Rutu 4 - BAYỊBURU Ẹzaa

Bóazu lụru Rutu

¹ O noo ya, Bóazu bya atụgburu jeshia ọnu-abata mkpụkpu ono je anọ-zeta l'ẹka ono. Ọ bya l'eledeshia ẹnya, abụbu abụlitaru whẹ ono, o kfujeru Rutu okfu iya l'ejewa abya. Ọo ya bụ, Bóazu kua ya oku sụ iya: “Ọnya mu bya bya anọdu anọdu l'ẹka-a.” Ọo ya bụ, ọ tụgburu jekfushia ya je anọ-zeta.

² Bóazu bya ekua unwoke iri, bụ ndu bụ ọgurenya mkpụkpu ono sụ whẹ: “Unu bya anọdu anọdu l'ẹka.” Whẹ bya anọdu.

³ Tọ dụ iya bụ, ọ sụ abụbu whẹ ono: “?Ọ kwa l'ị marụ Nawomi, bụ onye ono shi alị ndu Moabu lwa? Ọobyakwa tẹ ya ree alị abụbu anyi Elimẹleku.

⁴ Mu rịa l'ọ dụ ree tẹ mu mee t'ị marụ, ekfukwawho t'ị zụa alị ono. Ọ -bụru l'ị chọru alị ono, ọo ya bụ t'ị nọdu l'iwhu ndu-a, nọ l'ẹka-a mẹe l'iwhu ndu bụ ọgurenya anyi-a zụa ya. Ọ -bụru l'ọo agbata bẹ l'ịi-gbata iya, gụ agbata iya. Nteke bụ l'ị tịi gbatadu iya, gụ akarụ mu tẹ mu marụ nkele ọ tọ dụdu onye ọdo, ọ gbarụ l'agbata iya, t'a gụfu-zhiawho gụbedua; mbẹdua l'etsona ghu-a.” Abụbu whẹ ono bya asụ: “Mu l'a-gbata iya-a.”

⁵ Bóazu sụ iya: “Ọ dụ mma, ị -zụa alị ono l'ẹka Nawomi bẹ l'ịi-lụpyabekwawho Rutu, mbụ nwanyị-mbunu ono, shi Moabu nke ọwhu l'ọo-nwụta ụnwu, l'a-bya enweru alị ono t'ẹwha onye ono, nwụhuwaru be echihu.”

⁶ Abụbu whẹ ono sụ: “Ọ -dụnu nno bẹ mu l'ẹte agbatadu alị ono nkele mu -gbata iya bẹ mu tseberu oke-alị mu l'ọnu ogu. Gbatachia ya gụbedua lẹ mu ta agbatadu.”

⁷ Omelalị ndu Ízurẹlu l'oge ndụ-ichee shi abụje, ọ -bụru l'o nweru onye l'eme tẹ ya gbata iwhe agbata m'ọ bụ tẹ ya gbanweta iwhe agbanweta l'ẹka onye ọdo, iwhe l'eegudeje mee ya t'o shihu ike bụ l'onye ono l'eyetaje akpọkpa iya woru nụ onye ọwhua t'o gude. O noo ụzo, e shi egudeje eme t'iwhe vuru ire l'alị ndu Ízurẹlu.

⁸ Ọo ya bụ, abụbu whẹ ono bya eyefuta akpọkpa iya sụ Bóazu: “Zụa ya rọ gụbedua.”

⁹ Tọ dụ iya bụ, Bóazu bya asụ ndu bụ ọgurenya ono mẹe ndu nọkota l'ẹka ono sụ whẹ: “Ntanụ-a bẹ unu bụwaa ndu ẹka-ebe lẹ mu zụwaru Nawomi iwhe lile, bụ nke Elimẹleku mẹe nke Kiliyọnu mẹe nke Mahụlonu.

¹⁰ O nokwawho gẹ mu lụpyaberu Rutu, bụ nwanyị-mbunu, shi Moabu, mbụ nyee Mahụlonu nke ọwhu l'oo-doberu nwoke ono, nwụhuru anwụhu ono akọ; t'ẹwha iya ba atọhu atọhu l'ọzo-ụlo ụnwunna iya mẹe lẹ mkpụkpu, a nwụru iya anwụ. Unu bụwaa ndu ẹka-ebe ntanụ-a.”

¹¹ Tọ dụ iya bụ, ndu bụ ọgurenya ono mẹe ndu ono, nọkota l'ọnu ẹka ono tụko zụa mgbede sụ: “Anyi bụ ndu ẹka-ebe. Tẹ Onye-Nwe-Ọha mekwaa nwanyị ono, l'abata ibe ghu t'ọ dụ g'ọo Réchẹlu yẹle Lii, ndu bụ whẹ metakotaru ọzo-ụlo ndu Ízurẹlu. Bụkwaru onye ẹka atụtu l'alị Ifurata, gụ abụru onye a marụ ẹwha iya lẹ mkpụkpu Bẹ́tulehemu.

¹² T'ụnwegirima, Onye-Nwe-Ọha l'e-shi l'ẹka nwọgbaga-a nụ ghu mekwa t'ọzo-ụlo ghu dụ g'ọo nke Pẹ́rezu ono, Tama nwụtaru Juda.”

Eri Dévidi

¹³ Ọo ya bụ, Bóazu duta Rutu, ọ bụru nyee ya. O jekfu iya azẹe, Onye-Nwe-Ọha bya emee ọ tsụta ime nwụa nwa nwoke.

¹⁴ Ụnwanyi kfulahaaru Nawomi sụ: “T'ajaja bụru nke Onye-Nwe-Ọha, onye meru t'i nweru abụbu, l'e-leta ghu ẹnya. Tẹ nwata ono bụkwaru onye a hụberu ama l'alị Ízurẹlu.

¹⁵ Nyee nwa ghu bẹ yeru ghu obu, bya emewaru ghu iwhe ụnwegirima unwoke ẹsaa l'ẹtege emeru ghu. Ntaa b'ọ nwụtawaru ghu nwanwa, bụ onye l'e-me t'i tsefu nwẹpa, bya abụru onye l'e-le ghu nka.”

¹⁶ Tọ dụ iya bụ, Nawomi bya ekuta nwata ono tụa l'ụtakfu, ọ bụwaru iya rọ l'ehe iya.

¹⁷ Ụnwanyi obutobu whẹ bya asụje: “A nwụwaru Nawomi nwa nwoke.” Whẹ gụa ya Óbẹdu. Óbẹdu ono megee bụru nna Jesi, Jesi megee bụru nna Dévidi.

¹⁸ Ọ waa bụ eri Pẹ́rezu: Pẹ́rezu bụ nna Hẹzuronu,

¹⁹ Hẹzuronu bụru nna Ramu, Ramu bụru nna Amínadabu,

²⁰ Amínadabu bụru nna Nahụshonu, Nahụshonu bụru nna Sálụmonu,

²¹ Sálụmonu bụru nna Bóazu, Bóazu bụru nna Óbẹdu,

²² Óbẹdu bụru nna Jesi, Jesi bụru nna Dévidi.