Ọwhulenya 1 - BAYỊBURU Ẹzaa

¹ Ọ waa bụ ọwhulenya, Chileke shi l'ẹka Jisọsu Kuráyisutu goshi ndu l'ejeru Chileke ozhi. Ọwhulenya-a b'e gude goshi iwhe l'ẹte a-nọhe ọdu ntaa, ya anwụkota. Jisọsu Kuráyisutu bẹ zhiru ojozhi-imigwe iya t'o je egoshi Jọnu, bụ onye ozhi iya iwhe ono g'ọ ha, nke ọwhu l'aa-marụ iya.

² Ọo iwhe lile, Jọnu whụru b'ọ tụkoru g'ọ ha kfukota. Ọ bụru l'ẹkwo-ọ l'ẹka-a bẹ Jọnu deshikotaru okfu ono, Chileke kfuru. Iwhe lile ono bẹ bụkota ọkpobe okfu, Jisọsu Kuráyisutu ono goshikotaru iya.

³ Ẹhu-ụtso bẹ Chileke nụru iwhe bụ onye l'agụ ẹkwo-ọ, e deru okfu, e kfuchiru Chileke. Ẹhu-ụtso bẹ Chileke nụkwaruwho ndu nụru iya nụ; ngabẹ iya nchị; eme iya eme. Lẹ nteke iwhe lile-e l'e-mekota bẹ dụakwa ntse.

Jọnu l'ekele chọchi ẹsaa

⁴ Ọo mbẹdua, bụ Jọnu bẹ l'ekele unubẹ chọchi ẹsaa ono, dụkota l'alị Éshiya ekele. T'eze-iwhe-ọma mẹe ẹhu ọdu guu, shi l'ẹka Chileke bụru nke unu. Mbụ Chileke ono, bụ onye nọ ndzụ; bụru onye shihawaaro nọdutahawaa tẹmenu mgboko dụ; tẹmenu ọ bụru iya bụ onye ono, l'a-bya nụ ono. T'eze-iwhe-ọma, shi iya l'ẹka mẹkwawho ọwhu shi l'ẹka Ume ẹsaa, shi l'ẹka Chileke bụru nke unu jeyewaro, mbụ Ume ẹsaa ono, l'anọduje l'atatiwhu oshi-eze Chileke.

⁵ Eze-iwhe-ọma mẹe ẹhu ọdu guu ono shikwawho l'ẹka Jisọsu Kuráyisutu, mbụ onye l'akfụshije ike l'iwhe lile, l'ookfuru. Ọo ya bụ onye mbụ, Chileke meru; o shi l'ọnwu teta nọdu ndzụ; ọ bụkwaru iya whọ bẹ bụ onye l'achịkota iwhe lile, bụ ndu eze lẹ mgboko-o. Ọo ya bụ onye l'eyejezhiewho anyi obu; ọ bụru obu ono, o yeru anyi bẹ meru; ọ nwụ-chiaru anyi ọnwu, anyi gẹge anwụ; ọ bụkwaruwho mmee ya b'o gude tọshia anyi l'ẹgbu ono, iwhe-dụ-ẹji shi kee anyi.

⁶ Ọ bya emee anyi; anyi bụru eze; mekwaawho anyi; anyi bụru ndu l'agbajẹ ẹja nụ Chileke, mbụ ndu l'ejeru Chileke, bụkwawho Nna iya ozhi. T'ajaja mẹe ike bụkotaru nke Jisọsu jeye lẹ tututu-mịmimi. O noo g'ọ dụ.

⁷ Unu lekwawho l'ọ nọokwaa l'urwukpu abya. Madzụ lile l'e-gudekota ẹnya whẹ whụ iya. Ndu lile ono, nmarụ iya arwa bẹ l'a-whụkwa iya whọ. Mba lile, dụ l'eli-mgboko-o bẹ l'a-ryakọta ejo ẹkwa l'okfu ẹhu iya. O noo iwhe l'e-me nu ndono-o. O noo g'ọ dụ.

⁸ Chileke, bụ Onye-Nwe-Ọha bẹ l'ekfu sụ: “Ọo Mu bụ Álụfa bụru Oméga, mbụ onye ono, nọ ndzụ, bụru onye shikwawho eshi nkeshi nọduta tẹmenu mgboko dụ, bụru onye ono, l'abya nụ ono; ọo mu bụ Ọkalibe-kakọta-ike.”

Jọnu whụru Jisọsu Kuráyisutu l'ọwhulenya

⁹ Ọo mbẹdua bẹ bụ Jọnu, bụkwawho nwanna unu, mbụ onye mu l'unu tụkoru bụru ndu whẹ lẹ Jisọsu tụgbaru bụru nnanụ, ọ bụkwanuru iya meru mu l'unu l'agbajẹ mgba ejekota iwhe-ọtsulanu lile, anyi l'eje; tẹmenu mu l'unu tụko bụru ndu Chileke bụ eze lẹ ndzụ whẹ. Mu l'unu l'agbajẹkwawho mgba nwụ-gbua iwhe l'obu. O nweru nteke ọbu, a kpụtaru mu je edobe lẹ Pátụmosu, bụ alị mini gbawheru mgburumgburu, nkele ọo lẹ mu l'ekfu okfu Chileke mẹkwawho nkele mu l'ekfuru madzụ lile nke ọkpobe iwhe ono, okfu Jisọsu Kuráyisutu goshiru mu.

¹⁰ Ọ bya ebe ujiku lanụ ọbu, bụ mbọku Sọnde; Ume Chileke bya ejizhia mu who ẹhu; mu whụlahaa awhụ. Mu l'awhụ awhụ ono; bya anụa olu ọbu, l'adazhiawho ikike ikike g'ọo opyi-ọku l'ụzo azụ mu.

¹¹ Olu ono sụ mu: “Jọnu! Dekotagezhikwaa iwhe lile-e, ị bya l'awhụ l'ẹkwo. I -degee ya; gụ ezhilahuru iya chọchi ẹsaa-a, mu bya l'a-gụshi. Chọchi ẹsaa ọbu, l'ii-zhilahuru iya bụ chọchi Éfesọsu mẹe chọchi Suména mẹe chọchi Pégamọmu mẹe chọchi Tayatáyira mẹe chọchi Sádisu mẹe chọchi Filadélufiya mẹe chọchi Leyodisíya.”

¹² Mu bya aghaa ẹnya l'azụ tẹ mu whụada onye ono, l'ekfu eyeru mu. Mu bya aghaa ẹnya ono mu whụa oryọku ẹsaa. Oryọku ẹsaa ono bụkota mkpọla-ododo b'e gudegee mee ya.

¹³ L'echilabọ oryọku ẹsaa ono b'o nweru onye kfụru iya nụ, dụ-zhiawho g'ọo Abụbu Ndiwhe. O yee uwe mkpẹelanu. Ọ bya egudekwawho ajị, e gude mkpọla-ododo mee, gude kebuta uwe iya ono l'ume.

¹⁴ Ẹgbushi, dụ iya l'ishi bẹ l'achazhiawho degedege g'ọo ẹji atụru, kweru ọcha ụcha, mbụ ọ chagezhiaru chaa g'ọo eberugo. Ẹnya iya dụ-zhiawho g'ọo iwhoro ọku, l'enwu enwu.

¹⁵ Ọkpa iya whẹ ẹbo l'egbuzhiawho zhịizhii g'ọo mkpụrumkpu igwe, l'ama ụma, a hụru l'ọku jeye ọ chaa acha, mbụ hụta iya jeye o gbuchafu. Ọ bya ekfua okfu; olu iya l'aadalẹwho g'ọo ẹka eze mini l'awhụ gbudugbudu.

¹⁶ Ọ chịru kpokponde ẹsaa l'ẹka-ụtara iya. Ogu-ịgba, l'atsụ nkọ iwhu labọ shi iya l'ọnu afụta. Iwhu onye ono l'egbuzhiawho zaazaa g'ọo iwhu ẹnyanwu nteke ẹnyanwu lwarụ l'ishi.

¹⁷ Mu whụa ya, mu daa kpube iwhu lẹ mgboro ọkpa iya; dabuzhiaruwho g'ọo onye nwụhuru anwụhu. Ọ bya abyabẹ mu ẹka-ụtara iya asụje mu: “Ba atsụshi egvu, ọo mbẹdua bụ Onye Ivurụzo bụru Onye Ikpazụ.

¹⁸ Ọo mbẹdua bụ onye nọ ndzụ tututu-mịmimi. Abyabya, mu shi bya lẹ mbụ bụkwa tẹ mu bya anwụhu; mu nwụhukwa ọbu. Ọle lekwa lẹ ntaa bẹ mu nọokwa ndzụ tututu-mịmimi. L'irigodo, l'eegudeje tụhaa ẹka ọnwu nọ mẹe ọwhu l'eegudeje tụhaa alị-maa bẹ kwa mu gudekota iya.

¹⁹ Iwhe l'ii-me ntaa bụ: iwhe lile-e, ị whụkotawaru-a bẹ l'ii-de l'ẹkwo. I -degele iya who, gụ edee iwhe ọwhu l'egoshi g'iwhe dụ dụ nta-a, tẹmenu gụ edede iwhe ọwhu l'e-mekwanu lẹ mgbe l'iwhu.

²⁰ A bya abya lẹ kpokponde ẹsaa-a, mu chị l'ẹka-ụtara mẹe oryọku ẹsaa ono, e gude mkpọla-ododo mee, bẹ mu bya l'a-karu ghu iwhe o nochiru ẹnya iya. Lẹ kpokponde ẹsaa ono bẹ nochiru ẹnya ojozhi-imigwe, mbụ ojozhi-imigwe, l'anọje elekotagee chọchi ẹsaa ono. Oryọku ẹsaa ono nochia ẹnya chọchi ẹsaa ono.”