Ọ́gú 35 - BAYỊBURU Ẹzaa

Mkpụkpu ndu ikfu Lívayi l'e-buru

¹ Onye-Nwe-Ọha bya ekfuru yeru Mósisu lẹ whorokoto alị Moabu, l'agụga Jọ́danu ẹka ono, dụ lẹ mgboro Jériko sụ iya:

² “Kfuru ndu Ízurẹlu tẹ whẹ shi l'oke-alị, whẹ nụ ikfu Lívayi mkpụkpu mkpụkpu, whẹ l'e-buru. Unu anụ ikfu Lívayi ono alị ẹka iwhe-edobe whẹ l'a-nọje ata nri lẹ mgburumgburu mkpụkpu gẹ mkpụkpu ha ọbu, l'aa-nụ whẹ.

³ Mkpụkpu gẹ mkpụkpu ha ono l'a-bụru ẹka ikfu Lívayi l'e-buru eburu, alị ono abụru ẹka eswi whẹ mẹe atụru whẹ mẹe eghu whẹ l'a-nọje ata nri, mbụ iwhe bụ élwù, whẹ nwe enwe.

⁴ Alị ẹka ono, unu l'a-nụ ikfu Lívayi t'iwhe-edobe whẹ tajẹ nri ono bẹ l'a-wata l'azụ mgbodo mkpụkpu ono nọo mgburumgburu mgburumgburu je akpaa l'ẹka ha g'ọo ụnu nha-ọkpa ugbo ẹto l'ụkporo iri l'ise.

⁵ Ụzo ẹnyanwu-awata azụ mkpụkpu ono bẹ unu l'a-tụta ụnu nha-ọkpa ugbo ẹsaa l'ụkporo iri, unu atụta ụnu nha-ọkpa ugbo ẹsaa l'ụkporo iri l'ụzo ọhuda azụ mkpụkpu ono. Unu atụta ụnu nha-ọkpa ugbo ẹsaa l'ụkporo iri l'ụzo ẹnyanwu-arịba azụ mkpụkpu ono, tụta ụnu nha-ọkpa ugbo ẹsaa l'ụkporo iri l'ụzo isheli mkpụkpu ono. Mkpụkpu ẹka ikfu Lívayi l'e-bu ebubu l'a-nọdu l'echilabọ. Ẹka ono bụ ẹka iwhe-edobe whẹ l'a-nọje ata nri l'azụ mkpụkpu gẹ mkpụkpu ha ono.

⁶ Mkpụkpu ishii l'ime mkpụkpu gẹ mkpụkpu ha ono, unu l'a-nụ ikfu Lívayi tẹ whẹ buru bẹ l'a-bụ mkpụkpu ẹka l'aa-nọduje ezeru ndzụ. Onye gburu ọchi, ya agbarụ laa lẹ mkpụkpu ono je anọdu zeeru ndzụ. Unu nụfua whẹ ụkporo mkpụkpu ugbo labọ lẹ mkpụkpu labọ ọdo yeru whẹ lẹ mkpụkpu ishii ono.

⁷ Mkpụkpu, unu l'a-nụ ikfu Lívayi l'a-dụkota ụkporo mkpụkpu ugbo labọ lẹ mkpụkpu ẹsato yẹle alị ẹka iwhe-edobe whẹ l'a-nọje ata nri.

⁸ Mkpụkpu gẹ mkpụkpu ha ono bẹ l'ee-shi l'oke-alị ono, ụnwu Ízurẹlu watarụ nụ ikfu Lívayi. Ikfu ọwhu alị whẹ ha shii bẹ unu l'e-shi lẹ nke whẹ nụ whẹ mkpụkpu, ha l'igweligwe; ikfu ọwhu alị whẹ ha nwanshịi, unu eshi lẹ nke whẹ nụ whẹ mkpụkpu olemole. Ikfu nọnu l'a-nụ ikfu Lívayi mkpụkpu lẹge oke iya nke whẹ hatabe.”

Mkpụkpu l'aa-nọduje ezeru ndzụ

⁹ Onye-Nwe-Ọha sụ Mósisu:

¹⁰ “Kfuru ndu Ízurẹlu sụ whẹ agha: Unu -dalẹwho ẹnyimu Jọ́danu bahụ l'alị Kenanu;

¹¹ unu ahọta mkpụkpu, ẹka unu l'a-nọje ezeru ndzụ. Mbụ ẹka bụ onye gbua ọchi l'amagama, ya agbarụ laa ẹka ono je anọdu zeeru ndzụ.

¹² Mkpụkpu ono l'a-bụru unu ẹka unu l'a-nọje ezeru ndzụ l'ẹka onye-ọgwata-ụgwo nọ, nke ọwhu onye gburu ọchi l'ẹte anwụhu jeye nteke l'ọo-fụta bya akfụru l'iwhu edzudzu-ọha t'e kpee ya ikpe.

¹³ Mkpụkpu ishii ono, unu nụru l'a-bụru mkpụkpu ẹka l'aa-gbabajẹ je ezeeru ndzụ.

¹⁴ Mkpụkpu o-zeru-ndzụ ono l'a-dụ ẹto l'azụ ẹnyimu Jọ́danu azụ iya ọwa, ẹto ọdo adụ l'alị Kenanu.

¹⁵ Mkpụkpu ono whẹ ishii l'a-bụru mkpụkpu ẹka ndu Ízurẹlu mẹe ndu l'abụa ndu Ízurẹlu mẹe ndu nlwamụnlwa, bu l'echilabọ whẹ l'a-gbabajẹ je ezeeru ndzụ whẹ. Onye gburu ọchi l'amagama l'a-gbabajẹ l'ẹka ono je anọdu zeeru ndzụ.

¹⁶ “Onye -chiru madzụ iwhe-igwe chigbua ya, onye ọbu bụkwa ogbu-ọchi. Ogbu-ọchi ono b'e gbufutaje egbu.

¹⁷ Ọ -dụa l'o -nweru onye tụru madzụ ẹwhuru tụ-gbua ya, onye ọbu bụkwa ogbu-ọchi. Ogbu-ọchi ono b'e gbufutaje egbu.

¹⁸ Ọ -dụa l'o -nweru onye chiru madzụ oshi chigbua ya, onye ọbu bụkwa ogbu-ọchi. Ogbu-ọchi ono b'e gbufutaje egbu.

¹⁹ Onye bụ iya l'agwata ụgwo ọchi ono bẹ l'e-gbu onye ono, gburu ọchi ono l'onwiya. Nteke onye ono, bụ iya l'agwata ụgwo ọchi ono jekfuru iya, t'o gbukwaa ya.

²⁰ “Onye kwoberu lẹ madzụ bẹ dụ iya ashị, o nwutsua ya, ọ nwụhu; ọ dụa l'ọ kwabẹru ẹnya tụa ya iwhe shi nno tụ-gbua ya,

²¹ m'ọ bụ o kwobe lẹ yẹle onye ọbu ta adụdu lẹ mma, o je echisweru iya ẹka chigbua ya. Ọo ya bụ l'onye ono, chigburu madzụ b'e gbufutaje nkele ọ bụ ogbu-ọchi. Onye bụ iya l'agwata ụgwo ọchi ono l'e-gbu onye ono, gburu ọchi ono nteke o jekfuru iya.

²² “Ọle ọ -bụru l'o nweru onye nwutsuru madzụ lẹ mberegede l'ẹbe ọ bụ lẹ yẹle onye ọbu bẹ dụ l'okfu, ọ nwụhu, ọ dụa l'ọo iwhe b'ọ tụru iya lẹ mberegede t'ọ ma ama, ọ tụ-gbua ya,

²³ m'ọ kwanụ l'o too letadu ẹnya, ọ tụa ẹwhuru o je atụ-gbua madzụ. Nkeshi ọwhu onye ono, ọ tụ-gburu bẹ yẹle iya l'adụdua l'okfu, t'ọ gba ẹnya lẹ ya l'e-meka iya iwhe;

²⁴ ọo ya bụ, t'edzudzu-ọha kpeshiaru iya onye ono, gburu ọchi ono yẹle onye l'eje ọgwata ụgwo ọchi ono, o gburu. Ọ waa ụzo, l'ee-shi kpeshiaru whẹ iya ndọwa:

²⁵ T'edzudzu-ọha nafụta onye ono, gburu ọchi ono l'ẹka onye bụ iya l'agwata ụgwo ọchi ono, o gburu, whẹ eduru iya je edobewhu azụ lẹ mkpụkpu ono, l'aa-nọduje ezeru ndzụ, bụ ẹka ọ gbabaru. Ya anọdu lẹ mkpụkpu o-zeru-ndzụ ono jeye nteke onye ishi ndu l'agbajẹ ẹja nụ Chileke nke nteke ono l'a-nwụhu, mbụ onye ono, a wụru mmanụ, dụ nsọ l'ishi gude mee ya onye ishi ndu l'agbajẹ ẹja nụ Chileke.

²⁶ Ọle ọ -bụru l'onye ono, gburu ọchi ono bẹ nweru nteke ọ nọnyaru, ọ kpọghata oge mkpụkpu o-zeru-ndzụ ono akpọghata, mbụ mkpụkpu ono, ọ gbabaru je anọdu,

²⁷ onye ono, bụ iya l'agwata ụgwo ọchi ono -whụa ya l'oge azụ mkpụkpu o-zeru-ndzụ ono, ọ -bụru l'onye ono, bụ iya l'agwata ụgwo ọchi ono bẹ gburu iya nụ, bẹ ikpe ọchi ta anmadu iya.

²⁸ O noo nkele onye ono, gburu ọchi ono nọdufutaje lẹ mkpụkpu o-zeru-ndzụ jeye nteke onye ishi ndu l'agbajẹ ẹja nụ Chileke nke nteke ono l'a-nwụhu. Ọ zhiawho nteke onye ishi ndu l'agbajẹ ẹja nụ Chileke ono nwụhuadaru bẹ l'ọo-lashi alị ono, ọ watarụ.

²⁹ O noo bụ nsọ, unu dobefutaje bụ iya bụ iwhe unu l'a-nọ etso shi l'ọgbo rwua l'ọgbo l'ẹka lile, unu bu.

³⁰ “Ọo ya bụ l'onye gburu madzụ bẹ bụ ogbu-ọchi. O-gbu-ọchi b'e gbufutaje egbu, m'o nweru ndu l'agba ẹka-ebe ọchi ọbu, o gburu. E te egbudu onye bụ onye lanụ kpụ l'agba ẹka-ebe l'o gburu ọchi.

³¹ Ogbu-ọchi b'e gbufutajekwa. T'ọ bọ dụkwa iwhe ogbu-ọchi l'a-nụ l'ụgwo ndzụ iya, unu l'a-nata, mbụ onye ono, a nmarụ ikpe ọnwu.

³² Onye gbarụ laa lẹ mkpụkpu o-zeru-ndzụ, bya eworu iwhe nụ l'ụgwo t'a haa ya t'ọ laa alị whẹ tẹmenu onye ishi ndu l'agbajẹ ẹja nụ Chileke anwụhu, t'unu ba anatakwa iya iwhe ọbu.

³³ Unu be emerwushikwa alị ono, unu l'eje ebubu ono emerwushi, nkele mmee ọchi e gburu egbu l'emerwujekwa alị. Ọ tọ dụdu awharwụ, l'aa-wharwụ alị ẹka e gburu ọchi ọdo nke iche, gbahalẹwho l'ogbu-ọchi ọbu bẹ l'ee-gbu l'ụgwo ọchi, o gburu.

³⁴ Unu be emerwukwa alị ono, unu l'eje ebubu ono, o noo nkele mbẹdua, bụ Onye-Nwe-Ọha bẹ bu ebubu l'echilabọ ndu Ízurẹlu.”