Rutu 2 - BAYỊBURU Ẹzaa

Rutu yẹle Bóazu l'edzuda

¹ O noo ya, Nawomi bẹ nweru nwoke lanụ bụ onye abụbu ji iya Elimẹleku, mbụ onye yẹle Elimẹleku bụ ẹnya-uwhu lanụ. Nwoke ọbu nweru iwhe shii, bụru oke amadụ. Ẹwha iya bụ Bóazu.

² O rwua ujiku lanụ, Rutu, nwanyị Moabu sụ Nawomi: “Hanụa tẹ mu jee l'ẹgu ẹka a kpatawaru iwhe je akpaa akpa. Mbụ tẹ mu marụ, o nweru onye l'e-kwe haa mu tẹ mu kpaa mkpakwa balị l'ẹgu iya.” Nawomi sụ iya: “Ada mu, jeshia.”

³ Ọ bya atụgburu jeshia ọkpa akpa l'ẹgu, l'ootso ndu l'emeta iwhe e meberu l'alị ono l'azụ l'azụ akpa mkpakwa iya. Ọ dafụta l'ọo l'ẹgu nke Bóazu, bụ onye ẹnya-uwhu Elimẹleku b'o jeru.

⁴ Ọ bụleruwho nteke ono bẹ Bóazu shi lẹ Bẹ́tulehemu bụru whẹrekete. Ọ bya ekele ndu ono, l'emeta iwhe e meberu l'alị ono sụ whẹ: “Tẹ Onye-Nwe-Ọha swiru unu ọkpobe eswiru!” Whẹ sụ iya: “Tẹ Onye-Nwe-Ọha gọoru ghu ọnu-ọma.”

⁵ Tọ dụ iya bụ, Bóazu bya ajịa onye l'ejeru iya ozhi, bụkwa iya whọ bụ onye ishi ndu ono, l'emeta iwhe e meberu l'alị ono sụ iya: “?Ọo nwamgbọko ibe onye bẹ dụ ẹgube whọ?”

⁶ Onye ozhi iya ono bụ iya bụ onye ishi ndu ono, l'emeta iwhe ono, e meberu l'alị ono sụ iya: “Ọo nwamgbọko, shi Moabu, onye yẹle Nawomi lị shi l'alị ndu Moabu lwa.

⁷ Ọ byarụ bya asụ: ‘Byiko, hanụa tẹ mu tsoje ndu-a, l'ebu balị-a l'azụ l'azụ akpa mkpakwa iya, ekpoko ndu ọwhu rishihuru erishihu l'ime iya ndu ọwhu e sweshiru esweshi.’ Ọ kwa iya bụ l'ọ bya. Eshi ụtsu, ọ byarụ bẹ l'ooto sefudua ẹka esefu l'ọrwu byeye ntaa. T'a gụfu-zhiawho nwume, ọ tụtaru nwanshị lẹ nwụlo-ẹgu.”

Rutu l'atụba Bóazu l'ẹnya

⁸ Bóazu bya asụ Rutu: “Ada mu, gebe nchị: Be ejekwa l'iije mkpakwa balị l'ẹgu onye ọdo, gụ eje alụfukwa alụfu l'ẹka-a. Nọpyabelekwawho l'ẹka-a, gụ akpakụbeje ụnwumgboko, l'ejeru mu ozhi.

⁹ T'ẹnya ghu tsụlekwaruwho l'ẹka whẹ l'ebu balị ono. Gụ etso ụnwumgboko ono l'azụ l'azụ. Mu kfuakwaru unwokorọbya-a tẹ whẹ ba anọnyakwaa chọo ghu okfu. Nteke ẹgu mini gụtaru ghu, gụ eje je angụta iya l'ite ono, unwokorọbya ono, sejishiru mini sụbe.”

¹⁰ O noo ya, Rutu daa kpube iwhu l'alị sụ iya: “?Ndẹ-zhia gẹ mu meru tụba-kebe ghu l'ẹnya ẹgube ọwa, nke anyata mu, lẹ mụbe onye ọha ọdo?”

¹¹ Bóazu sụ iya: “A kọkotakwaru mu iwhe lile, i shi metaru nniko ghu nkele ji ghu nwụhuru mẹe lẹ g'i gude haa nna ghu yẹle ne ghu mẹe alị ẹka a nwụru ghu anwụ lwakfutashia ndu l'ịitii mahawaa.

¹² Tẹ Onye-Nwe-Ọha bua ghu obunggo iwhe ono, i meru. Tẹ Onye-Nwe-Ọha, bụ Chileke nke Ízurẹlu, mbụ onye ono, ị gbabaru lẹ mkpula akwẹka iya bya anọdu ezeru ndzụ kfụa ghu ụgwo iya kfụ-dzua ghu iya akfụ-dzu!”

¹³ Rutu bya asụ: “Onye-nwe-mu nụ, tẹ mu tụbalekwa ghu whọ l'ẹnya ẹgube ono, mu tụbaru ghu iya jeyewaro. O noo nkele ị dụwaru mu obu, bya ekfuwaru okfu njima nụ mụbe nwozhi ghu nwanyị, l'ẹka mu l'ẹte adụkwa nụ g'ọo ẹka ụnwumgboko, l'ejeru ghu ozhi dzọru ọkpa m'ọo onye lanụ.”

¹⁴ Ọ bya agbabe l'ori nri, Bóazu sụ iya: “Kpịlitaru ẹka bya eria nri. Narụ buredi tsutaje lẹ mmẹe taa.” Ọo ya bụ, o je anọkube ndu ono, l'ebu balị ono. Bóazu wezhiaru iya balị, a hụru ahụ, ọ tata ike iya jeye ẹwho ji iya, uwhudu whudukwaduro.

¹⁵ O megee bya agbalihu tẹ ya je akpakwaa mkpakwa balị, l'ọokpakwa; Bóazu kfuru unwokorọbya iya sụ: “Unu hakwaa ya t'ọ kpatajẹ balị ono l'ẹka ọ whọru ishi, t'unu ba agbọkwa iya mgbọjo.

¹⁶ Iwhe unu l'e-mechia bụ t'unu harụ jịshiaru iya ọwhu unu swewaru esweswe t'o kpokoo. Unu ba abakwarụ iya mba.”

¹⁷ Ọo ya bụ, Rutu nọdu l'ẹgu akpakwazhiawho mkpakwa balị ono jeye urwẹnyashi bya. Ọ bya echishia akpụru balị ono, ọwhu ọ kpakwataru, o ji efere nkwẹka.

¹⁸ O vulia ya, ọ bụru iya ọbahu l'ime mkpụkpu. Ọ larwua bya egoshi nniko iya gẹ ọwhu ọ kpatarụ habe. Ọ bya ewofutakwawho nri whọ, o ritaru riwhodo eriwhodo woru nụ nniko iya ono.

¹⁹ Nniko iya ono sụ iya: “?Ọo awe b'i jeru mkpakwa ntanụ? ?Ọo awe b'i jeru ọkpa akpa ọwa? T'onye ọwhu natarụ ghu ẹgube ọwa bụkwaru onye a gọru ọnu-ọma nụ!” Tọ dụ iya bụ, Rutu bya akọoru nniko iya ono nke onye ya nọdu kpaa mkpakwa akpụru balị ono sụ iya: “Ẹwha onye mu jeru l'ẹgu iya ntanụ bụ Bóazu.”

²⁰ Nawomi sụ nyee nwa iya ono: “Tẹ Onye-Nwe-Ọha gọoru onye ọbu ọnu-ọma! Mbụ Onye-Nwe-Ọha, bụ onye l'ẹte egoshibuhuje ndu nọ ndzụ mẹe ndu nwụhuwaru anwụhu lẹ ya yeru whẹ obu. Nwoke ono bẹ anyi l'iya bụkwa abụbu, o tsokwa lẹ ndu anyi lẹ whẹ bụ ọkpobe abụbu.”

²¹ Rutu, nwanyị ono, shi Moabu sụ iya: “Iwhe ọdo, o kfufuaru mu bụ tẹ mu kụje ndu l'ejeru iya ozhi ẹhu jeye nteke whẹ l'e-buge balị iya ọbu.”

²² Nawomi sụ nyee nwa iya ono, bụ Rutu: “Ada mu; ọ kakwarụ ghu mma, t'i tsoje ụnwumgboko, l'ejeru iya ozhi nkele i -jee l'ẹgu onye ọdo bẹ l'aa-chọ ghu okfu.”

²³ Tọ dụ iya bụ, Rutu wata ọku ụnwumgboko ono, l'ejeru Bóazu ozhi ẹhu, o tsoru whẹ akpa mkpakwa balị jeye e bugee balị mẹe witi. Rutu yẹle nniko iya ono buru gẹ whẹ bu.