Ọ́gú 34 - BAYỊBURU Ẹzaa

Oge alị Kenanu

¹ Onye-Nwe-Ọha sụ Mósisu:

² “Kfuru ndu Ízurẹlu sụ whẹ agha: Nteke unu bahụru l'alị Kenanu, bụ alị ọbu, unu l'eje anata t'ọ bụru oke-alị unu. Ọ waa oge alị iya ndọwa:

³ Ụzo ọhuda unu l'a-wata l'echi-ẹgu Zinu, l'ogologo oge onye lẹ Edọmu. L'ụzo ẹnyanwu-awata bẹ oge alị ụzo ọhuda unu l'a-wata l'ẹka Eze-ẹnyimu Únú jeberu.

⁴ Oge alị unu ono l'e-shi l'ụzo ọhuda jee mgburumgburu mgburumgburu lụfuta elikoro Akurabyimu, ya eshi l'ẹka ono tụgburu nno futa l'echi-ẹgu Zinu. Ya abya eje nno fụta l'ụzo ọhuda Kádẹshi Baneya. Ya eshikwa nno lụfuta lẹ Hazarada; ghata l'ẹka ono rwua Azụmonu.

⁵ Oge alị ụzo ọhuda unu ono l'e-shi lẹ Azụmonu jee mgburumgburu mgburumgburu fụta l'ọnu-iyi Íjiputu. Ẹka l'oo-jebe, mbụ oge alị ono bụ l'eze-ẹnyimu.

⁶ “A -bya l'oge alị ụzo ẹnyanwu-arịba unu, oge iya l'a-bụ l'oke eze-ẹnyimu. O noo ẹka l'a-bụ oge alị ụzo ẹnyanwu-arịba unu ndono.

⁷ “A -bya l'oge alị ụzo isheli unu, unu shi l'oke eze-ẹnyimu kpaa oge alị ono jeye l'ugvu Họru.

⁸ Unu eshikwa l'ugvu Họru kpaa oge alị ono jeye l'ẹka l'eeshije abahụ Hámatu. Oge alị ono atụgbukwaru rwua Zedadu.

⁹ Ya eshi l'ẹka ono rwua Zifurọnu. Ẹka oge alị ụzo isheli unu ono l'e-beru bụ lẹ Hazaru Enanu. O noo ẹka l'a-bụru oge alị ụzo isheli unu ndono.

¹⁰ “A -bya l'oge alị ụzo ẹnyanwu-awata unu, unu shi lẹ Hazaru Enanu kpaa oge alị ono jeye lẹ Shefamu.

¹¹ Oge alị ono l'e-shikwawho l'ọhali Shefamu lụfuta lẹ Habẹlu l'ụzo ẹnyanwu-awata Ayinu. O -rwua ẹka ono, ya atụgbuleruwho ụzo ọhali fụta l'ugvu ugvu, dụ l'ụzo ẹnyanwu-awata eze-ẹnyimu Kíneretu.

¹² Oge alị ono atụgbukwaruwho ọhali fụta l'ẹnyimu Jọ́danu. Ẹka l'oo-beru abụru lẹ Eze-ẹnyimu Únú. “O noo ẹka l'a-bụ alị unu ndono mẹe oge iya gbaa mgburumgburu.”

¹³ Mósisu bya ekfuaru ndu Ízurẹlu sụ whẹ: “O noo alị ọbu, unu l'a-tụ ido gude washịa t'ọ bụru oke-alị unu. Ọo ya bụ alị ọbu, Onye-Nwe-Ọha sụru t'a nụ ikfu tete yẹle nkerẹbo ikfu.

¹⁴ Nkele ikfu ụnwu Rúbẹnu mẹe ikfu ụnwu nke Gadu bẹ natawaru oke-alị nkewhe ẹgube whẹ ha l'ibe nna whẹ l'ibe nna whẹ mẹkwawho nkerẹbo ikfu Manáse.

¹⁵ Ikfu labọ ono mẹe nkerẹbo ikfu Manáse bẹ natarụ oke-alị nkewhe l'ụzo ẹnyanwu-awata l'azụ ẹnyimu Jọ́danu azụ iya ọwhu lẹ mgboro mkpụkpu Jériko l'ụzo ẹka ẹnyanwu l'eshije awata.”

Unwoke, a họtaru tẹ whẹ washịa alị ono

¹⁶ Onye-Nwe-Ọha sụ Mósisu:

¹⁷ “Ọ waa ẹwha unwoke, l'a-washịru unu alị ono t'ọ bụru oke-alị unu ndọwa: Eliyéza, bụ onye l'agbajẹ ẹja nụ Chileke mẹe Jóshuwa nwa Nunu.

¹⁸ Họta onye ishi lanụ l'ikfu g'ikfu ha tẹ whẹ yeta ẹka t'a washịa alị ono.

¹⁹ Ẹwha unwoke ọbu ndọwa: Kálẹbu nwa Jefune nke ikfu Juda

²⁰ mẹe Shemuwẹlu nwa Amihudu nke ikfu Símiyọnu

²¹ mẹe Elidadu nwa Kisulọnu nke ikfu Bénjaminu

²² mẹe Buki nwa Joguli, onye ishi, l'achị ikfu Danu

²³ mẹe Haniyẹlu nwa Ifọdu, onye ishi, l'achị ikfu Manáse, bụ nwa Jósẹfu

²⁴ mẹe Kemuwẹlu nwa Shifutanu; onye ishi, l'achị ikfu Ífuremu, bụkwawho nwa Jósẹfu

²⁵ mẹe Elízafanu nwa Panaku, onye ishi, l'achị ikfu Zébulọnu

²⁶ mẹe Palutiyẹlu nwa Azanu, onye ishi, l'achị ikfu Ísaka

²⁷ mẹe Ahihudu nwa Shelomi, onye ishi, l'achị ikfu Asha

²⁸ mẹe Pedahẹlu nwa Amihudu, onye ishi, l'achị ikfu Náfutali.”

²⁹ O noo ẹwha unwoke ọbu, Onye-Nwe-Ọha sụru tẹ whẹ washịa alị ono t'ọ bụru oke-alị ndu Ízurẹlu l'alị Kenanu.