Ámos 3 - BÍBLIA

Guðs fólk harðari revsing enn hini

¹ Hoyrið hetta orð, sum Harrin talar móti tykkum, Ísraelsmenn, móti øllum tí ættarkyni, sum eg leiddi út úr Egyptalandi:

² Einans tykkum kennist eg við av øllum ættarkynjum jarðar; tessvegna revsi eg tykkum fyri allar misgerðir tykkara.

Harrin noyðir profetin at tala

³ Munnu tveir menn leggja ferðalag saman uttan hvør at kenna annan?

⁴ Man ljónið ýla í skóginum, tá ið tað onga bráð hevur? Ella man ungljónið grenja og ongan fong hava fingið?

⁵ Fellur fuglur til jarðar uttan at vera raktur? Man gildran støkka upp frá jørðini, uttan at eitthvørt er í henni?

⁶ Verður blást í lúður innan borgar, uttan at skelkur kemur á fólk? Man í borgini nøkur ógæva berast á, sum Harrin hevur ikki volt?

⁷ Nei, Harrin, drottin, ger einki uttan at birta loyndarráð síni fyri profetunum, tænarum sínum.

⁸ Ljónið ýlir, hvør má ikki óttast? Harrin, drottin, talar, hvør má tá ikki profetera?

Fall Sámáriu

⁹ Rópið út yvir hallir Asdods og tær í Egyptalandi! Sigið: «Savnist saman á Sámáriufjalli og síggið har hin mikla háva og yvirgangin inni í borgini.»

¹⁰ Tey duga ikki at gera tað, sum rætt er, sigur Harrin; valdsgerð og kúgan rúgva tey upp í hallum sínum;

¹¹ tí sigur Harrin, drottin, soleiðis: Fíggindar skulu umringa land títt allar vegir, vernd tín verða tikin frá tær og hallir tínar verða rændar.

Dómur yvir hinar ríku í Sámáriu

¹² So sigur Harrin: Eins og hirðin bjargar úr gapi ljónsins tveimum leggjum og lepa av oyra, soleiðis skulu Ísraelsmenn, ið búgva í Sámariu, komast undan við áklæði legu sínar og hvíldarhøgindi sínum.

¹³ Hoyrið og vitnið móti Jákups húsi, sigur Harrin, drottin, Guð herliðanna;

¹⁴ tann dag eg revsi Ísrael fyri misbrot síni, tá lati eg revsingina raka Betels altar, so at altarhornini støkka av og falla til jarðar;

¹⁵ tá smildri eg bæði vetrarhallir og summarhallir; fílabeinshallir skulu farast og mong hús leggjast í oyði, sigur Harrin.