Ọ́gú 36 - BAYỊBURU Ẹzaa

Oke-alị ụnwada Zelofehadu

¹ Ndu bụ-gee ishi l'ibe nna whẹ l'ẹnya-uwhu ụnwu Giledu bya abyakfuta Mósisu mẹe ndu bụ-gee ishi l'ibe nna whẹ lẹ Ízurẹlu. Giledu bụ nwa Makiru, Makiru bụru nwa Manáse. Manáse l'onwiya bẹ shi l'ọzo-ụlo Jósẹfu.

² Whẹ byakfuta whẹ sụ: “Onye-Nwe-Ọha bẹ sụru tẹ gụbe onye-nwe-anyi, bụ Mósisu tụa ido gude washịa alị ono keeru ndu Ízurẹlu t'ọ bụru oke-alị whẹ. Onye-Nwe-Ọha sụkwawho tẹ gụbe onye-nwe-anyi woru oke-alị ọwhu rwuberu Zelofehadu, bụ nwune anyi woru nụ ụnwada iya tẹ whẹ woru.

³ Ọle o -nweru onye shi l'ikfu ọdo, dụ lẹ Ízurẹlu, bya alụa whẹ, ọo ya bụ, a gụfu oke-alị whẹ l'ime oke-alị nna anyi whẹ, je eyekobe lẹ nke ikfu ono, whẹ larụ ji ono, e shi nno, wofu iwhe l'oke-alị anyi ketaru.

⁴ O rwulewho l'awha ẹhu-ụtso nke ndu Ízurẹlu, e wota oke-alị whẹ yekoberu ikfu ono, whẹ larụ ji ono. E shi nno gụfu oke-alị whẹ l'oke-alị ikfu nna anyi whẹ.”

⁵ Tọ dụ iya bụ, Mósisu bya ekfuru yeru ndu Ízurẹlu ẹgube Onye-Nwe-Ọha kfuru iya sụ: “Ikfu ụnwu Jósẹfu bẹ iwhe whẹ l'ekfu kfụkwaru nhamụnha.

⁶ Unu lekwa iwhe Onye-Nwe-Ọha kfuru l'okfu ẹhu ụnwada Zelofehadu ndọwa. Ọ sụru woo: T'ụnwu-ada Zelofehadu lụa onye whẹ sụru l'ọ bụ whẹ iya. Ọle ẹka whẹ l'a-lụ ji bụ l'ẹnya-uwhu ikfu nna whẹ.

⁷ Oke-alị ndu Ízurẹlu te eshikwa l'ikfu dasweru ikfu. Iwhe bụ ndu Ízurẹlu l'e-gudeshia ẹka ike l'oke-alị, whẹ ketaru l'ikfu nna whẹ.

⁸ Iwhe bụ nwa nwanyị, ketaru oke l'ikfu Ízurẹlu bẹ lụfutaje ji l'ikfu nna iya. Nke ọwhu l'ee-shi nno, ndu Ízurẹlu enwekotaru oke-alị nna whẹ.

⁹ Ọo ya bụ l'oke-alị te eshidu l'ikfu dasweru ikfu ọdo nkele ikfu nọnu lẹ Ízurẹlu l'e-gudeshi ẹka ike l'oke-alị nkewhe.”

¹⁰ Ụnwada Zelofehadu bya emee ẹgube Onye-Nwe-Ọha kfuru Mósisu.

¹¹ Nkele ụnwada Zelofehadu ono, ẹwha whẹ bụ Mahula mẹe Tiza mẹe Họgula mẹe Milika mẹe Nowa bẹ bụ ụnwu nwune nna whẹ lụru whẹ.

¹² A lụru whẹ l'oshi-ụwho lụbata l'ikfu ụnwu Manáse, bụ nwa Jósẹfu, oke-alị whẹ dụ lẹ g'ọ dụ l'ikfu nna whẹ.

¹³ O noo bụ iwu, Onye-Nwe-Ọha tụru mẹe nsọ, o yeru Mósisu l'ẹka t'ụnwu Ízurẹlu dobeje. Ọo lẹ whorokoto alị Moabu, l'agụga ẹnyimu Jọ́danu lẹ mgboro Jériko bẹ Onye-Nwe-Ọha nọdu nụ Mósisu iwu ono.