

⁸ Soleiðis vórðu allir ævidagar Sets níggju hundrað og tólv ár; tá doyði hann.

⁹ Og tá ið Enosj var níti ára gamal, gat hann Kenan.

¹⁰ Og eftir at Enosj hevði gitið Kenan, livdi hann átta hundrað og fimtan ár; og hann gat synir og døtur.

¹¹ Og allir ævidagar Enosjar vórðu níggju hundrað og fimm ár; tá doyði hann.

¹² Tá ið Kenan var sjeyti ára gamal, gat hann Máhálalel;

¹³ og eftir at Kenan hevði gitið Máhálalel, livdi hann átta hundrað og fjøruti ár og gat synir og døtur.

¹⁴ Og allir ævidagar Kenans vórðu níggju hundrað og tíggju ár; tá doyði hann.

¹⁵ Tá ið Máhálalel var seksti og fimm ára gamal, gat hann Jared.

¹⁶ Og eftir at Máhálalel hevði gitið Jared, livdi hann átta hundrað og tríati ár og gat synir og døtur.

¹⁷ Og allir ævidagar Máhálalels vórðu átta hundrað og níti og fimm ár; tá doyði hann.

¹⁸ Tá ið Jared var eitt hundrað og seksti og tvey ára gamal, gat hann Enok.

¹⁹ Og eftir at Jared hevði gitið Enok, livdi hann átta hundrað ár og gat synir og døtur.

²⁰ Og allir ævidagar Jareds vórðu níggju hundrað og seksti og tvey ár; tá doyði hann.

²¹ Tá ið Enok var seksti og fimm ára gamal, gat hann Metúsalem.

²² Og Enok gekk við Guði; og eftir at hann hevði gitið Metúsalem, livdi hann trý hundrað ár og gat synir og døtur.

²³ Og allir ævidagar Enoks vórðu trý hundrað og seksti og fimm ár.

²⁴ Og eftir at Enok hevði livað við Guði, hvarv hann, av tí at Guð tók hann burtur.

²⁵ Tá ið Metúsalem var eitt hundrað og áttati og sjey ára gamal, gat hann Lamek.

²⁶ Og eftir at Metúsalem hevði gitið Lamek, livdi hann sjey hundrað og áttati og tvey ár og gat synir og døtur.

²⁷ Og allir ævidagar Metúsalems vórðu níggju hundrað og seksti og níggju ár; tá doyði hann.

²⁸ Tá ið Lamek var eitt hundrað og áttati og tvey ára gamal, gat hann son;

²⁹ og hann nevndi hann Nóa og mælti: «Hesin skal veita okkum ugga í okkara tunga stríði og strevi á hesi jørð, sum Harrin hevur bannað.»

³⁰ Eftir at Lamek hevði gitið Nóa, livdi hann fimm hundrað og níti og fimm ár og gat synir og døtur.

³¹ Og allir ævidagar Lameks vórðu sjey hundrað og sjeyti og sjey ár; tá doyði hann.

³² Og tá ið Nóa var fimm hundrað ára gamal, gat hann Sem, Kam og Jáfet.