Ọ́gú 6 - BAYỊBURU Ẹzaa

Nke onye doberu Onye-Nwe-Ọha onwiya nsọ

¹ Onye-Nwe-Ọha sụ Mósisu:

² “Kfuru yeru ndu Ízurẹlu sụ whẹ agha: O -nweru nwoke ọdua l'ọo nwanyị kweru ụkwa, dụ iche sụ l'iya l'a-dụru Onye-Nwe-Ọha nsọ, mbụ l'iya l'e-dobe onwiya t'iya bụru onye gbarụ iche l'ẹka Onye-Nwe-Ọha nọ,

³ t'onye ọbu ba angụjekwa mmẹe m'ọ bụ iwhe-angụngu ọdo l'eme l'ẹnya. T'onye ọbu ba angụjekwa mmẹe l'anwụ ọnu, shi lẹ vayịnu m'ọ bụ iwhe-angụngu ọdo l'eme l'ẹnya. T'ọ bọ ngụjekwa mini akpụru vayịnu, ya eje erije akpụru vayịnu oyii mẹe nke ọkponku.

⁴ T'o bo rijekwa iwhe shi lẹ vayịnu m'ọ bụ akpụru vayịnu ọbu l'onwiya m'ọ bụ ẹgbo vayịnu ọbu jeye ya anọ-gee bụru onye dụru Onye-Nwe-Ọha nsọ.

⁵ “Akwọ ta abyadụ l'e-rwu iya l'ishi jeye ya anọ-gee bụru onye doberu onwiya iche. Ọo-dụlewho nsọ lẹge ọ dụ iya jeye oge ono, o doberu onwiya iche ono l'ẹka Onye-Nwe-Ọha nọ edzua. Ya ahaa t'ẹgbushi iya rwuchia erwuchi ha wugala wugala.

⁶ Ọ tọ byadụ l'e-jekube mgboro ẹka odzu dụ jeye ya anọ-gee bụru onye doberu onwiya iche l'ẹka Onye-Nwe-Ọha nọ.

⁷ Mbụ, o beru ọ -bụru l'ọo nna iya nwụhuru, ọdua l'ọo ne iya nwụhuru, ọdua l'ọo nwune iya nwoke nwụhuru m'ọ bụ nwune iya nwanyị bẹ nwụhuru, o too kwobedu iswi iya jekube odzu iya ntse, shi nno merwua onwiya. Nkele ọo ishi bẹ l'ee-gude marụ l'o doberu onwiya nsọ l'ẹka Chileke nọ.

⁸ Jeye ya anọ-gee bụru onye dụ iche ono b'ọ bụ onye dụ nsọ l'ẹka Onye-Nwe-Ọha nọ.

⁹ “O -nweru onye gbakwohuru nwụhu lẹ mgboro ẹka ọ nọ, o shi nno merwua ẹgbushi ono, o doberu nsọ, o rwulewho abalị ẹsaa, ya erwushia ẹgbushi ono, shi nno tụrwua mmerwu ono.

¹⁰ O rwua l'abalị nke ẹsato, ya ewota ndo labọ, ọdua ya ewota ụnwu kparakụ labọ wojeru onye l'agbajẹ ẹja nụ Chileke l'ọnu Ụlo-ẹkwa-ndzuko.

¹¹ Ọo ya bụ, onye l'agbajẹ ẹja nụ Chileke ono ewota nnanụ gbaa ẹja iwhe-dụ-ẹji, ya ewota nnanụ ọwhua gbaa ẹja ọkpokota-iwhe-ọku gude kfụa ụgwo iwhe-dụ-ẹji ono, o meru, iswi l'ọ nọdu l'ẹka madzụ nwụhuru anwụhu. Ọ bụru mbọku onookwawho bẹ l'oo-me t'ishi iya dụ-whu nsọ azụ.

¹² Oo-dobe onwiya iche l'ẹka Onye-Nwe-Ọha nọ jeye ya anọ-gezhia bụru onye dụ iche. Ya ewota ịgogolo, gbarụ awha nụ t'e gude gbaa ẹja ikpe-anmanma. Oge ọwhu, ọ nọhawaru bẹ l'ẹte agụduru eye iya, o noo nkele o merwuru onwiya nteke ono, o shi dobe onwiya nsọ.

¹³ “Ọ waa iwu, dụru onye doberu onwiya iche l'ẹka Onye-Nwe-Ọha nọ ndọwa mẹ nteke o doberu onwiya iche ono dzulewho. Ee-duru iya bya l'ọnu Ụlo-ẹkwa-ndzuko.

¹⁴ Ya anọdu l'ẹka ono woru iwhe l'ọo-nụ Onye-Nwe-Ọha nụ iya. Ọo-nụ iya ịgogolo, gbarụ awha, l'ẹte enwe ẹka ọrwu dụ iya l'ẹhu, l'ee-gude gbaa ẹja ọkpokota-iwhe-ọku; ya anụ nwada atụru, gbarụ awha, l'ẹte enwee ẹka ọrwu dụ iya l'ẹhu, l'ee-gude gbaa ẹja iwhe-dụ-ẹji; ya anụ ebyila, l'ẹte enwee ẹka ọrwu dụ iya l'ẹhu, l'ee-gude gbaa ẹja ẹhu-guu.

¹⁵ Iwhe ọdo, l'oo-yefua ya bụ nkata buredi, l'eete eyee iwhe l'ekoje buredi mẹe akara, e meru lẹ witi, e gweru egwegwe gwọkobe iya mmanụ mẹe ẹcha-mbeke, a wụru mmanụ l'eli mẹe ngwo-ẹja nri yẹle ngwo-ẹja mmẹe, l'etsoje iya nụ.

¹⁶ “Iwhe ono g'ọ ha bẹ onye l'agbajẹ ẹja nụ Chileke l'a-nụkota Onye-Nwe-Ọha. Ya agbaa ẹja iwhe-dụ-ẹji ono mẹe ẹja ọkpokota-iwhe-ọku ono.

¹⁷ Onye l'agbajẹ ẹja nụ Chileke ono abya anụ Onye-Nwe-Ọha nkata buredi ono, l'eete eyee iwhe l'ekoje buredi, gbua ebyila whọ gude gbaarụ Onye-Nwe-Ọha ẹja ẹhu-guu; ya eyekobekwa iya whọ ngwo-ẹja nri yẹle ngwo-ẹja mmẹe, l'etsoje iya nụ.

¹⁸ Ọ bụru l'ọnu Ụlo-ẹkwa-ndzuko bẹ onye ono, dụru Onye-Nwe-Ọha nsọ ono l'a-nọdu rwushia ẹgbushi ono, o doberu nsọ. Ya ekpota ẹgbushi ono chịru ye l'ọku, e gude akpọ anụ ngwo-ẹja ẹhu-guu whọ ọku.

¹⁹ “Onye ono, dụru Onye-Nwe-Ọha nsọ ono -rwushigelewho ẹgbushi ono, o doberu nsọ; ọo ya bụ; onye l'agbajẹ ẹja nụ Chileke eworu ẹka ebyila ono, e shiru eshi dẹe ya l'ẹka t'ọ parụ mẹe akara lanụ, l'eete eyee iwhe lekoje buredi, shi lẹ nkata whọ mẹe ẹcha-mbeke lanụ, l'eete eyee iwhe l'ekoje buredi.

²⁰ Nteke ono, onye l'agbajẹ ẹja nụ Chileke ono abya amaa ya amama l'iwhu Onye-Nwe-Ọha t'ọ bụru ngwo-ẹja amama. Iwhe ono g'ọ ha bẹ dụkotakwa nsọ, ọ bụru onye l'agbajẹ ẹja nụ Chileke bẹ nwe iya nụ yẹle ǹdụ́ ebyila ono, a marụ amama mẹe ụtakfu iya ono, a nụru Onye-Nwe-Ọha. E megee ya nno bẹ onye ono, dụru Onye-Nwe-Ọha nsọ ono nweru ike ya angụa mmẹe.

²¹ “O noo bụ iwu dụru onye doberu onwiya nsọ l'ẹka Onye-Nwe-Ọha nọ ndono bụ iya bụ onye kweru ụkwa lẹ ya l'e-dobe onwiya nsọ l'ẹka Onye-Nwe-Ọha nọ mẹe iwhe l'ọo-nụje Onye-Nwe-Ọha nteke oge iya dzuleruwho, t'a gụfukwa iya iwhe ọdo, l'ọo-nụ lẹge ẹka iya beru. Ọle o medzufutaje iwhe o kweru ụkwa iya ẹgube iwu onye dụru Onye-Nwe-Ọha nsọ dụ dụ.”

Gẹ ndu l'agbajẹ ẹja nụ Chileke l'e-shije agọ ọnu-ọma anụ ndu Ízurẹlu

²² Onye-Nwe-Ọha bya asụ Mósisu:

²³ “Kfuru Érọnu yẹle ụnwu iya sụ whẹ l'ọ waa bụ gẹ whẹ l'e-shije agọru ndu Ízurẹlu ọnu-ọma ndọwa: Gẹ l'ii-kfuru whẹ tẹ whẹ kfuje iya bụ:

²⁴ “Tẹ Onye-Nwe-Ọha gọru ọnu-ọma nụ unu, ya echekwaa unu.

²⁵ Tẹ Onye-Nwe-Ọha mee t'atatiwhu iya nwujeeru unu, ya emejeeru unu eze-iwhe-ọma.

²⁶ Tẹ Onye-Nwe-Ọha cheberu unu iwhu, ya emee t'unu buru guu.

²⁷ “O noo gẹ whẹ l'e-shi dobe ẹwha mu l'ẹka ndu Ízurẹlu nọ ndụge mu agọoru whẹ ọnu-ọma.”