Zéfanaya 1 - BAYỊBURU Ẹzaa

¹ Ọ waa okfu Onye-Nwe-Ọha kfuru yeru Zéfanaya nwa Kushi ndọwa. Kushi bụ nwa Gédaliya, Gédaliya bụru nwa Amaríya, Amaríya bụru nwa Hezekáya. Nteke o kfuru iya okfu ono bụ nteke Josáya nwa Amọnu shi bụru eze ndu Juda.

Onye-Nwe-Ọha l'a-nụ mgboko awhụ

² “Mu l'a-tụko iwhe lile mee ọzara-l'ukpo, t'ọ bọ dụhe ọwhu l'a-dụkwadu lẹ mgboko. O nokwa iwhe Onye-Nwe-Ọha l'ekfu ndono.

³ Madzụ yẹle anụmanu bẹ mu l'e-me ọzara-l'ukpo. Mu emee ẹnu l'ewhe l'eli yẹle ẹma bu lẹ mini ọzara-l'ukpo. Ndu ejo-ememe bẹ mu l'e-me tẹ whẹ vukota iwhe daa kpọo mkpofu-nchị, bya emee tẹ madzụ tọhu lẹ mgboko.” O nokwa iwhe Onye-Nwe-Ọha l'ekfu ndono.

⁴ “Mu l'a-machịkwa ẹka daa Juda l'ẹhu whẹ lẹ ndu bu lẹ Jerúsalẹmu l'owhu. Iwhe bụ ndu whuduru nụ lẹ ndu l'abarụ Bálu ẹja bẹ mu l'e-me tẹ whẹ chihukota l'alị-a, ẹwha ntẹkpe whẹ echihu, ndu l'agwajẹ iya nụ echihu,

⁵ ndu l'anọduje l'ọma okpotsu-ụlo abarụ ẹnyanwu ẹja yẹle kpokponde mẹe ọnwa echihukota mẹkwawho ndu ono l'abajẹru Onye-Nwe-Ọha ẹja gude ẹwha iya agụ ẹnwa, bya egudekwawho ẹwha Molẹku agụ ẹnwa,

⁶ ndu ono, gbakụtawaru Onye-Nwe-Ọha azụ echihu, mbụ ndu ono, l'ẹte achọje Onye-Nwe-Ọha, whẹ te ejekfuje iya njịta.

⁷ “Unu dakwaa kfụkfurukfu l'iwhu Nnajị-Ọha, bụ Onye-Nwe-Ọha nkele mbọku Onye-Nwe-Ọha l'e-kpe ikpe tẹekwaru l'ụkfu. Onye-Nwe-Ọha bẹ kwakọbekwaru anụ, l'oo-gbu egbu. Ndu o kuru lẹ nri b'o dobekwaru nsọ.

⁸ Mbọku ono Onye-Nwe-Ọha l'e-gbu anụ iya ono bẹ mụbe Onye-Nwe-Ọha l'a-nụ ndu ono, bụ ishi áwhụ yẹle ụnwegirima ibe eze mẹe iwhe bụ-zhia ndu l'eme umere ndu ọha ọdo.

⁹ Mbọku ono bẹ mu l'a-tụko ndu ono nụa áwhụ, bụ iya bụ ndu ono, l'engeghataje ẹka a gbarụ ogodoo engeghata l'ọnu-abata, mbụ ndu ono, bụ iwhe-kpanganga yẹle ụgho bẹ whẹ dojiru l'ụlo onye-nwe-whẹ nụ.”

¹⁰ Onye-Nwe-Ọha l'ekfu sụ: “Mbọku ono bẹ ụzu-ẹkwa l'a-tụ lẹ Ọnoguzo Ẹma, mkpu akpọo lẹ Ẹgu Ọ̀whúú, ugvu g'ugvu ha atụko ahaka ẹnu kpowa kpowa.

¹¹ Unu ryaa ẹkwa tsọo kụrukuru, unubẹ ndu bukube aswa nkele ndu l'agba nghọ b'e gbukotawaru, mbụ lẹ ndu gude okpoga agba nghọ bẹ bụkotawaa kpurupyata.

¹² “O noo nteke mu l'e-ye ọku l'oryọku gvua Jerúsalẹmu choli choli. Mu anụa ndu vutawaru tsụa onwowhe l'ẹnya áwhụ, mbụ ndu ono, dọru chịriri g'ọo ike mmẹe; ndu l'anọje ekfu l'ime obu whẹ sụ l'ọ tọ dụdu iwhe Onye-Nwe-Ọha bya l'e-me whẹ; l'o too medu mma too me njọ.

¹³ Ndu ono bẹ l'aa-vụ ẹku whẹ l'akpaa, ụlo whẹ ezekposhihu. Whẹ l'a-tụ ụlo, ọle whẹ te ebudu iya ebu. Whẹ akọo mgbu vayịnu, ọle whẹ ta angụdu mmẹe shi iya nụ.”

¹⁴ Oke mbọku ono, Onye-Nwe-Ọha l'e-kpe ikpe bẹ dụakwa ntse, ọ dụwa ntse; ọobya-kebekwa ẹgwegwa. Ụtumu, l'a-kpọ mbọku nke Onye-Nwe-Ọha ono l'a-dụkwa ejo ẹji. Ndu ike dụ l'ọgu l'e-chikwa oji-l'ẹka-tọgbo.

¹⁵ Mbọku ono l'a-bụ mbọku oke ẹhu-eghughu nke Chileke. Mbọku ono l'a-bụru mbọku oke iwhe-ọtsulanu yẹle oke ntsọmawhu. Mbọku ono abụru mbọku ọla-l'iswi yẹle kpurupyata. Mbọku ono l'a-gbakọta ẹkpuroochi, igweli ekpukota ekpukpu. Mbọku ono bẹ urwukpu l'a-sọ-kputa ẹka lile, ẹka lile agbakọta tsụrirkiti.

¹⁶ Mbọku ono bẹ opu-ọgu l'a-sọshihu, mkpu-ọgu adashịhu lẹ mkpụkpu ono, a tụ-wheru mgbodo mgburumgburu mẹe l'ụlo-eli ewhekerewhe ono, dụ iya nụ.

¹⁷ “Mu l'e-wokfuta madzụ iwhe-ọtsulanu nke ọwhu whẹ l'e-je dakirishi dakirishi g'ọo onye ishi guderu. O noo nkele whẹ mewaru Onye-Nwe-Ọha iwhe-dụ-ẹji. Aa-ghakashị mmee whẹ g'ọo onye ghakaru ẹja, a tụkaa anụ whẹ nnanụ nnanụ g'ọo onye tụkaru nshị.

¹⁸ “Mkpọla-ọcha whẹ mẹe mkpọla-ododo whẹ ta adụkwa ike anafụta whẹ mbọku ono, Onye-Nwe-Ọha l'e-goshi oke ẹhu-eghughu iya. Ọku nke okoowhoo ya bẹ l'a-tụko mgboko l'owhu rechafu. Oo-mee t'iwhe, bukota lẹ mgboko l'owhu tọhu ntọhu lanụ.”