Ọ́gú 7 - BAYỊBURU Ẹzaa

Odobe Mkpuumkpu-ẹkwa Onye-Nwe-Ọha nsọ

¹ Tọ dụ iya bụ, Mósisu gvubegelewho mkpuumkpu-ẹkwa, ọ wụa ya mmanụ bya edobe iya nsọ, dobekwawho iwhe bụ arya mkpuumkpu-ẹkwa ono g'ọ ha nsọ. O nokwawho g'ọ wụru mmanụ l'ẹnya-mgbẹja dobe iya nsọ, bya edobekwawho iwhe bụ arya ẹnya-mgbẹja ono g'ọ ha nsọ.

² Ọo ya bụ, ndu ishi ndu Ízurẹlu, bụ ndu bụ-gee ishi l'ibe nna whẹ, mbụ ndu bụ ishi l'ikfu g'ikfu ha, bụ iya bụ ndu ishi ono, yeru ẹka a gụa ndu Ízurẹlu ọgu; bya eworu iwhe nụ.

³ Iwhe whẹ nụru Onye-Nwe-Ọha bẹ bụ ọgba-kperekpere ishii, e kpuchiru iwhe mẹe oke-eswi iri l'ẹbo. Ndu ishi ono bẹ nụru oke-eswi nnanụ nnanụ l'ẹhu l'ẹhu. Whẹ dụ ẹbo-ẹbo nụ ọgba-kperekpere lanụ. O noo iwhe whẹ wotaru bya anụ l'iwhu mkpuumkpu-ẹkwa ndono.

⁴ Onye-Nwe-Ọha sụ Mósisu:

⁵ “Nata whẹ iwhe lile ono, whẹ nụru nke ọwhu l'ee-gude iya eje ozhi lẹ Ụlo-ẹkwa-ndzuko. Gụ eworu iya nụ ndu ikfu Lívayi. Onyenọnu bẹ l'ịi-nụ lẹge ozhi iya gbarụ.”

⁶ Ọo ya bụ, Mósisu bya ewota ọgba-kperekpere ono mẹe oke-eswi ono nụ ndu ikfu Lívayi.

⁷ Ẹpa Geshọnu b'ọ nụru ọgba-kperekpere labọ mẹe oke-eswi ẹno tẹ whẹ gude jeje ozhi, gbarụ whẹ nụ.

⁸ Ọ nụ ẹpa Merari ọgba-kperekpere ẹno mẹe oke-eswi ẹsato tẹ whẹ gude jeje ozhi, gbarụ whẹ nụ. Ndu ono gẹ whẹ ha bẹ nọkota l'ẹka Itama nwa Érọnu, bụ onye l'agbajẹ ẹja nụ Chileke eje ozhi whẹ.

⁹ Obenu l'ẹpa Kohatu bẹ l'adụdua ọwhu ọ nụru whẹ nkele ọo whẹbedua b'ọ dụ l'ẹka, mbụ oleta iwhe dụ nsọ ẹnya bụ iya bụ ovu iwhe dụ nsọ l'ukuvu.

¹⁰ Mbọku, a wụru mmanụ l'ẹnya-mgbẹja Chileke t'e gude woru iya ye Chileke l'ẹka bẹ ndu ishi ono, l'achị Ízurẹlu wotageeru iwhe bya anụ l'ẹnya-mgbẹja ono.

¹¹ Onye-Nwe-Ọha bya asụ Mósisu: “Mbọku, fụtaru nụ bẹ onye ishi lanụ, l'e-wotaje iwhe nkiya bya anụ t'e gude ye ẹnya-mgbẹja ono l'ẹka Chileke.”

¹² Onye wotaru iwhe nkiya bya anụ lẹ mbọku nke mbụ bẹ bụ Nahụshonu nwa Amínadabu, bụ onye ishi, l'achị ikfu Juda.

¹³ Iwhe ọ nụru bẹ bụ: efere lanụ, e meru lẹ mkpọla-ọcha, ẹrwa iya dụ shẹkelu ụkporo ugbo ishii lẹ shẹkelu iri, bya anụkwawho ọkwa lanụ, e meru lẹ mkpọla-ọcha, ẹrwa iya dụ shẹkelu ụkporo ugbo ẹto lẹ shẹkelu iri. Ẹrwa mkpọla-ọcha ono bẹ yẹle shẹkelu ụlo-nsọ bụ iwhe lanụ. Ọwhunonu b'e yejishikotaru eyejishi lẹ witi, e gweru egwegwe gwọkobe iya mmanụ, t'e gude gwoo ngwo-ẹja nri.

¹⁴ Iwhe ọdo, ọ nụru bẹ bụ ite lanụ, e meru lẹ mkpọla-ododo iri, iwhe jiru iya nụ bụ ụ̀nwù isẹnsu;

¹⁵ bya anụ nwa oke-eswi lanụ mẹe ebyila lanụ mẹe ịgogolo lanụ, gbarụ awha, l'ee-gude gbaa ẹja ọkpokota-iwhe-ọku,

¹⁶ ọwaa mkpi lanụ, l'ee-gude gbaa ẹja iwhe-dụ-ẹji,

¹⁷ mẹe oke-eswi labọ mẹe ebyila ise mẹe mkpi ise mẹe ịgogolo ise, gbageeru awha, l'ee-gbushi gude gbaa ẹja ẹhu-guu. O noo bụ iwhe Nahụshonu nwa Amínadabu wotaru bya anụ ndono.

¹⁸ A bya abya lẹ mbọku nke ẹbo, Netanẹlu nwa Zúwa, bụ onye ishi, l'achị ikfu Ísaka wota iwhe nkiya bya anụ.

¹⁹ Iwhe ọ nụru bẹ bụ: efere lanụ, e meru lẹ mkpọla-ọcha, ẹrwa iya dụ ụkporo shẹkelu ugbo ishii lẹ shẹkelu iri, bya anụkwawho ọkwa lanụ, e meru lẹ mkpọla-ọcha, ẹrwa iya dụ ụkporo shẹkelu ugbo ẹto lẹ shẹkelu iri. Ẹrwa mkpọla-ọcha ono bẹ yẹle shẹkelu ụlo-nsọ bụ iwhe lanụ. Ọwhunonu b'e yejishikotaru eyejishi lẹ witi e gweru egwe, gwọkobe iya mmanụ, t'e gude gwoo ngwo-ẹja nri.

²⁰ Iwhe ọdo, ọ nụru bẹ bụ ite lanụ, e meru lẹ mkpọla-ododo, ẹrwa iya dụ shẹkelu iri, iwhe jiru iya nụ bụ ụ̀nwù isẹnsu,

²¹ bya anụ nwa oke-eswi lanụ mẹe ebyila lanụ mẹe ịgogolo lanụ, gbarụ awha, l'ee-gude gbaa ẹja ọkpokota-iwhe-ọku,

²² ọwaa mkpi lanụ, l'ee-gude gbaa ẹja iwhe-dụ-ẹji,

²³ mẹe oke-eswi labọ mẹe ebyila ise mẹe mkpi ise mẹe ịgogolo ise, gbageeru awha, l'ee-gbushi gbaa ẹja ẹhu-guu. O noo iwhe Netanẹlu nwa Zúwa wotaru bya anụ ndono.

²⁴ A bya abya lẹ mbọku nke ẹto, Eliyabu nwa Helọnu, bụ onye ishi, l'achị ikfu Zébulọnu wota iwhe nkiya bya anụ.

²⁵ Iwhe ọ nụru bẹ bụ: efere lanụ, e meru lẹ mkpọla-ọcha, ẹrwa iya dụ ụkporo shẹkelu ugbo ishii lẹ shẹkelu iri, bya anụkwawho ọkwa lanụ, e meru lẹ mkpọla-ọcha, ẹrwa iya dụ ụkporo ugbo ẹto lẹ shẹkelu iri. Ẹrwa mkpọla-ọcha ono bẹ yẹle shẹkelu ụlo-nsọ bụ iwhe lanụ. Ọwhunonu b'e yejishikotaru eyejishi lẹ witi, e gweru egwegwe gwọkobe iya mmanụ, t'e gude gwoo ngwo-ẹja nri.

²⁶ Iwhe ọdo, ọ nụru bẹ bụ ite lanụ, e meru lẹ mkpọla-ododo, ẹrwa iya dụ shẹkelu iri, iwhe jiru iya nụ bụ ụ̀nwù isẹnsu,

²⁷ bya anụ nwa oke-eswi lanụ mẹe ebyila lanụ mẹe ịgogolo lanụ, gbarụ awha, l'ee-gude gbaa ẹja ọkpokota-iwhe-ọku,

²⁸ ọwaa mkpi lanụ, l'ee-gude gbaa ẹja iwhe-dụ-ẹji,

²⁹ mẹe oke-eswi labọ mẹe ebyila ise mẹe mkpi ise mẹe ịgogolo ise, gbageeru awha, l'ee-gbushi gude gbaa ẹja ẹhu-guu. O noo bụ iwhe Eliyabu nwa Helọnu wotaru bya anụ ndono.

³⁰ A bya abya lẹ mbọku nke ẹno, Elizuru nwa Shediyọ, bụ onye ishi, l'achị ikfu Rúbẹnu wota iwhe nkiya bya anụ.

³¹ Iwhe ọ nụru bẹ bụ: efere lanụ, e meru lẹ mkpọla-ọcha, ẹrwa iya dụ ụkporo shẹkelu ugbo ishii lẹ shẹkelu iri, bya anụkwawho ọkwa lanụ, e meru lẹ mkpọla-ọcha, ẹrwa iya dụ ụkporo ugbo ẹto lẹ shẹkelu iri. Ẹrwa mkpọla-ọcha ono bẹ yẹle shẹkelu ụlo-nsọ bụ iwhe lanụ. Ọwhunonu b'e yejishikotaru eyejishi lẹ witi, e gweru egwegwe gwọkobe iya mmanụ, t'e gude gwoo ngwo-ẹja nri.

³² Iwhe ọdo, ọ nụru bẹ bụ ite lanụ, e meru lẹ mkpọla-ododo, ẹrwa iya dụ shẹkelu iri; iwhe jiru iya nụ bụ ụ̀nwù isẹnsu,

³³ bya anụ nwa oke-eswi lanụ mẹe ebyila lanụ mẹe ịgogolo lanụ, gbarụ awha, l'ee-gude gbaa ẹja ọkpokota-iwhe-ọku;

³⁴ ọwaa mkpi lanụ, l'ee-gude gbaa ẹja iwhe-dụ-ẹji,

³⁵ mẹe oke-eswi labọ mẹe ebyila ise mẹe mkpi ise mẹe ịgogolo ise, gbageeru awha, l'ee-gbushi gude gbaa ẹja ẹhu-guu. O noo bụ iwhe Elizuru nwa Shediyọ wotaru bya anụ ndono.

³⁶ A bya abya lẹ mbọku nke ise, Shelumẹlu nwa Zurishadayi, bụ onye ishi, l'achị ikfu Símiyọnu wota iwhe nkiya bya anụ.

³⁷ Iwhe ọ nụru bẹ bụ: efere lanụ, e meru lẹ mkpọla-ọcha, ẹrwa iya dụ ụkporo shẹkelu ugbo ishii lẹ shẹkelu iri, bya anụkwawho ọkwa lanụ, e meru lẹ mkpọla-ọcha, ẹrwa iya dụ ụkporo shẹkelu ugbo ẹto lẹ shẹkelu iri. Ẹrwa mkpọla-ọcha ono bẹ yẹle shẹkelu ụlo-nsọ bụ iwhe lanụ. Ọwhunonu b'e yejishikotaru eyejishi lẹ witi, e gweru egwegwe gwọkobe iya mmanụ, t'e gude gwoo ngwo-ẹja nri.

³⁸ Iwhe ọdo, ọ nụru bẹ bụ ite lanụ, e meru lẹ mkpọla-ododo, ẹrwa iya dụ shẹkelu iri, iwhe jiru iya nụ bụ ụ̀nwù isẹnsu,

³⁹ bya anụ nwa oke-eswi lanụ mẹe ebyila lanụ mẹe ịgogolo lanụ, gbarụ awha, l'ee-gude gbaa ẹja ọkpokota-iwhe-ọku,

⁴⁰ ọwaa mkpi lanụ, l'ee-gude gbaa ẹja iwhe-dụ-ẹji

⁴¹ mẹe oke-eswi labọ mẹe ebyila ise mẹe mkpi ise mẹe ịgogolo ise, gbageeru awha, l'ee-gbushi gude gbaa ẹja ẹhu-guu. O noo bụ iwhe Shelumẹlu nwa Zurishadayi wotaru bya anụ ndono.

⁴² A bya abya lẹ mbọku nke ishii, Ẹliyasafu nwa Diyuwẹlu, bụ onye ishi, l'achị ikfu Gadu wota iwhe nkiya bya anụ.

⁴³ Iwhe ọ nụru bẹ bụ: efere lanụ, e meru lẹ mkpọla-ọcha, ẹrwa iya ụkporo shẹkelu ugbo ishii lẹ shẹkelu iri, bya anụkwawho ọkwa lanụ, e meru lẹ mkpọla-ọcha, ẹrwa iya dụ ụkporo shẹkelu ugbo ẹto lẹ shẹkelu iri. Ẹrwa mkpọla-ọcha ono bẹ yẹle shẹkelu ụlo-nsọ bụ iwhe lanụ. Ọwhunonu b'e yejishikotaru eyejishi lẹ witi, e gweru egwegwe, gwọkobe iya mmanụ, t'e gude gwoo ngwo-ẹja nri.

⁴⁴ Iwhe ọdo, ọ nụru bẹ bụ ite lanụ, e meru lẹ mkpọla-ododo, ẹrwa iya dụ shẹkelu iri, iwhe jiru iya nụ bụ ụ̀nwù isẹnsu,

⁴⁵ bya anụ nwa oke-eswi lanụ mẹe ebyila lanụ mẹe ịgogolo lanụ, gbarụ awha, l'ee-gude gbaa ẹja ọkpokota-iwhe-ọku,

⁴⁶ ọwaa mkpi lanụ, l'ee-gude gbaa ẹja iwhe-dụ-ẹji,

⁴⁷ mẹe oke-eswi labọ mẹe ebyila ise mẹe mkpi ise mẹe ịgogolo ise, gbageeru awha, l'ee-gbushi gude gbaa ẹja ẹhu-guu. O noo bụ iwhe Ẹliyasafu nwa Diyuwẹlu wotaru bya anụ ndono.

⁴⁸ A bya abya lẹ mbọku nke ẹsaa, Elishama nwa Amihudu, bụ onye ishi, l'achị ikfu Ífuremu wota iwhe nkiya bya anụ.

⁴⁹ Iwhe ọ nụru bẹ bụ: efere lanụ, e meru lẹ mkpọla-ọcha, ẹrwa iya dụ ụkporo shẹkelu ugbo ishii lẹ shẹkelu iri, bya anụkwawho ọkwa lanụ, e meru lẹ mkpọla-ọcha, ẹrwa iya dụ ụkporo shẹkelu ugbo ẹto lẹ shẹkelu iri. Ẹrwa mkpọla-ọcha ono bẹ yẹle shẹkelu ụlo-nsọ bụ iwhe lanụ. Ọwhunonu b'e yejishikotaru eyejishi lẹ witi, e gweru egwegwe, gwọkobe iya mmanụ, t'e gude gwoo ngwo-ẹja nri.

⁵⁰ Iwhe ọdo, ọ nụru bẹ bụ ite lanụ, e meru lẹ mkpọla-ododo, ẹrwa iya shẹkelu iri; iwhe jiru iya nụ bụ ụ̀nwù isẹnsu,

⁵¹ bya anụ nwa oke-eswi lanụ mẹe ebyila lanụ mẹe ịgogolo lanụ, gbarụ awha, l'ee-gude gbaa ẹja ọkpokota-iwhe-ọku,

⁵² ọwaa mkpi lanụ, l'ee-gude gbaa ẹja iwhe-dụ-ẹji,

⁵³ mẹe oke-eswi labọ mẹe ebyila ise mẹe mkpi ise, ịgogolo ise, gbageeru awha, l'ee-gbushi gude gbaa ẹja ẹhu-guu. O noo bụ iwhe Elishama nwa Amihudu wotaru bya anụ ndono.

⁵⁴ A bya abya lẹ mbọku nke ẹsato, Gamáliyelu nwa Pedazọ, bụ onye ishi, l'achị ikfu Manáse wota iwhe nkiya bya anụ.

⁵⁵ Iwhe ọ nụru bẹ bụ: efere lanụ, e meru lẹ mkpọla-ọcha, ẹrwa iya dụ ụkporo shẹkelu ugbo ishii lẹ shẹkelu iri, bya anụkwawho ọkwa lanụ, e meru lẹ mkpọla-ọcha, ẹrwa iya dụ ụkporo shẹkelu ugbo ẹto lẹ shẹkelu iri. Ẹrwa mkpọla-ọcha ono bẹ yẹle shẹkelu ụlo-nsọ bụ iwhe lanụ. Ọwhunonu b'e yejishikotaru eyejishi lẹ witi, e gweru egwegwe, gwọkobe iya mmanụ, t'e gude gwoo ngwo-ẹja nri.

⁵⁶ Iwhe ọdo, ọ nụru bẹ bụ ite lanụ, e meru lẹ mkpọla-ododo, ẹrwa iya dụ shẹkelu iri; iwhe jiru iya nụ bụ ụ̀nwù isẹnsu,

⁵⁷ bya anụ nwa oke-eswi lanụ mẹe ebyila lanụ mẹe ịgogolo lanụ, gbarụ awha, l'ee-gude gbaa ẹja ọkpokota-iwhe-ọku,

⁵⁸ ọwaa mkpi lanụ, l'ee-gude gbaa ẹja iwhe-dụ-ẹji,

⁵⁹ mẹe oke-eswi labọ mẹe ebyila ise, mẹe mkpi ise mẹe ịgogolo ise, gbageeru awha, l'ee-gbushi gude gbaa ẹja ẹhu-guu. O noo bụ iwhe Gamáliyelu nwa Pedazọ wotaru bya anụ ndono.

⁶⁰ A bya abya lẹ mbọku nke tete, Abidanu nwa Gidiyoni, bụ onye ishi, l'achị ikfu Bénjaminu wota iwhe nkiya bya anụ.

⁶¹ Iwhe ọ nụru bẹ bụ: efere lanụ, e meru lẹ mkpọla-ọcha, ẹrwa iya dụ ụkporo shẹkelu ugbo ishii lẹ shẹkelu iri, bya anụkwawho ọkwa lanụ, e meru lẹ mkpọla-ọcha, ẹrwa iya ụkporo shẹkelu ugbo ẹto lẹ shẹkelu iri. Ẹrwa mkpọla-ọcha ono bẹ yẹle shẹkelu ụlo-nsọ bụ iwhe lanụ. Ọwhunonu b'e yejishikotaru eyejishi lẹ witi, e gweru egwegwe, gwọkobe iya mmanụ, t'e gude gwoo ngwo-ẹja nri.

⁶² Iwhe ọdo, ọ nụru bẹ bụ ite lanụ, e meru lẹ mkpọla-ododo, ẹrwa iya dụ shẹkelu iri, iwhe jiru iya nụ bụ ụ̀nwù isẹnsu,

⁶³ bya anụ nwa oke-eswi lanụ mẹe ebyila lanụ mẹe ịgogolo lanụ, gbarụ awha, l'ee-gude gbaa ẹja ọkpokota-iwhe-ọku,

⁶⁴ ọwaa mkpi lanụ, l'ee-gude gbaa ẹja iwhe-dụ-ẹji,

⁶⁵ mẹe oke-eswi labọ mẹe ebyila ise mẹe mkpi ise mẹe ịgogolo ise, gbageeru awha, l'ee-gbushi gude gbaa ẹja ẹhu-guu. O noo bụ iwhe Abidanu nwa Gidiyoni wotaru bya anụ ndono.

⁶⁶ A bya abya lẹ mbọku nke iri, Ahiyeza nwa Amishadayi, bụ onye-ishi, l'achị ikfu Danu wota iwhe nkiya bya anụ.

⁶⁷ Iwhe ọ nụru bẹ bụ: efere lanụ, e meru lẹ mkpọla-ọcha, ẹrwa iya dụ ụkporo shẹkelu ugbo ishii lẹ shẹkelu iri, bya anụkwawho ọkwa lanụ, e meru lẹ mkpọla-ọcha, ẹrwa iya dụ ụkporo shẹkelu ugbo ẹto lẹ shẹkelu iri. Ẹrwa mkpọla-ọcha ono bẹ yẹle shẹkelu ụlo-nsọ bụ iwhe lanụ. Ọwhunonu b'e yejishikotaru eyejishi lẹ witi, e gweru egwegwe gwọkobe iya mmanụ, t'e gude gwoo ngwo-ẹja nri.

⁶⁸ Iwhe ọdo, ọ nụru bẹ bụ ite lanụ, e meru lẹ mkpọla-ododo, ẹrwa iya dụ shẹkelu iri; iwhe jiru iya nụ bụ ụ̀nwù isẹnsu,

⁶⁹ bya anụ nwa oke-eswi lanụ mẹe ebyila lanụ mẹe ịgogolo lanụ, gbarụ awha, l'ee-gude gbaa ẹja ọkpokota-iwhe-ọku,

⁷⁰ ọwaa mkpi lanụ, l'ee-gude gbaa ẹja iwhe-dụ-ẹji,

⁷¹ mẹe oke-eswi labọ mẹe ebyila ise mẹe mkpi ise mẹe ịgogolo ise, gbageeru awha, l'ee-gbushi gude gbaa ẹja ẹhu-guu. O noo bụ iwhe Ahiyeza nwa Amishadayi wotaru bya anụ ndono.

⁷² A bya abya lẹ mbọku nke iri lẹ nnanụ; Pagẹlu nwa Ọkuranu, bụ onye ishi, l'achị ikfu Asha wota iwhe nkiya bya anụ.

⁷³ Iwhe ọ nụru bẹ bụ: efere lanụ, e meru lẹ mkpọla-ọcha ẹrwa iya dụ ụkporo shẹkelu ugbo ishii lẹ shẹkelu iri, bya anụkwawho ọkwa lanụ, e meru lẹ mkpọla-ọcha, ẹrwa iya dụ ụkporo shẹkelu ugbo ẹto lẹ shẹkelu iri. Ẹrwa mkpọla-ọcha ono bẹ yẹle shẹkelu ụlo-nsọ bụ iwhe lanụ. Ọwhunonu b'e yejishikotaru eyejishi lẹ witi, e gweru egwegwe, gwọkobe iya mmanụ, t'e gude gwoo ngwo-ẹja nri.

⁷⁴ Iwhe ọdo, ọ nụru bẹ bụ ite lanụ, e meru lẹ mkpọla-ododo, ẹrwa iya dụ shẹkelu iri, iwhe jiru iya nụ bụ ụ̀nwù isẹnsu,

⁷⁵ bya anụ nwa oke-eswi lanụ mẹe ebyila lanụ mẹe ịgogolo lanụ, gbarụ awha, l'ee-gude gbaa ẹja ọkpokota-iwhe-ọku,

⁷⁶ ọwaa mkpi lanụ, l'ee-gude gbaa ẹja iwhe-dụ-ẹji,

⁷⁷ mẹe oke-eswi labọ mẹe ebyila ise mẹe mkpi ise mẹe ịgogolo ise, gbageeru awha, l'ee-gbushi gude gbaa ẹja ẹhu-guu. O noo bụ iwhe Pagẹlu nwa Ọkuranu wotaru bya anụ ndono.

⁷⁸ A bya abya lẹ mbọku nke iri l'ẹbo; Ahira nwa Enanu, bụ onye ishi, l'achị ikfu Náfutali wota iwhe nkiya bya anụ.

⁷⁹ Iwhe ọ nụru bẹ bụ: efere lanụ, e meru lẹ mkpọla-ọcha, ẹrwa iya dụ ụkporo shẹkelu ugbo ishii lẹ shẹkelu iri, bya anụkwawho ọkwa lanụ, e meru lẹ mkpọla-ọcha, ẹrwa iya dụ ụkporo shẹkelu ugbo ẹto lẹ shẹkelu iri. Ẹrwa mkpọla-ọcha ono bẹ yẹle shẹkelu ụlo-nsọ bụ iwhe lanụ. Ọwhunonu b'e yejishikotaru eyejishi lẹ witi, e gweru egwegwe, gwọkobe iya mmanụ, t'e gude gwoo ngwo-ẹja nri.

⁸⁰ Iwhe ọdo, ọ nụru bẹ bụ ite lanụ, e meru lẹ mkpọla-ododo, ẹrwa iya dụ shẹkelu iri; iwhe jiru iya nụ bụ ụ̀nwù isẹnsu,

⁸¹ bya anụ nwa oke-eswi lanụ mẹe ebyila lanụ mẹe ịgogolo lanụ, gbarụ awha, l'ee-gude gbaa ẹja ọkpokota-iwhe-ọku,

⁸² ọwaa mkpi lanụ, l'ee-gude gbaa ẹja iwhe-dụ-ẹji;

⁸³ mẹe oke-eswi labọ mẹe ebyila ise mẹe mkpi ise mẹe ịgogolo ise, gbageeru awha, l'ee-gbushi gude gbaa ẹja ẹhu-guu. O noo bụ iwhe Ahira nwa Enanu wotaru bya anụ ndono.

⁸⁴ Ọ waa bụ iwhe g'iwhe ha ndu ishi, l'achị Ízurẹlu wotaru bya anụ t'e gude ye ẹnya-mgbẹja ono l'ẹka Chileke, mbụ nteke ono, a wụru iya mmanụ. Iwhe whẹ nụru bẹ bụ: efere iri l'ẹbo, e meru lẹ mkpọla-ọcha mẹe ọkwa iri l'ẹbo, e meru lẹ mkpọla-ọcha mẹe ite iri l'ẹbo, e meru lẹ mkpọla-ododo.

⁸⁵ Efere lanụ b'e meru lẹ mkpọla-ọcha, ẹrwa iya dụ ụkporo shẹkelu ugbo ishii lẹ shẹkelu iri, mee ọkwa lanụ lẹ mkpọla-ọcha, ẹrwa iya dụ ụkporo shẹkelu ugbo ishii lẹ shẹkelu iri. Ẹrwa mkpọla-ọcha, e gude mekota arya ono l'owhu bẹ ẹrwa iya dụ ụnu shẹkelu ugbo ishii. Ẹrwa mkpọla-ọcha ono bẹ yẹle shẹkelu ụlo-nsọ bụ iwhe lanụ.

⁸⁶ Ite iri l'ẹbo ono, e meru lẹ mkpọla-ododo, e yejishikotaru ụ̀nwù isẹnsu eyejishi bẹ mkpọla-ododo, e gude mee ya bẹ ẹrwa iya dụ shẹkelu iri, bụ gẹ l'ọohaje mbụ ẹrwa mkpọla-ododo ẹka-dụ-nsọ. Ẹrwa mkpọla-ododo, e gude mekota arya ono l'owhu bẹ dụkota ụkporo shẹkelu ugbo ishii.

⁸⁷ Iwhe bụ mkpakọ anụ, l'ee-gude gbaa ẹja ọkpokota-iwhe-ọku dụkota bẹ bụ, ụnwu oke-eswi iri l'ẹbo mẹe ebyila iri l'ẹbo mẹe ịgogolo iri l'ẹbo, gbageeru awha yẹle ngwo-ẹja nri, tso iya nụ, ọwaa mkpi iri l'ẹbo, l'ee-gude gbaa ẹja iwhe-dụ-ẹji.

⁸⁸ Anụ lile, l'ee-gbu gude gbaa ẹja ẹhu-guu bẹ dụkota oke-eswi ụkporo l'ẹno mẹe ụkporo ebyila ugbo ẹto mẹe ụkporo mkpi ugbo ẹto mẹe ụkporo ịgogolo ugbo ẹto, gbageeru awha. O noo bụ iwhe a nụru t'e gude ye ẹnya-mgbẹja ono ye l'ẹka Chileke, mbụ nteke ono, a wụru iya mmanụ.

⁸⁹ Nteke Mósisu bya abahụ tẹ yẹle Onye-Nwe-Ọha kfugbabe l'ime Ụlo-ẹkwa-ndzuko b'ọ nụru olu-okfu g'o shi l'okfu igbe l'aa-nọje akfụ ụgwo iwhe-dụ-ẹji, mbụ ono, tukoru l'eli igbe-iwu, olu okfu ono l'ekfu eyeru iya; lẹ mgbakụ cherubu labọ. Olu-okfu ono bẹ kfuru yeru iya.