Ọ́gú 9 - BAYỊBURU Ẹzaa

Oge O-je-ghata

¹ L'ọnwa mbụ l'awha kwe ndu Ízurẹlu awha labọ nkele whẹ shi l'alị Íjiputu fụta bẹ Onye-Nwe-Ọha kfuru yeru Mósisu l'echi-ẹgu Sáyinayi sụ iya:

² “Tẹ ndu Ízurẹlu rikwaa oge O-je-ghata l'oge, a tụ-buru t'e rije iya.

³ Ọnwa-a dụlewho l'abalị iri l'ẹno t'unu ria oge O-je-ghata ono lẹ nteke ono, a tụ-buru t'e rije iya. Nteke unu l'a-wata iya eriri bẹ bụ mẹ ẹnyanwu ladẹlewho l'ishi. Unu rikwaa oge ono lẹge iwu iya mẹe nsọ iya dụ.”

⁴ O noo ya, Mósisu bya ekfuru ndu Ízurẹlu tẹ whẹ ria oge O-je-ghata ono.

⁵ O rwulewho g'ọnwa mbụ ono dụ l'abalị iri l'ẹno, whẹ ria oge O-je-ghata ono. Whẹ riru iya g'ẹnyanwu l'abyawaa arịba l'echi-ẹgu Sáyinayi. Ndu Ízurẹlu mekota iwhe lile ono ẹgube Onye-Nwe-Ọha kfuru iya Mósisu.

⁶ Ọle o nwekwanuru ndu ọwhu l'ete etsoo ria oge O-je-ghata ono mbọku ono, e riru iya nkele mmerwu dụ whẹ l'ẹhu iswi lẹ whẹ byiru onye nwụhuru anwụhu ẹka. Ndu ono byakfuta Mósisu yẹle Érọnu mbọku ono

⁷ bya asụ Mósisu lẹ mmerwu dụkwa whẹ l'ẹhu nkele whẹ byiru onye nwụhuru anwụhu ẹka. Sụ; ?ndẹe g'o gude t'e kwe t'anyi tsoru ndu Ízurẹlu ọwhu nụ Onye-Nwe-Ọha ngwo-ẹja anyi l'oge nteke ono, a tụ-buru atụ-bu?

⁸ Mósisu sụ whẹ: “Unu ngabẹ tẹ mu marụ iwhe Onye-Nwe-Ọha l'e-kfu l'iswi ẹhu unu.”

⁹ Tọ dụ iya bụ, Onye-Nwe-Ọha sụ Mósisu:

¹⁰ “Kfuru ndu Ízurẹlu sụ whẹ agha: O -nweru onye l'ime unu, m'ọ bụ ẹpa unu, byiru ẹka l'odzu, shi nno merwua onwiya, ọdua l'onye ọbu bẹ jeru iwhe ọdo, bẹ onye ọbu l'e-rilekwa-a oge O-je-ghata nke Onye-Nwe-Ọha.

¹¹ Nteke whẹ l'e-ri iya bẹ bụ l'abalị iri l'ẹno l'ọnwa nke ẹbo iya mẹ ẹnyanwu bya ladẹlewho l'ishi. Iwhe whẹ l'e-gude ria ya bụ buredi, l'eete eyee iwhe l'ekoje buredi mẹe mkpẹekwo, l'atsọkaa ilu.

¹² T'ọ bọ dụkwa iwhe ono, ọwhu whẹ l'a-ha t'ọ fụta ụtsu echile iya, ya eje adụkwa ọkpu, whẹ l'e-tsupyashi etsupyashi. Whẹ ridekwa oge O-je-ghata ono tẹ whẹ dobekwa nsọ lile, dụ l'ori oge ono.

¹³ Ọle onye l'ẹte abụa l'aasọ iya nsọ t'ọ dụ iwhe ọdo, o jeru, onye ọbu te eri oge O-je-ghata ono, t'e kefukwa onye ọbu l'oke l'ẹka ndibe whẹ nọ nkele ọ tọ nụdu Onye-Nwe-Ọha ngwo-ẹja iya l'oge nteke a tụ-buru atụ-bu. Onye ono bẹ iwhe-dụ-ẹji, o meru l'a-tukokwaru l'ishi.

¹⁴ “A -bya abya l'ẹka onye nlwamụnlwa nọ, bụ onye unu l'iya bu. Ọ -bụru l'onye dụ nno bẹ chọru t'o tsoru ria oge O-je-ghata nke Onye-Nwe-Ọha, t'onye ọbu tsokwaru iwu, dụ l'ori oge ono mẹe nsọ iya ria ya. Ọo nsọ dụru onye ọwhu a nwụru anwụnwu l'alị-a bẹ dụkwaruwho onye ọwhu lwarụ alwa.”

Urwukpu l'asọ-kputa Mkpuumkpu-ẹkwa

¹⁵ Mbọku, a kpọberu Mkpuumkpu-ẹkwa, bụ iya bụ Ụlo-ẹkwa, l'eedobeje ẹkwo-iwu Onye-Nwe-Ọha bẹ urwukpu sọ-kputaru iya. L'urwẹnyashi iya bẹ urwukpu ono dụlewho g'ọo ọku l'eli mkpuumkpu-ẹkwa ono, dụ nno fụta ụtsu.

¹⁶ O nozhiawho g'ọ dụ ndono tụgburu. L'eswe bẹ urwukpu ono l'asọ-kputaje mkpuumkpu-ẹkwa ono, o be l'ẹnyashi ya adụ g'ọo ọku.

¹⁷ L'ọobuje nteke urwukpu ono shi l'eli ụlo-ẹkwa ono palita imeli imeli, ndu Ízurẹlu apalita ije whẹ tụgbua. Ẹka whẹ jetaberu, o keshita, whẹ akpọbe ụlo-ẹkwa ebubu whẹ l'ẹka ọbu nọshita.

¹⁸ O noo ya, l'ọobuje, Onye-Nwe-Ọha sụ ndu Ízurẹlu tẹ whẹ palia ije whẹ tụgbua, whẹ apalia tụgbua, nteke bụ l'ọ sụru whẹ tẹ whẹ nọdu, whẹ akpọbe ụlo-ẹkwa ebubu whẹ nọ-kirishia. Ọ bụru g'urwukpu ono nọ-beru l'eli mkpuumkpu-ẹkwa ono bụ gẹ whẹ l'anọ-bejeru l'ẹka whẹ kpọberu ụlo-ẹkwa ebubu whẹ ono.

¹⁹ Nteke urwukpu ono nọru ọdu l'eli mkpuumkpu-ẹkwa ono, nọo igweligwe mbọku, ndu Ízurẹlu anọ-kirishia, whẹ ta atụgbudu, ọ bụru gẹ Onye-Nwe-Ọha kfuru whẹ iya bụ gẹ whẹ l'emeje iya.

²⁰ O nweru nteke urwukpu ono l'anọje l'eli mkpuumkpu-ẹkwa ono, nọo ya nwujiku olemole, Onye-Nwe-Ọha -sụ tẹ whẹ nọdu, whẹ akpọbe ụlo-ẹkwa ebubu whẹ nọ-kirishia, nteke bụ l'ọ sụru whẹ tẹ whẹ palia ije whẹ tụgbua, whẹ apalia tụgbua.

²¹ O nweru nteke urwukpu ono l'eshije l'urwẹnyashi nọo jeye ụtsu; o rwua l'ụtsu ọ palihu imeli imeli, whẹ apalita ije whẹ tụgbua. Mbụ o beru ọ bụru m'ọo l'eswe bẹ urwukpu ono palihuru imeli, ọdua l'ọo ẹnyashi; nteke ọ bụ-zhiawho, nteke ọ bụ-zhiawho, ndu Ízurẹlu apalia ije whẹ tụgbua.

²² Nteke bụkwanu l'urwukpu ono bẹ nọdu l'eli mkpuumkpu-ẹkwa ono nọo ya abalị labọ, ọdua ọ nọo ya ọnwa owhu m'ọ bụ awha owhu, ndu Ízurẹlu anọshia l'ẹka whẹ kpọberu ụlo-ẹkwa ebubu whẹ gẹ whẹ nọ iya; whẹ ta abya l'atụgburu atụgburu. Obenu lẹ nteke bụ l'a nọnyaaru urwukpu ono palihu imeli, whẹ apalita tụgbushia.

²³ O noo ya bụ l'ọobuje, Onye-Nwe-Ọha sụ whẹ tẹ whẹ nọdu, whẹ akpọbe ụlo-ẹkwa ebubu whẹ nọ-kirishia, nteke bụ l'ọ sụru whẹ tẹ whẹ tụgburu, whẹ apalihu ije whẹ tụgbua. Iwhe lile Onye-Nwe-Ọha kfuru whẹ bẹ whẹ mekotaru ẹgube ọ tụru iya l'iwu nụ Mósisu.