Ámos 6 - BÍBLIA

Dómsorð yvir hinar ekkaleysu tignarmenn

¹ Vei teimum tryggu á Zion og ekkaleysu uppi á Sámáriufjalli, tignarmonnum í hini fremstu tjóðini, sum Ísraels ættarkyn leitar til.

² Farið til Kalne og lítist um, haldið haðan til Hámat, hina miklu, og farið oman til Gát í Filistalandi, eru tit betri enn hesi kongaríki, ella er land tykkara størri enn land teirra?

³ Tit, sum avnokta hin vánda dagin og skipa valdstjórn í sæti,

⁴ sum liggja á fílabeinslegum og rembast, á beðum løgdum við høgindi, eta úr fylginum lomb og kálvar úr alistøðini;

⁵ tit taka undir at murra við hørpuni og seta saman ljóð eins og Dávid,

⁶ drekka vín úr bollum og salva tykkum við úrvalsolju, men kenna onga pínu av sárum Jósefs.

⁷ Tí skulu teir í útlegd fara fremstir í flokki hinna herleiddu; tá tagnar gleimur teirra, sum reika um og einki gera, sigur Harrin Guð herliðanna.

Spádómsorð um drepsótt

⁸ Svorið hevur Harrin, drottin, við sjálvan seg: Eg havi mótboð av Jákups hugmóði, eg hati hallir hans og gevi borgina upp og alt, sum í henni er.

⁹ Og um tíggju mans eru eftir har í einum húsi, skulu eisini teir láta lív.

¹⁰ Og tá ið skyldfólk og líkbrennarar, sum bera skrokkarnar út úr húsinum, rópa á hann, sum er inni á botni í húsinum: «Er nakar eftir hjá tær?» og hann svarar: «Nei!» Tá munnu teir siga: «Tegi, tegi!» Tí ikki má navn Harrans nevnast.

Vegna siðloysi ferst Ísrael

¹¹ Tí at nú býður Harrin: Eg sori tey stóru húsini sundur og smildri tey smærru í spønir.

¹² Munnu hestar renna um hamrar ella oksar pløga havið? Men tit broyta rættin í eitur og rættlætisávøkst í malurt;

¹³ tit gleðast um Lodebar og siga: Hava vit ikki við egnari megi vunnið Karnáim?

¹⁴ Men nú vil eg reisa tjóð ímóti tykkum, Ísraels hús, sigur Harrin, Guð herliðanna; hon skal treingja at tykkum frá Hámat alt at Áraba ánni.