Rutu 3 - BAYỊBURU Ẹzaa

Rutu jekfuru Bóazu l'ẹka l'eechishi balị

¹ O be ujiku lanụ, Nawomi, bụ nniko Rutu sụ iya: “Ada mu, mu byakwa l'eleru ghu ẹnya ji, l'a-lụ ghu nụ, bụ onye l'e-me t'obu rwua ghu alị, bụru onye l'e-leta ghu ẹnya.

² Ntaa b'o dowaru ghu ẹnya lẹ Bóazu bẹ anyi l'iya bụ ọkpobe abụbu, mbụ onye ono, gụ l'ụnwumgboko, l'ejeru iya ozhi shi tsoru achịko balị iya. L'ẹnyashi ntanụ bẹ l'ọo-nọ awhụchashi mkpaba lẹ balị iya l'ẹka ono, l'aanọje echishi balị.

³ Iwhe l'ii-me bụ t'i je aghụa ẹhu, gụ ehua mmanụ-mbeleke, chịta uwe ghu ọwhu kagezhia ree yee, tụgburu jeshia ẹka ono, l'eechishije balị ono. Ọle be emekwa t'ọ marụ l'ị nọ l'ẹka ono jeye ya erigezhia nri, bya ngụa iwhe-angụngu.

⁴ Lezhita ẹnya ree marụ ẹka ọ zẹe azẹe. Nteke o kuleruwho mgbẹnya, gụ atụgbua je awhụliberu iya iwhe l'ụzo ọkpa zẹkube iya. Ọo-karu ghu-a iwhe l'ii-me.”

⁵ Rutu sụ iya: “Iwhe lile, ị sụru tẹ mu mee bẹ mu l'e-mekotagezhia g'ọ ha.”

⁶ Ọo ya bụ, ọ tụgburu jeshia ẹka ono, l'eechishije balị ono je emekota iwhe ono, nniko iya sụru iya t'o mee g'ọ ha.

⁷ Nteke Bóazu rigeeru nri, bya ngụa iwhe-angụngu bẹ ẹhu kpẹneshihuru iya, ọ tụgbua je azẹ-zhita l'iku ẹka ono, a kụberu balị. Rutu tọ nwẹhu pyaa apyapya je awhụliberu iya iwhe l'ụzo ọkpa zẹkube iya.

⁸ O rwua lẹ nderi, Bóazu lubirihu, ghaa aghagha, bya awhụ lẹ nwanyị zẹe ya l'ụzo ọkpa.

⁹ Ọ jịa sụ: “?Ị bụ onye?” Ọ sụ: “Ọo mu bụ Rutu, nwanyị l'ejeru ghu ozhi, lụpyabenu mụbe onye ozhi ghu nkele ị bụ abụbu anyi, gbarụ t'o leta anyi ẹnya.”

¹⁰ Ọ sụ iya: “Tẹ Onye-Nwe-Ọha gọoru ghu ọnu-ọma, ada mu. Ree ọwa kakwa ọwhu i vuhawaa ụzo mee shii nkele ị tị kpadụ ishi t'i whetsoru unwokoro nweru iwhe mẹe unwokoro darụ ụkpa.

¹¹ Ada mu; ba atsụshi egvu, mu l'e-mekotaru ghu iwhe ị sụru tẹ mu meeru ghu nkele ndu mkpụkpu anyi l'owhu makọtawaru l'ị bụ nwanyị, umere iya dụ ree.

¹² Ọo ezhi-okfu b'i kfuru lẹ mu l'unu bụ ọkpobe abụbu. Obenu l'o nweru abụbu ọdo, unu l'iya ka abụlitaru karụ mbẹdua.

¹³ Nọdu l'ẹka-a l'ẹnyashi-a t'a fụta ụtsu, tẹ mu marụ, ọ -bụru l'ọ bụ obu onye ono t'o meeru ghu iwhe gbarụ tẹ abụbu madzụ meeru iya, b'ọ dụkwa ree t'o mee ya. Nteke bụ l'ọ tọ chọdu tẹ ya meeru ghu iwhe gbarụ tẹ abụbu madzụ meeru iya, ọo ya bụ, lẹ Onye-Nwe-Ọha vuru-a ishi iya g'o vu iya, bẹ mu l'e-meru ghu iya. Zẹe nwandoo t'a fụta ụtsu.”

¹⁴ O noo ya, Rutu zẹe ya l'ụzo ọkpa jeye a fụta l'ụtsu. Chi tẹke asahụ-ree nteke madzụ l'a-whụ ibe iya hụbe iya ama, Rutu gbalihu. O noo nkele Bóazu bẹ kfuru iya sụ t'o bo mekwa tẹ madzụ marụ lẹ nwanyị byarụ ẹka ono l'eechishije akpụru balị.

¹⁵ Bóazu bya asụ iya: “Tọfuta ẹkwa ono, i gude whụ-kpua onwoghu ono tụsaa ya atụsa.” Ọ bya atụsaa ya, Bóazu gude iwhe l'atụje balị tụta iya ishii yeru iya l'ẹkwa ono; kekobe iya bo iya. Ọ tụgbua bahụ l'ime mkpụkpu.

¹⁶ Nteke Rutu lakfuru nniko iya, bụ Nawomi, ọ jịa ya sụ: “Ada mu, ?ndẹe g'i jezhiaru iya?” Tọ dụ iya bụ, Rutu bya akọkotaru iya iwhe nwoke ono meru iya g'ọ ha,

¹⁷ sụkwa iya whọ, l'o gude iwhe tụta balị-a ugbo ishii nụ iya sụ tẹ ya ba agbashi ẹka lakfu nniko iya.

¹⁸ Nawomi bya asụ iya: “Takwaa nshi ada mu, t'ị marụ iwhe l'e-bekochaa mee nkele Bóazu ta abyadụ l'a-nmakfuru anmakfuru jeye ya awhụ ishi iya ntanụ.”