Ámos 7 - BÍBLIA

Tríggjar sjónir um undirgang Ísraels

¹ Harrin, drottin, birti mær hesa sjón: Hann læt ongsprettur kykna upp, so skjótt sum hógvurin tók at grógva og grasið aftur spratt, eftir at kongur hevði sligið.

² Tá ið tær høvdu oyðetið grasið av jørðini, mælti eg: «Á Harri, drottin, fyrigev! Hvussu kann Jákup standast, hann, sum er so vesælur?»

³ Tá iðraði Harrin seg um hetta. «Tað skal verða av ongum,» segði Harrin.

⁴ Harrin, drottin, birti mær hesa sjón: Sí, Harrin, drottin, beyð út oyðandi eldi, sum turkaði upp hitt mikla djúp; men tá ið hann fór at oyða landið,

⁵ mælti eg: «Á Harri, drottin, lætt av! Hvussu kann Jákup standast, hann, sum er so vesælur?»

⁶ Tá iðraði Harrin seg um hetta. «Hetta skal verða av ongum!» segði Harrin, drottin.

⁷ Hesa sjón læt hann mær berast fyri: Sí, Harrin stóð uppi á borgargarði og helt á blýloddi,

⁸ og hann segði við meg: «Hvat sært tú, Ámos?» Eg svaraði: «Blýlodd!» Tá mælti Harrin: «Nú vil eg ræsa blýlodd mitt niður í fólk mítt Ísrael; eg vil ikki umbera tað meira.

Dómsorð yvir hovini og kongaættina

⁹ Ísaks offurheyggjar skulu oyddir verða og Ísraels halgidómar týnast; við svørði eg rísi móti ætt Jeróboams.»

Ámos heimrikin

¹⁰ Tá sendi Ámazja, prestur í Betel, Jeróboami, Ísraels kongi, hesi boð: «Ámos kveikir samansvørjing móti tær í miðjum Ísraels ríki; landið kann ikki bera øll orð hansara.

¹¹ Tí at soleiðis sigur Ámos: Fyri svørði skal Jeróboam falla, og Ísrael herleiddur verða burtur úr landi sínum.»

¹² Og Ámazja segði við Ámos: «Hav teg burtur, síggjari, og slepp tær aftur til Júdalands; har kanst tú vinna tær føðina og profetera har;

¹³ í Betel mást tú ikki longur profetera, tí at her er kongahalgidómur og ríkistempul.»

¹⁴ Tá svaraði Ámos og segði við Ámazja: «Eg eri hvørki profetur ella profetalærusveinur, eg eri seyðamaður og morberjarøktari;

¹⁵ men Harrin tók meg burtur frá fylginum og segði við meg: Far og profetera fyri fólki mínum Ísrael.

¹⁶ Hoyr tí orð Harrans, tú, sum sigur: Profetera ikki móti Ísrael og tala ikki móti Ísaks ætt!

¹⁷ Tessvegna sigur Harrin: Kona tín skal vera skøkja í borgini; synir tínir og døtur skulu fyri svørði falla og jørð tín verða sundurskift við mátingarbandi; sjálvur tú skalt doyggja í óreinum landi og Ísrael verða herleiddur burtur av landi sínum.»